Pruposta di furmazioni

100 furmazioni pluridisciplinarii, da u liveddu baccu à u dutturatu.

Pà apra a via di a riescita è di l’inserzioni à i so 4 600 studianti, l’Università di Corsica s’hè data i mezi chì abbisognani tali una pruposta di furmazioni diversificata, scumpartuta in duminii maiori fundamentali chì includini insignamenti di prima trinca è adattata à u tarritoriu. Mondi invistita in a via di l’internaziunali, l’Università incuraghjisci i so studianti à sviluppà una vera cultura di a mubilità.

 

Cunsultà l’insemu di i pruposti di furmazioni

Scriva si à l'Università di Corsica

Una pruposta di furmazioni diversificata.

Pluridisciplinaria, l’Università di Corsica Pasquale Paoli pruponi più di 100 diploma da u liveddu baccu à u dutturatu.

4 duminii maiori fundamentali

Arti, Lettari, Lingui

Drittu, Ecunumia, Gestioni

Scenzi Umani è Suciali

Scenzi, Tecnulugii, Saluta, STAPS

8 facultà, scoli è istituti

UFR Drittu, Scenzi Suciali, Ecunomichi è di Gestioni

UFR Lettari, Lingui, Arti, Scenzi Umani è Suciali

UFR Scenzi è Tecnichi

IUS / Istitutu Universitariu di Saluta

IUT / Istitutu Universitariu di Tecnulugia

Scola d’ingegneri Paoli Tech

ESPE / Scola Superiori di u Prufessuratu è di l’Aducazioni

IAE / Scola universitaria di management

L’Università di Corsica pussedi una scola dutturali chì forma i futuri circadori à nantu à i tematichi di l’ambienti è di a sucità (ED n°377).

L’Università di Corsica dà dinò insignamenti di prima trinca frà i quali :

A prima annata di Midicina chì pò essa fatta in Corti. Duranti st’annata di furmazioni, i studianti ricivuti à u cuncursu poni parsiguiscia i so studii in midicina, farmacia, uduntulugia (dentariu), ustetricia (bona donna) o chinesiterapia in i stabilimenti partinarii di l’Università di Corsica (sigondu à i spicialità : Ecchesi-Marseglia, Parighji Descartes, Parighji Diderot è Nizza Sophia Antipolis).

A scola d’ingegneri Paoli Tech forma ingegneri in i duminii di a maestria è a gestioni di l’energia, di a custruzzioni à longu andà è di l’energii rinnuvevuli. Hè abilitata a scola da a Cummissioni di i Tituli d’Ingegneri ciò chì hè una ricunniscenza di a qualità di a furmazioni è di a so finalità prufiziunali.

Una pruposta di furmazioni prufiziunalizanti è in leia incù u so tarritoriu.

L’intaressu cuntinuu di l’inserzioni di i studianti s’arrimba à nantu à furmazioni chì t’ani un cuntinutu prufiziunalizanti, chì avviani versu mistieri mirati, in accordu incù i prublematichi maiori di sviluppu di u tarritoriu : numericu, drittu, audiuvisivu è cumunicazioni, ecunumia è gestioni di l’impresi, ingegneria di l’ambienti è di l’energii rinnuvevuli, turisimu à longu andà, geniu civili, saluta…

Parichji facultà è scoli di l’Università di Corsica urganizighjani ugni annu un cunsigliu di migliuramentu. Cumpostu di raprisintanti di l’Università è di prufiziunali, u so scopu hè di metta in accordu i prugramma pidagogichi di a furmazioni incù i « bisogna mistieri » aspittati da i prufiziunali.

Ci sò dinò furmazioni in alternenza chì t’ani mondi avantaghji : guadagna finu à quasgi 100% di u SMIC, travaddà in una impresa puri suvitendu cursi è appruntendu un diploma ricunnisciutu. U principiu hè simplici : longu à l’annu, u studianti alterna i periudi di cursu è i periudi in impresa. Sta urganizazioni di i cuntratta di travaddu in alternenza facilitighja l’inserzioni prufiziunali, a maiori parti di l’alternenti si buscani un impiegu dopu à u so cuntrattu. L’Università di Corsica pruponi più di una trintina di furmazioni in alternenza, da u DUT à u Master è in tutti i duminii.

Certi furmazioni sò sustinuti da l’impresi righjunali pà risponda meddu à i bisogna di u tarritoriu :

Visite des étudiants du DU Manager entrepreneur au dispatching EDF

Visita di i studianti di u Diplomu "Manager imprisariu" à u dispatching EDF in Aiacciu

A scola universitaria di management (IAE di Corsica) pruponi dinò un diploma “Manager Imprisariu”, in partinariatu incù impresi isulani. U so scopu hè di sviluppà cumpitenzi essendu u più in leia pussibuli incù i bisogna di u tarritoriu, di furmà manager imprisarii di prima trinca, incù cumpitenzi trasversali, chì poni mischjà cultura scentifica è spiritu manageriali, à u serviziu di u sviluppu è di l’innuvazioni di l’impresi corsi.

Hélène Battini, diplômée du DU Journalisme, médias et corsophonie, journaliste à France Bleu RCFM

Elena Battini, diplumata in "Ghjurnalisimu, media è cursufunia", ghjurnalista pà France Bleu RCFM

Un diploma “Ghjurnalisimu, Media è Cursufunia”, in partinariatu incù i media isulani è a Scola Superiori di Ghjurnalisimu di Montpellier (ESJ PRO), hè statu missu in anda à l’UFR Lettari, Lingui, Arti, Scenzi Umani è Suciali. I cursofuni chì volini fà una carriera in u ghjurnalisimu, parmetti u diploma una spicializazioni in radiu, televisiò o stampa scritta in u quadru di un cuntrattu di prufiziunalizazioni di 2 anni incù una paga, in alternenza in drintu à i ridazzioni di France Bleu RCFM, France 3 Corse Via Stella o Corse-Matin.

Ponti internaziunali.

Invistita assai in a via di l’internaziunali, incuraghjisci l’Università di Corsica i so studianti à sviluppà una vera cultura di a mubilità.

In a maiori parti di i furmazioni ci hè a pussibilità di suvità simestri di studii à l’internaziunali : in Auropa, incù u prugramma Erasmus +, à u Quebec, incù u prugramma CREPUQ, o inghjalocu in altrò in « Free mover ». L’Università di Corsica t’hà 100 Università partinarii inghjalocu in u mondu. I periudi di staziu in l’impresi si poni ancu fà à u stranghjeri.

Aiuti finanziarii incitativi sò pruposti à i studianti, frà altri da a Cullittività Tarrituriali di Corsica, ma ancu dirittamenti da l’Università di Corsica com’è a Bursa Improving, chì hè di 1 000 euro à mesi.

U Serviziu di i Rilazioni Internaziunali di l’Università di Corsica parmetti à i studianti intarissati da un sughjornu à u stranghjeri d’essa cunsigliati è accumpagnati da una squadra dedicata longu à i so dimarchji (prugramma, pruceduri, calindarii, aiuti finanziarii…).

Erasmus + :

CREPUQ :

I campi di l’Università di Corsica accoddini dinò ugni annu più di 300 studianti internaziunali di 60 naziunalità sfarenti.

L’associu ESN Corsica, membru di a reta Erasmus Student Network, cuntribuisci à favurizà a stallazioni è l’integrazioni di i studianti internaziunali. I numarosi attività urganizati da ESN Corsica sò sempri uccasioni di scambii interculturali.