Dopu à avè cunfurtatu i so metudi scentifichi dapoi una decina d’anni, valurizeghja a piattaforma marina di l’Università di Corsica è di u CNRS sporta u so sapè fà è i so risultati al di là di e fruntiere isulane. U so scopu : prupone soluzione pratiche di pettu à l’affundamentu di a biodiversità.
Hè à tempu un’avanzata nant’à e perspettive aperte da a ricerca è una ricunniscenza di i travagli scentifichi messi in ballu à Stella Mare. Nata in u 2011, sta piattaforma di l’Università di Corsica è di u CNRS, spezializata in ingenieria eculogica marina è liturale è forte di a so sperienza nant’à a gestione di e risorze naturale, sporta oramai u so sapè fà al di là di e fruntiere isulane.
« A maturità scentifica di i nostril travagli, nant’à a maestria di a ripruduzzione di una decina di spezie marine è a risturazione eculogica di e pupulazione inde l’ambiu naturale ci permette oghje di entre inde una fasa nova di u nostru prugettu, spieca u prufessore Antoine Aiello, direttore di Stella Mare. Si tratta di valurizà i nostri risultati à u livellu internaziunale per prupone suluzione cuncrete di pettu à l’affundamentu di a biodiversità, sustenendu u rinnovu di a pruvista di certe spezie à u livellu di u Mediterraniu. » S’avvia u trasferimentu di i metudi è di l’arnesi necessarii à u ristoru di e pupulazione inde e zone sgradate o distabilizate da l’omu nant’à u listessu filu chè i scopi di u laburatoriu.
Inde un primu tempu, sò cuncernate duie spezie da sti travagli : i zinzi (Paracentrotus lividus) è l’ostrice piatta europea (Ostrea edulis).
In fatti, hà sullicitatu u Parcu marittimu dipartimentale Estérel-Théoule, inde l’Alpe Marittime, e squadre di Stella Mare per mette in ballu una sperimentazione incù u scopu primu di pruvà i prucedimenti tecnichi di a piattaforma. « Si sò rese sopra locu e nostre squadre per prilevà genitori di zinzi, preciseghja Alexandre Vela, duttore in biolugia è ingeniere à Stella Mare. U scopu hè di assicurà a so ripruduzzione è u so allevu in i nostri laburatorii per traspurtà li dopu inde u parcu di Théoule-sur-Mer, è validà i nostri metudi sperimentali di ristoru. »
Ùn hè micca u solu stu spaziu marittimu di 353 ettari à esse in core à unepoche di valutazione ambientale è di sperimentazione d’ingenieria eculogica. Hà dinù cunvenziunatu Stella Mare cù a cuuperativa di l’ostreicultori di u stagnu di Thau, a più grande laguna d’acqua di mare di a regione Occitania. E squadre di a piattaforma, chì travaglianu dapoi un pezzu nant’à a dumesticazione di l’ostrice piatta assicureghjanu a pruduzzione di sta spezia inde i bacini di Stella Mare per permette a pruvista in ghjuvenili di sta risorza per l’ostreicultori. Una dimarchja chì si scrive inde un scopu di dinamisazione di l’ecunumia turchina. « Pruvemu a nostra capacità propria à arrecà suluzione pratiche per priservà e spezie à u livellu di u Mediterraniu è, inde u listessu tempu, permette a durabilità di l’attività ecunomiche chì ci si raportanu, avanza Jean-José Filippi, duttore in biolugia è ingeniere à Stella Mare. Sustene stu metudu u nostru scopu in quantu à u trasferimentu di tecnulugia ver’di i prufeziunali. »
Ùn si pianta quì a valurisazione di i risultati scentifichi di u laburatoriu.
Ci sò dinù scambii cù u guvernu di Malta per pone i cuntorni di una sperimentazione di ristoru eculogicu di zinzi nant’à u liturale maltese. Hè sullicitata dinù a spertizia di i cercadori di a piattaforma di l’Università di Corsica è di u CNRS, per via di a reta di e riserve naturale, in Turchia, induv’elli ci seranu scambii scentifichi per u veranu di u 2024. Sò dinù impegnati i scentifichi di Stella Mare inde u prugettu ambientale d’Accademia di u mare ch’ellu hà da accoglie u Principatu di Monacu da quì à l’estate di u 2024 cù u sustegnu di parechji partinarii internaziunali cum’è l’Università di u Quebeccu, in Rimouski, è l’Istitutu di i Studii diplumatichi di Djiboutì. Hà da tuccà soprattuttu l’imbusca e gran’ tematiche ambientale, in particulare a pesca è a soprapresca, incù un fondu di scambiamentu climaticu, chì anu un effettu nant’à l’abitati è u rinnovu di e spezie.
« A prisenza di Stella Mare à st’evenimenti hè un signale di ricunniscenza di i nostri travagli, stima Jean-José Filippi. D’altronde, hà aduttatu u Parlamentu europeu, di ferraghju 2024, un regulamentu per impone à i 27 paesi di l’Unione di mette in ballu, da quì à u 2030, misure di ristoru nant’à 30 % di l’ecusistemi sgradati. À u so livellu, arreca Stella Mare soluzione per cuntinuà à priservà a biodiversità marina è riesce e sfide eculogiche d’oghje è di dumane. »
Ghjugnu 2024
