L’Università di Corsica s’arrimba à nantu à un patrimoniu custruttu di qualità chì si stendi à nantu à 53 000m² subratuttu in Corti ma dinò in u rughjonu bastiacciu, u rughjonu aiaccinu è in Carghjese. In Corti, i bastimenta di l’Università di Corsica si trovani à nantu à dui campi (Mariani è Grimaldi).
A maiori parti di l’infrastrutturi di l’Università di Corsica si trovani in Corti.
U Palazzu Naziunale, sedia di l’istituzioni di a Nazioni corsa da u 1755 à u 1768, hà accoltu duranti parichji anni a Prisidenza di l’Università di Corsica. Oghji, in drintu, ci hè un spaziu di coworking, a Fundazioni è u Fab Lab di l’Università.
U Campu Mariani hè u prima à apra i so porti in u 1981. Accoddi parichji facultà, scoli, istituti è u Spaziu universitariu Natale Luciani, a sala di spitaculu di l’Università di Corsica. Vicinu vicinu à stu campu, un bastimentu novu didicatu à a Ricerca in scenzi umani è suciali hè in traccia di custrucia si.
In u Campu Grimaldi ci hè una parti di i cumpunenti pidagogichi è di ricerca di l’Università. A Prisidenza, una bibbiuteca di 4500m² è a maiori parti di i servizii amministrativi si trovani quì, in drintu à stu bastimentu Desanti, inauguratu in u 2016.
A piattaforma STELLA MARE di l’Università di Corsica è di u CNRS si trova in Biguglia, à u sud di Bastia, trà u stagnu di Chjurlinu è u mari Tarraniu. Travadda in u duminiu di l’ingegneria eculogica marina è litturali in Miditarraniu. Ricerca, trasferimentu di tecnulugii à i prufiziunali di u mari, sensibilizazioni è seguitu : i poli d’attività di STELLA MARE sò diversi quant’è cumplemintarii.
In u Borgu, ci hè unu di i siti di l’ESPE, Scola Superiori di u Prufissuratu è di l’Aducazioni.
In Vignola, vicinu à Aiacciu, u Centru di Ricerca scentifica Georges Peri accoddi i piattaformi MYRTE è PAGLIA ORBA di l’Università di Corsica. Mondi interdisciplinariu, stu centru hè didicatu à u studiu è à a mudelizazioni di i sistema fisichi ambientali. I tema di ricerca tocchi sò l’energii à long’andà, l’acqua, a biumassa, a gestioni di i risichi, i fluidi geufisichi, l’idrobiulugia è à l’acustica. Hè un locu di rifarenza mundiali pà l’ecunumia eculogica.
In Aiacciu, ci hè unu di i siti di l’ESPE, Scola Superiori di u Prufissuratu è di l’Aducazioni.
L’Istitutu di studii scentifichi di Carghjese hè una struttura purtata da l’Università di Corsica, u CNRS è l’Università Nizza Sophia Antipolis. Si trova in taddu di mari à l’intrata di Carghjese, à 50 chilometri à u nordu d’Aiacciu. In stu locu, longu à l’annu, ci sò cunfarenzi internaziunali urganizati da istituzioni maiori com’è a NASA, u CEA, u CERN è scoli tematichi à carattaru scentificu
