Hè impignata mondi l’Università di Corsica in u sviluppu sucioecunomicu di u so tarritoriu. Hè un punteddu strategicu di u stabilimentu.
St’impegnu si faci incù u sviluppu di piattaformi tecnulogichi in leia incù i settori prufiziunali (STELLA MARE par asempiu, chì t’hà scopi scentifichi propiu in leia incù i scopi ecunomichi di l’acquacultori è i piscadori isulani) o incù l’apartura di un Fab Lab criatu pà facilità, incù attrazzi numerichi, a pruduzzioni ecunomica, in particulari in u mondu di l’artigianatu.
U rinforzu di i leii incù u mondu sucioprufiziunali si ritrova dinò in a so pruposta di furmazioni, l’azzioni di a Fundazioni di l’Università, a criazioni di servizii didicati à l’inserzioni prufiziunali di i studianti o in u sviluppu di un spiritu imprisariali longu à u cursus universitariu.
