Rialzu di a timperatura, stressu idricu, gestione di e risorze d’acqua… hà u scambiamentu climaticu unepochi d’effetti nant’à u sviluppu di i vegetali. Per via di un prugramma di ricerca, cercanu l’Università di Corsica-CNRS, u CIRAD è l’INRAE e risposte di pettu à e difficultà di a filiera agrumicula isulana.
Hè un prugramma maiò di ricerca à l’Università di Corsica in giru à l’effetti di u scambiamentu climaticu inde l’isula : cumu si puderà adattà i vegetali à ste custrette ? « U clima scambia prestu dapoi parechji anni è l’imbusca hè, oghje ghjornu, di capisce chì sò l’impatti cuncreti nant’à u sviluppu di e piante, è in particulare nant’à l’agrumi chì sò u secondu settore u più dinamicu inde l’agricultura isulana », spieca Jérémie Santini, prufessore di l’università in biochimica è in biologia mulecularia, è direttore di a Facultà di e scienze è tecniche di l’Università di Corsica.
Cumu si prisentanu i scambiamenti climatichi nant’à l’isula ? Chjama sta dumanda assai cumplessa parechje altre interrugazione per i cercadori di u laburatoriu Scienze Per l’Ambiente (Università di Corsica / CNRS). Serà una bona o piuttostu un male a crescita di e timperature per l’agrumi ? Cumu si puderà uttimizà e pratiche d’irrigazione per risparmià una risorza in acqua assai più poca ? U prugettu di ricerca messu in ballu in u quadru di u Prugramma d’Investimentu d’Avvene (PIA) UNITI, cù u Centru di cuuperazione internaziunale in ricerca agronomica per u sviluppu (CIRAD) è l’Istitutu naziunale di ricerca per l’agricultura, l’alimentazione è l’ambiente (INRAE) di San Ghjulianu (Cismonte), vole arrecà unepoche di risposte à ste sfide. « Tutti l’anni, cresce u numeru d’ettari d’agrumi cultivati inde l’isula, indetta Jérémie Santini. Anu sti vegetali bisogni impurtanti in acqua. Cunsistenu i nostri travagli à studià, frà altri affari, a capacità à gestisce a risorza idrica in un cuntestu d’assicchera di a terra è d’episodii climatichi più intensi. »
Per mette in ballu stu prugettu scentificu, anu fattu i cercadori un partinariatu cù l’agrumicultori nant’à parechje spluttazione. U scopu : pruvà e capacità di resistenza di l’agrumi di pettu à a timperatura è à u stressu idricu, in particulare u pomelò o a clementina, u fruttu maestru di a filiera. S’interessanu dinù i scentifichi à a diversità genetica di sti vegetali è à tutte l’attività biotopiche in giru à st’agrumi, da pudè risponde à ste prublematiche. Studieghjanu a so rendita è e varietà chì puderianu esse sviluppate inde l’isula per un’agrumicultura duraticcia è diversa. « Travagliemu nant’à l’innuvazione varietale chì puderia permette di allargà u periudu di pruduzzione di l’agrumi, in particulare d’invernu, dopu à a stagione di e clementine, precisa Yann Froelicher, circadore à u centru INRAE-CIRAD di San Ghjulianu. Si tratta di allargà a sporta d’agrumi di a filiera, arrechendu un pruduttu novu di sviluppu. » Si scrivenu propiu inde sta strategia i studii in giru à a nova mandarina di Corsica, chì si era fattu piglià a suprana da a clementina inde l’isula.
Travagliendu nant’à stu fruttu, provanu i scentifichi, per via d’intrecci varietali, di mudificà l’acidità o a quantità di granella cuntenute inde st’agrumu. « Cerca stu travagliu minutu à creà un pruduttu chì rispondi à tempu à l’attese di quelli chì cultiveghjanu è à quelle di i cunsumatori, seguiteghja Jérémie Santini. Hè propiu un’imbusca à u livellu ambientale ma dinù ecunomicu per vene in appoghju à una filiera, per via di un mudellu di ricerca chì si vole nanzituttu participativu è giratu ver’di u territoriu. »
Lugliu 2024
