PUNTELLU 1 : Sviluppà è rinfurzà e piattaforme nant’à e risorze naturale
Prugramma 1 ► Sviluppu è slibramentu di l’idrogenu verde – H2
Hè a pianificazione energetica un elementu di primura inde una strategia di sviluppu duraticciu per i territorii isulani. Inde l’UMR CNRS/Università di Corsica Scienze per l’Ambiente, cunsiste a dimarchja scentifica ingagiata dapoi parechji anni à fà i studii di i sistemi energetichi di manera glubale, pigliendu in contu tutti i particularisimi liati à l’usu di e sorze rinnuvellevule d’energia.
Sò mossi i travagli in giru à a gestione ottimale di e risorze rinnuvellevule d’energia – u studiu, l’ottimisazione, u diagnosticu di i sistemi di pruduzzione è l’usu raziunale di i flussi energetichi deterministi. Cù a messa in ballu di e piattaforme tecnulogiche, MYRTE dapoi u 2009 è PAGLIA ORBA dapoi u 2012, inde u Centru di Ricerche Scentifiche Georges Peri in Aiacciu, si hè pusiziunata l’Università di Corsica cum’è qualchì denzanu in i duminii di l’idrogenu PER è DA l’energie rinnuvellevule è inde quellu di e micro rete intelligente isulane. Anu per vucazione ste piattaforme sperimentale flessile, co-custruite cù ALSTOM H2 è u CEA Liten, di puntellà di modu praticu a ricerca è a furmazione scentifica d’una parte, ma dinù di avvià, da l’altra banda, i trasferimenti tecnulogichi ver’di l’intraprese industriale partinarie.
Inde stu quadru, si avvia u prugramma 1 ver’di u sviluppu di a ricerca in giru à a tematica liata à a pruduzzione d’energia elettrica à parte si da sorze rinnuvellevule d’energie mischjate cù l’unità di pruvista d’idrogenu, pilutate da e rete. Cerca dinù à rinfurzà a furmazione per via di u Campus di i Mistieri è di e Qualificazione di a Transizione Energetica nant’à l’Idrogenu, in leia stretta cù a strutturazione di a filiera Idrogenu in Corsica.
Hà dinù vucazione u prugramma à accumpagnà u polu di cumpetittività CAPENERGIES per via di a so delegazione Corsica per a messa in sinergia di tutti l’attori territuriali maiò di l’energia, istituziunali (Statu, Regione), universitarii è intraprese (Grande intraprese EDF, ENGIE è PME chì travaglianu inde u duminiu di l’Energie rinnuvellevule è Prescrittori (BE)), da mette in ballu u sviluppu di sta filiera in Corsica.
Prugramma 2 ► Ver’di una ingenieria marina è liturale nant’à a zona euro-mediterranea
Hè diventata a gestione duraticcia di e pruviste marine un’imbusca maiò. Sò l’arrecu di dati di qualità è l’arnesi di valutazione e tappe di primura inde una dimarchja rispettuosa di l’ambiente è di a gestione di e risorze. Hà acquistu a piattaforma Stella Mare cumpetenze scentifiche di prima trinca inde u duminiu di l’ingenieria marina è liturale.
Permette stu prugramma, messu in ballu da Stella Mare (UAR CNRS/Università di Corsica), di sperimentà in Corsica mudelli novi di gestione girati ver’di l’impegnu direttu di l’attori di u mare, da permette una spluttazione ecu-sustenevule di e risorze marine è dinù per via di l’intervenzione attive per u mantenimentu è puru u crescimentu di e pruviste naturale. Per via di spezie « sibule » chì sò raprisentative di a filiera marina di u Mediterraniu, sò sviluppate unepoche d’azzione pilote da permette à i prufeziunali di mette in ballu i mudelli di spluttazione duraticcia di a so risorza (risturazione eculogica, bio-epurazione di i porti…).
Hè fattu stu travagliu in cullaburazione cù i scentifichi, i prufeziunali di u mare è i decidori publichi. Sò messi à a so dispusizione l’arnesi è e tecnulugie innuvante chì sò stati sviluppati, da pudè facilità e prese di decisione è favurizà i trasferimenti di cumpetenze. Hà l’ambizione a piattaforma Stella Mare di pusiziunà si cum’è un capifila in u duminiu di l’ingenieria eculogica marina è liturale. In più di quessa, seguiteghja a piattaforma u so sviluppu, chì hà aghjuntu una dimensione pruduttiva à a so attività, ciò chì currisponde à un scopu priuritariu di stu prugramma (hà acquistu l’Università un terrenu cunfinente à u situ attuale).
Si movenu sti travagli in giru à dui prugetti chì anu per tematica, di modu rispettivu, a pruduzzione di l’aligosta rossa (Palinurus elephas) è quella di u zinzu (Paracentrotus lividus), incù u scopu di risturà e populazione sgradate in u Mediterraniu.
Cuntattu
Bernard GIUDICELLI – Rispunsevule di a messa in ballu è di i partinariati di u PIA UNITI
giudicelli_b@univ-corse.fr | Tél. : 04 95 34 82 37
www.universita.corsica
D'altronde
- Programme d’Investissement d’Avenir UNITI – Comment l’Université de Corse veut devenir un catalyseur des dynamiques territoriales
- Prugramma d’Investimentu d’Avvene UNITI – Cumu vole diventà l’Università di Corsica un catalizatore di e dinamiche territuriale
- Cumu l’Università appronta a sucetà à u mondu digitale di dumane
- Trà l’Università di Corsica è l’Università di Pisa, una cuuperazione in forma di ponte versu l’Italia
- Cumu l’Università di Corsica è i so partinarii adattanu l’agrumi à e custrette climatiche
- L’orizonti novi di u laburatoriu Stella Mare, a piattaforma di l’Università di Corsica è di u CNRS spezializata in ingenieria eculogica marina è liturale
- Cumu face l’Università di Corsica di l’idrogene verde un’energia d’avvene
- Scaricà a ducumentazione
- Cartulare di candidatura
Prugramma 3 ► Caratterisazione è adattazione di e risorze terranie à i scambiamenti climatichi
Hè a Corsica, per via di a so isulanità è di u so pusiziunamentu inde u mare Mediterraniu, un territoriu sensibule di pettu à i scambiamenti climatichi. Hè un territoriu favurevule da pudè identificà e suluzione chì permettenu di limità l’effetti di l’evuluzione climatica nant’à e risorze. Hè in leia l’Università di Corsica cù i decidori è l’attori lucali, favurizendu di fatti a messa in ballu di dimarchje participative. Forte di a so sperienza nant’à e risorze terranie, inde u quadru di i prugetti strutturanti « Gestione è valurisazione di l’Acqua in u Mediterraniu », « Risorze Naturale » è « Fochi » di l’UMR CNRS / Università di Corsica SPE, hà messu in ballu l’Università prugetti di ricerca numerosi à u livellu regiunale (e.g. Cullettività di Corsica), naziunale (e.g. Ministeri, ANR) è internaziunale (e.g. H2020, Interreg), chì permettenu di acquistà base scentifiche abbastanza sode da pudè si pusiziunà oramai nant’à i scambiamenti climatichi cù una urientazione pluri è interdisciplinaria.
Hè in giru à stu zocculu ch’ellu si custruisce u prugramma 3 per via di u quale ingagia l’Università di Corsica iniziative strutturante per fà fronte à i scambiamenti climatichi, in particulare nant’à e risorze agricule, e risorze in acqua è e fureste. Hà per scopu stu prugramma di produce cunniscenze nove da pudè capisce è anticipà l’evuluzione di e furzature, valutà i so impatti è identificà l’arnesi chì si ponu mubilizà à cortu andà.
Per quessa, sò messe in ballu parechje azzione interdisciplinarie :
- U studiu di l’impattu di u scambiamentu climaticu nant’à a sustenabilità agricule (sustegnu à a filiera di produzzione), nant’à e risorze in acqua di surfazia è sutteranie, nant’à l’evuluzione di i fochi di vegetazione ma dinù nant’à u sviluppu d’arnesi numerichi è di previsione idrometeorologiche, di gestione è d’aiutu à a decisione ;
- U sviluppu di bioprucedimenti è a ricerca di suluzione alternative à i prudutti fittosanitarii ;
- L’esamine di dispusitivi ghjuridichi chì anu per scopu di prevene è di limità l’effetti di u scambiamentu climaticu ;
- U slibramentu di una ecunumia circularia inde i settori di l’agricultura è di a furesta (rivalutazione di i sottu produtti, sustegnu à a pruduzzione è à a cunsumazione lucale).
In cumplementu, per rinfurzà a leia cù i territorii, mette in ballu u prugettu una piattaforma di scambii trà scentifichi è attori (gestiunarii di cullettività lucale, intraprese, associi di pruduttori, sucetà civile…). Si hà da arrimbà à u puntellu trasversale inde u quadru di l’azzione nant’à l’internaziunale, u numericu è e Scienze Cù è Per a Sucetà, per fà a leia nant’à ste ricerche cù l’altre isule di u Mediterraniu, l’attori è a sucetà. Trattendu si di a furmazione, u scopu hè di creà una spezialità d’ingenieru in agrunumia in leia cù i scambiamenti climatichi, per risponde à i quistiunamenti suciali è scentifichi in giru à un’agricultura duraticcia è di più rispettuosa di l’ambiente (serebbe a seconda spezialità di a scola d’ingenieri Paoli Tech di l’Università di Corsica).