Imprisariatu

Incuraghjiscia l’imprisariatu.

Incù furmazioni spicifichi è l’urganizazioni di cuncursi, l’Università di Corsica palesa u so intaressu pà l’imprisariatu studiantinu dapoi un beddu pezzu. Incù a criazioni di u Polu PÉPITE Corse in u 2014, l’Università di Corsica hà rinfurzatu a so ambizioni in stu duminiu incù a missa in anda di un statutu di studianti imprisariatu è a criazioni di u diplomu studianti imprisariatu. Hè cusì chì a Corsica diventa un tarritoriu di spirimintazioni di prughjetta innuvativi à u liveddu suciali, tecnulogicu, ecunomicu…

Pépite Corse.

A Corsica hè stata labellizata in u 2014 Polu regiunali PÉPITE (pà Polu Studiantinu Pà l’Innuvazioni, u Trasferimrntu è l’Imprisariatu), pà u Ministeru di l’Insignamentu Superiori è di a Ricerca. PÉPITE Corse hè purtatu da l’Università è i so partinarii istituziunali, prufiziunali, finanzarii.

PÉPITE Corse ùn faci solu a furmazioni di l’imprisarii, t’hà com’è scopu dinò di sviluppà di modu largu a cultura imprisariali à i studianti. Stu scopu si materializa incù una sinergia trà l’attori isulani (istituziunali, urganisimi prufiziunali, strutturi di seguitu, finanzadori) è a strutturazioni d’azzioni è furmazioni in leia incù l’imprisariatu, com’è u Diplomu « Studianti Imprisariu » prisentatu in u paragrafu chì veni.

I studianti, chì poni binifizià di un statutu spicificu « studianti imprisariu », sò accumpagnati in u so prughjettu via spazii di coworking à u Palazzu Naziunale di l’Università di Corsica è in Bastia, a business nursery di a Scola di Management in Bastia, l’incubatori Inizià, un dispusitivu di prova d’attività ecunomica o ancu incù cunsigli è azzioni di l’Ordini di i Sperti Cuntabili.

PÉPITE Corse parmetti a missa in anda di un locu d’accessu unicu è identificatu chì informa è avvia i studianti versu i strutturi i più adattati à u so prughjettu.

Furmazioni didicati.

Sò numarosi i furmazioni di l’Università di Corsica chì t’ani ori di cursu didicati à u sviluppu di a cultura imprisariali è à l’aspetti pratichi di a missa in opara di prughjetta cusì. Certi diplomi sò ancu spicializati à nantu à sti prublematichi.

U Diplomu di stabilimentu “Studianti-Imprisariu” appronta à a ripresa è à a criazioni d’impresa. Riponi à nantu à una pidagugia arringuersciata, vali à dì ch’idda parti da u prughjettu di u studianti è li si pruponini insignamenta in raportu incù i so bisogna. Si pò trattà di a maistria ghjuridica, amministrativa è cuntebili di un’urganizazioni o ancu l’imparera di i tecnichi di management di a cumunicazioni, di i novi tecnulugii di l’infurmazioni

U master “Manager imprisariu” t’hà com’è scopu di sviluppà cumpitenzi chì u tarritoriu abbisogna. D’altrondi hè porsu in partinariatu incù 10 impresi isulani chì accumpagnani i studianti longu à l’annu. Stu diplomu voli furmà i manager imprisarii d’altu liveddu, à cumpitenzi trasversali, chì poni mischjà a cultura scentifica è u spiritu manageriali, à u serviziu di u sviluppu è di l’innuvazioni di l’impresi corsi.

> Pà sapè ni di più à nantu à stu diplomu

Cuncursi è bursi pà sviluppà a vulintà d’intraprenda.

Dapoi 15 anni, uni beddi pochi di cuncursi ani parmissu à i studianti d’imaginà prughjetta à prò di l’ambienti, di a sucità, di u patrimoniu, ecc. Un premiu di l’imprisariatu studiantinu, “U Premiu”, hè statu criatu in u 2013 da a Fundazioni di l’Università di Corsica. Parmetti par via di u sustegnu rinnuvillatu di i partinarii di a Fundazioni, d’aiutà i studianti à strutturà è à sviluppà a so idea innuvativa d’attività strategica pà u sviluppu tarrituriali. I prughjetta selezziunati si spartini 8 000 euri.

Frà i prughjetta premiati : HandiCorsica (purtatu da Laura Humphrey, un’agenza di viaghju assuciativa in linea didicata à i parsoni andicapati mutori in Corsica) ; ICARE Project (purtatu da Jérémy Neyrou, un anneddu d’identificazioni senza cuntattu, chì rimpiazzarà i chjavi di a vittura, di a casa, ecc.).

Un antru asempiu di cuncursu : u Challenge Innuvazioni. Criatu in u 2014, stu cuncursu d’idei innuvatrici faci mova duranti 3 ghjorna una centina di studianti in ghjiru à prughjetta in u duminiu di u numericu (appiicazioni, mobili, ughjetti cunnessi, rubotica, ecc.). I squadri sò accumpagnati longu à u cuncursu da prufiziunali, sperti, coach è cap’impresi chì t’ani a spirienza in u duminiu di u numericu.