Attente à l’inghjochi maiò di a sucetà è primurosa di purtà a riflessione cullettiva, l’Università di Corsica prupone di modu regulare Catedre chì permettenu un arricchiscimentu di i sapè cun l’incontru di i parè. Mesolugia, ecunumia suciale è sulidaria, cultura mediterrania, sò altre è tante tematiche chì autorizeghjanu scambii ricchi in giru à circatori, filosofi è attori.
Méditerraniu d’origine è di cunvinzione, Paul Valery sustenia chì u Mediterraniu, spaziu di pensamentu apertu è dinamicu, hà una funzione civilisatrice chì deve esse mantenuta. I pulitologhi, ecunumisti è suciologhi sò oghje sempre di più numerosi à truvà in i so scritti argumenti novi per oppone à a teuria di a scossa di e civilisazione, una visione glubale è duratoghja di “a sperienza mediterrania” chì s’alluntana di a fatalità di i cunflitti. Aperta nantu à i pussibili tutti, zona cunfine è di cumunicazion, stu mare internu multiplicheghja i paradossi chì definiscenu dinù sta “fermentazione di i pensamenti”.
Plurale è muvente cum’è l’estru mediterraniu chì a definisce, sta catetra vole incuragisce scambii novi, di lingue, di tradizione è di sapè ; cuntribuisce à a difesa d’una lascita « umanista », inseme vivu d’una sucetà di a cunniscenza, stabilitu nantu à a cumplesssità di i raporti trà pensamentu è azzione. Ci participeghjanu intelletuali mediterranii famosi per aiutà ci à ridefinisce a diversità è u dinamisimu di i patrimonii intelletuali, artistichi è suciali chì da l’Antichità più alta anu fattu di u Mediterraniu un spaziu di circulazione è di rinnovu di i sapè.
A prima Catetra di l’Università si hè chjamata “Sviluppu di i Territorii è Innuvazione”. Oghje ch’elle diventanu prublematiche primurose assai l’occupazione è l’assestu di u spaziu in Corsica, L’Università di Corsica hà vulsutu purtà una cuntribuzione à a riflessione di pettu à u paisaghju, à l’architettura è à l’urbanisimu. Pensà di modu equilibratu a relazione sucetà/ Ambiu, pigliendu in contu à tempu e dimensione economiche, tecnologiche è simboliche di l’ambiu umanu, inghjennà un dialogu trà cuncettu teoricu è praticu di terrenu, eccu l’ambizione doppia di sta Catetra.
A rispunsabilità scentifica di sta Catetra hè stata data à un circatore d’altu livellu internaziunale, u geografu, orientalistu è filosofu Augustin Berque, direttore di studii à a Scola di L’Alti Studii Suciali è circadore assuciatu à a Scola Naziunale Superiore d’Architettura Parigi-La Vilette.
L’Écunumia Suciale è Sulidaria si tene una parte capitale in l’ecunumie cuntempurane. In Corsica, cum’è in Francia, a so cuntribuzione à u PIB hè stimata trà 8% è 10%. Sò ritenuti i listessi percentuali per valutà u so pesu ind’è l’impiegu salariatu naziunale è territuriale. In parechji settori d’attività, l’organisazione di l’ESS participeghjanu di modu attivu à sudisfà i bisogni. L’ESS ùn s’oppone mancu à pena à l’attori publichi è privati ma cumpletta e so azzione è cuntribuisce à u megliu stà di e pupulazione. Per via di l’ESS, perfurmenza economica è ligame suciale sò di novu accuppiati. Ma sta doppia utilità economica è suciale ùn hè abbastanza cunnisciuta è ricunnisciuta, per via di quessa, hè stata creata una catetra « Sulidarità è innuvazione ».
In u quatru d’una pulitica scentifica cumuna, l’Università di Corsica è l’Inserm (Institutu Naziunale di a Salute è di a Ricerca Medicale) anu messu in ballu da u 2014 una catetra mista “Ricerca nantu à e malatie infezziose d’origine virale cun avvicinanze genetiche è epidemiologiche in un cuntestu isulanu”.
Malgratu i prugressi recenti, e malatie infezziose fermanu sempre un prublema maiò in salute publica. U prugramma di ricerca permetterà di studià a variabilità genetica di l’agenti patogeni cunghjucata à quella di e pupulazione umane in u quatru di studii epidemologichi nantu à e malatie infezziose. Ste ricerche sò impurtante assai pè una capiscitura più bona di a relazione cumplessa Ospite-patogenu è pè u sviluppu di l’arnesi di surveglienza è di cuntrollu di sparghjera di l’epidemie.
