S’avvia l’Università Pasquale Paoli ver’di u sviluppu di a ricerca in giru à a pruduzzione è à a pruvista d’energia elettrica à parte da l’idrogene rinnuvellevule. U scopu : prupone un’energia alternativa è scarbunata à u livellu di u territoriu.
Face parte di i puntelli di a ricerca à l’Università di Corsica : accumpagnà a strategia di sviluppu duraticciu nant’à un territoriu isulanu cù parechje singularità à u livellu energeticu. Cù a messa in ballu di e piattaforme tecnulogiche MYRTE, in u 2009, po PAGLIA ORBA, in u 2012, si hè pusiziunata l’Università cum’è capifila inde u duminiu di l’idrogene verde – un gazu pruduttu à parte d’energie rinnuvellevule cum’è u sulare, l’idroelettricità o puru l’energia euliana, incù una tecnica particulare : l’elettrolisi di l’acqua.
Cerca u primu puntellu di u Prugramma d’Investimentu d’Avvene (PIA UNITI), purtatu da l’istituzione, à allargà sta dimarchja scentifica ingagiata dapoi una quindecina d’anni. « Prisentanu l’isule specificità à u livellu energeticu, cù sistemi elettrichi carbunati assai è costi di pruduzzione assai alti, riassume Christian Cristofari, prufessore di l’università, Vice Presidente « Transizione energetica è sviluppu duraticciu » è rispunsevule di u prugettu di ricerca « energie rinnuvellevule » inde u laburatoriu Scienze per l’ambiente (CNRS/Università di Corsica). Inde stu cuntestu, simu in traccia di mette in ballu un’alternativa cù l’idrogene verde, un’energia pulita, scarbunata è assai bundante inde l’isula, per risponde à un bisognu di sustegnu à a reta elettrica isulana. »
Hè tamanta l’imbusca. Oghje ghjornu, s’arremba u missu energeticu di a Corsica à un trepedi equilibriatu trà energie rinnuvellevule, una pruduzzione termica inde e centrale chì viaghjanu cù u fiulu pisiu in Aiacciu è cù u fiulu lebbiu in Lucciana è l’impurtazione per via di e leie elettriche cù l’Italia. Un sistema chì mette – da luntanu – l’isula à u primu rangu francese di l’impronta carboniu a più forte trattendu si di a pruduzzione elettrica.
Per pruvà di risponde à sta prublematica, travaglianu in particulare i scentifichi di l’Università Pasquale Paoli nant’à a pruvista chimica d’idrogene verde. U so scopu : circà à cumpensà l’intermittenza di l’energie rinnuvellevule uttimizendu a capacità di pruduzzione elettrica. « Oghje ghjornu, l’imbusca hè di fà calà i costi di pruduzzione per rende st’energia campatoghja è di più cumpetittiva, spieca Christian Cristofari. Hà dinù l’idrogene verde un impattu sanitariu, postu ch’ellu ùn emette micca particule fine. Simu propiu à una girata. Participeghjanu l’attori publichi, per via di parechji dispusitivi di sustegnu à a ricerca, à rende campatoghja sta tecnulugia innuvante, è li tocca à accumpagnà u trasferimentu tecnulogicu ver’di l’attori ecunomichi di u territoriu. »
Secondu i prutagunisti di stu prugettu di ricerca, hè sicuru un affare : face st’energia cù pocu carboniu a prumessa di un’ecunumia propiu scarbunata. D’altronde, ùn si limiteghja u primu prugramma di u PIA UNITI à sviluppà a ricerca in giru à sta tematica. Cerca dinù à rinfurzà a furmazione per via di u Campus di i Mistieri è di e Qualificazione* di a Transizione Energetica nant’à l’idrogene, in leia stretta cù a strutturazione di a filiera idrogene inde l’isula. « U nostru scopu hè di travaglià per u sviluppu di sta filiera inde l’isula, sott’à i so sfarenti aspetti, accerta Christian Cristofari. Tandu si tratta dinù di rinfurzà a furmazione iniziale è cuntinua inde stu duminiu, integrendu l’idrogene inde e carte di furmazione chì esistenu, in particulare inde i Bachelors universitarii di tecnulugia è inde a nostra scola d’ingenieri PaoliTech. »
*In u 2016, custitueghjanu l’attori di a furmazione federati da u Retturatu di Corsica è da a Cullettività di Corsica un partinariatu chì si busca in u 2017 u labellu interministeriale « Campus di i Mistieri è di e Qualificazione. » Hè definitu u stabilimentu supportu : si tratta di l’Università di Corsica Pasquale Paoli.
Maghju 2024
