I nosci anziani studianti tenini una leia forti incù a so Università. D’altrondi ci voltani suventi pà sparta a so spirienza o participà à a missa in anda d’azzioni di sviluppu. A vicinanza ch’idda pruponi l’Università di Corsica trà i studianti è i prufissori hè una risorsa maiori in a custruzzioni di sta cumunità universitaria.
Ritruveti l'attualità di i studii è di a vita studiantina à l'Università di Corsica à nantu à Studià, u purtonu di i studianti è di i futuri studianti
https://studia.universita.corsicaDapoi a so criazioni in u 2010, a Fundazione di l’Università di Corsica hà sempri missu in risaltu l’anziani studianti in i so sfarenti azzioni. U parcursu Custruì, par indettu, ricevi di modu rigulari “anziani” chì prisentani u so parcursu prufiziunali à i novi studianti. Pà i 30 anni di l’Università di Corsica, a Fundazione hà ancu cuurdunnatu un libru chì daghjia un spaziu tamantu à testimonii d’ALUMNI.
LinkedIn hè a reta suciali prufiziunali a più sviluppata à nantu à internet. L’Università di Corsica hè prisenti incù una pagina scola chì adunisci millai è millai d’anziani studianti. Ci si ritrovani infurmazioni à nantu à u so parcursu è u so postu attuali. Un mezu bonu di tena u cuntattu trà « anziani » è di favurizà ponti trà i prumuzioni.
Dominique SIACCICufundatori di GoodBarber, CampusPlex
Diplumatu di u Master Intigrazioni di i Sistema d’Infurmazioni
À a fini di u 2011, avemu lanciatu à « GoodBarber », un lugiziali in linea chì parmetti di crià appiicazioni smartfonu. Più di 20.000 appiicazioni sò stati criati. A maiori parti di i nosci clienti sò à l’internaziunali. Femu parti di i 3 primi impresi pà ciò chì tocca à i parti di u marcatu ! Semu pà u più stallati in Aiacciu. A maiori parti di i nosci sviluppadori hà studiatu à l’Università di Corsica in infurmatica.
Caroline POGGIRializatrici
Diplumata di u DU CREATACC, Criazioni è Tecnichi Audiuvisivi è Sinematografichi di Corsica
Senza u diplomu CREATACC, mai ùn avariu fattu Chiens, u me prima filmettu. Mi socu ghjuvata mondi di u diploma, ma dinò di i loca, di i studianti, di i scontri, ecc. St’annata hè stata propiu dicisiva in u me parcursu : hè stata un veru slanciu pà a seguita. Finita l’annata, eru di più pratica in u sinemà. Ùn mi faci più a paura.
Alexandra FERACCIMulticampiona universitaria di Francia è d’Auropa di karaté
Licenza STAPS
In u quadru di cumpitizioni, i nosci cundizioni sò meddu chè quiddi di studianti di certi Università, suventi partini soli è pagani iddi. À l’Università di Corsica, sempri socu stata accumpagnata da a direttrici di u Serviziu di i Sport è tuttu era presu in cariga (alloghju, ripasti, spiazzamentu).
Lionel DUMAS-PERINIPristatariu video
Diplumatu di a Licenza Infurmatica
U vantaghju d’essa studianti à l’Università di Corsica hè chì, senza renda si ni contu subbitu, ci femu una reta prufiziunali tosta. Si faci incù prufissori quant’è incù altri studianti ; è quant’è dinò in u quadru di i cursi chè in i sirati studiantini ! St’affari m’hè ghjuvatu quand’aghju lanciatu a me impresa. Ùn hè tantu faciuli à principiu ma vali u colpu s’è omu t’hà un’idea nova. Sia omu si dici chì ùn ci hè nudda à fà in Corsica, sia omu si dici chì ci hè tuttu da crià !
Céline INZAINARispunsevuli di u Serviziu Statistichi, studii è cura ecunomica, DIRECCTE, Aiacciu
Diplumata di u Master Ecunumia regiunali – Ingegneria di u sviluppu tarrituriali
I studianti chì sortini di u Master Ecunumia di l’Università di Corsica sò pronti à travaddà chì sò propiu furmati à i mistieri di stu sittori. Socu vinuta di pocu in Corti pà una sissioni di scambiu incù i studianti è l’evuluzioni di u cursus mi faci sunnià ! Si tratta mondi d’innuvazioni, di criazioni d’impresa…
François PLANEPrufissori d’EPS, Accademia di Lille
Diplumatu di u DU Mistieri di a Furmazioni spicialità EPS
U quadru di vita di Corti hè parfettu, luntanu da a pulluzioni di i cità maiori. Tuttu hè manenti, tutti ci cunniscimu è l’ambiu hè bunissimu ch’iddu sia incù i studianti o incù i Curtinesi. U quadru naturali chì inghjira a cità hè propiu magicu subratuttu pà i spurtivi « ch’è no semu ». St’affari hè unicu in u mondu !
Marc-Antoine NERIInternu in midicina generali (8ima annata, Ecchisi-Marseglia Università)
Prima annata di Midicina
U travaddu di i prufissori di l’Università partenarii (Nizza, Marseglia, Parighji 5 è Parighji 7) è quiddu di i prufissori « nustrali » ci parmetti d’avè insignamenti bunissimi è d’ùn avè mancanzi quandu si principa in 2du annu in un’antra facultà. Ùn vecu l’intaressu ch’iddu avaria un studianti Corsu d’andà à fà a so PACES in altrò chè in Corti oghji. Saria, tandu, una dificultà in più.
Serena GUAITELLADirittrici di a scola di Ponti Novu
Diplumata di u Master Mistieri di a Furmazioni Prufissuratu di i Scoli specificu bislinguu
I me studii à l’Università di Corsica m’ani datu i sapè indispinsevuli pà imparà u me mistieri in i cundizioni i più boni. I sfarenti cursi di corsu ani rinfurzatu a me vulintà di duvintà prufissori bislingua, pà cuntribuiscia, à u me liveddu, à a salvezza è à a diffusioni di a noscia lingua.
Guillaume SCARTABELLICunsiglieri in gestioni è valurizazioni di i spazii furraghjaghji, Camara di l’Agricultura di Corsica suprana
Diplumatu di u Master Ingegneria eculugica
Aghju avutu a furtuna di studià in furmazioni di qualità, prufiziunalizanti è ricunnisciuti, in i quali avemu binifiziatu d’intervinzioni di prufiziunali di u fora. Avemu avutu a pussibilità di travaddà à nantu à prughjetta cuncreti è appiicati à a regioni, ciò chì ci hà parmissu d’ammaistrà u cuntestu isulanu, ma dinò di cunnoscia i metudi boni di gestioni di prughjettu.
