Incontri maiò

In un quatru eccezziunale, l’Institutu di Studii Scentifichi di Carghjese (UMS 820 – Università di Corsica / CNRS / Università di Nizza) accoglie tuttu l’annu incontri scentifichi d’altu livellu. L’incontri scentifichi chì si tenenu in Carghjese  sò spessu stati à l’origine di scuperte maiò in fisica  è altre discipline vicine. Ogni annu si tenenu una trentina d’incontri chì portanu da 1 500 à 2 000 participanti di u mondu sanu.

L’IESC apre e so porte à tutte e discipline scentifiche : scenze di a vita è di a salute, fisica, matematiche è ingenieria, scenze economiche, umane è suciale, scenze di a terra è di l’ambiu, scenze di i materiali…

Forte di a so pluridisciplinarità, l’Università di Corsica organiseghja di modu regulare culloqui di dimensione naziunale è internaziunale chì riuniscenu circatori di u mondu sanu. St’incontri sò l’occasione di cunferenze pieniarie è di stonde di scambii, duv’è l’attori isulani sò invitati à piglià a parolla. Dinù membre di rete parechje, L’Università di Corsica ne riceve l’appuntamenti annuali.

Qualchì esempiu d’incontru organizatu da l’Università di Corsica st’ultimi anni :

« Nazione, naziunalisimi, naziunalità, minurità » « A prutezzione custituziunale di u dirittu di a pruprietà in Francia, in Italia è in Tunisia » « Ritornu di i territorii, rinnovu di a mesulugia » « A prima guerra mundiale vista da u Mediterraniu : ripresentazione è cuntradizioni » « Storia di l’educazione à l’indentru è à l’infora di a scola » « E scenze di l’infurmazione è i so impegni geopulitichi » « Pasquale Paoli, a rivuluzione Corsa è Napuleone Bonaparte : presenza di u mitu di Napuleone è valurisazione culturale è economica » ,  « A cultura di u vinu in u Mediterraniu » « L’aspetti ghjuridichi di l’inundazione », 14esime ghjurnate di furmazione di a Rete di i Centri Cumuni di Microscupia, terzu workshop QATEM « Quantitative approches in Tourism Economics and Management », 23esimu Incontru francofonu nantu à a Logica Fosca è e so appiicazione, 7esimu colloquiu POLYMNIA, Cungressu internaziunale di a Rete Francofona di Suciolinguistica 2013…

Originarie di u partenariatu chì leia l’Università di Corsica è u CNRS, incontri trà liceani è circatori CNRS– Università di Corsica sò pruposte da u 2008 in Corti. Parechje centinaie di liceani venuti da  varii stabilimenti isulani sò invitati à l’Università pè participà à st’evenimentu.

Sò incuragiti à  appruprià si tematiche cum’è i parasiti, a simulazione di mudelli nantu à l’ordinatore, e rete suciale, e cunsequenze di a muta tecnologica nantu à a cultura  è u sapè, u sviluppu duratoghju, l’interessu di i sundasgi, etc. Anu dinù u privilegiu d’assiste à interventi di circatori famosi cum’è u sociologu Edgard Morin o u Criptologu Jacques Stern.

Durente isse ghjurnate, l’Università diventa più ch’è mai un spaziu di scambii, di scuperta è di spressione libera in giru à fenomeni maiò chì reguleghjanu a sucetà o puru chì puderianu  definisce ne i cuntorni futuri…

In u 2005 si hè tenuta in Corti a prima sessione di a Facultà Mundiale di l’Acqua. Sta Facultà, creata da Riccardo Petrella in u 2002 è custituita da una rete internaziunale di circatori spezialisti di l’acqua cum’è «  bè cumunu di l’umanità ». A facultà hè un locu di spartera di e cunniscenze è di barattu di e sperienze chì mira a messa in cumunu  di pratiche tante è di visione nuvatrice in u mondu chì cuntribuiscenu à u megliu campà inseme à livellu lucale.

A Facultà mundiale di l’acqua si tene cum’è filusufia a prumuzione di una visione glubale è demucratica di a gestione di l’acqua, patrimoniu di l’umanità è simbulu di u bè cumunu cun trè  principii :

• L’acqua bona deve esse accessibile à tutti
• L’acqua hè un bè cumunu publicu
• L’acqua deve fà l’ogettu d’una gestione duratoghja

3 altre sessione sò state pruposte in u 2006, 2007 è 2010.