Ritruveti l'attualità di i studii è di a vita studiantina à l'Università di Corsica à nantu à Studià, u purtonu di i studianti è di i futuri studianti
https://studia.universita.corsicaPà cuntribuiscia à u sviluppu parsunali di i studianti, l’Università di Corsica hà una pruposta culturali è spurtiva di una grandi diversità dopu à i cursi : cuncerta, teatru, scontri spurtivi, manifestazioni, ecc. L’initiazivi parsunali o assuciativi sò favurizati è poni essa finanzati da l’Università ; sò ricunnisciuti com’è una vera cumpitenza, valurizata in u parcursu universitariu di u studianti.
Si passa sempri qualcosa à l’Università di Corsica !
À a riintrata, incù « Allegria », l’Università di Corsica pruponi una stonda d’accolta pà i so novi studianti. Fatti incù a vulintà di sparta è incù mondi cunvivialità, sti ghjurnati sò l’uccasioni di scopra di manera urighjinali l’attività è servizii chì l’Università pruponi.
Tuttu l’annu, i campi universitarii sò animati da varii manifestazioni. I nosci cunfarenzi è ghjurnati spiciali toccani tematichi propiu diversi : ambienti, drittu, litaratura, sucità, geupulitica, novi tecnulugii… È pà diverta si, pudeti mova à prughjizzioni di filma studiantini, participà à caffè di filusufia, à ghjustri spurtivi…
Duranti sti stondi, a pluridisciplinarità di l’Università di Corsica si sprimi quant’è mai !
È s’è, pà cuntribuiscia ci, participeti à i sfarenti cuncursi urganizati ugni annu da l’Università ?
Attività sittimanali, surtiti di modu rigulari in aria aparta è manifestazioni eccezziunali longu à l’annu, tuttu hè accunciatu pà favurizà a pratica spurtiva di i studianti di l’Università di Corsica.
Incù 40% di u nosciu effettivu chì pratichighja à un’attività fisica, vali à dì à l’ingrossu 1 800 studianti, l’Università di Corsica faci parti di i 5 Università i più spurtivi di Francia !
Frà a vintina d’attività sittimanali : baddu, fitness, musculazioni, ballò, natazioni, bossa, baseball, zumba…
Trà mari è muntagna, l’Università di Corsica binifizighja di un tarrenu di ghjocu eccezziunali pà i spurtivi d’altu liveddu. Ghjirandulati, surtiti pà fà appichjera, kayak, ecc. sò pruposti di modu rigulari a duminicata.
Primurosa assai di i so patrimonii è di a vita in sucità, l’Università di Corsica voli essa unu di i loca di visibilità di a cultura com’è no a campemu in Corsica, trà arradichera è universalità.
Tuttu l’annu, u teatru, i mostri, i cuncerta, i dibattiti dani u ritimu incù parichji appuntamenti pruposti à tutti ugni sittimana, è di gratisi pà i studianti. Andeti puri in u Spaziu universitariu Natale Luciani, pà ritruvà l’artisti famosi è i talenti primaticci di a cultura corsa. L’architittura di a sala di spitaculu di l’Università di Corsica, di un centu di piazzi, parmetti di squassà a fruntiera trà l’artistu è u spitatori pà una spirianza intimista unica. A bibbiuteca universitaria accodddi idda dinò tutta l’annata mostri è scontri in un spaziu spicificu è apartu à tutti.
20 atteddi culturali sittimanali, inquadrati da prufiziunali, parmettini dinò à i studianti di cumincià l’imparera di diversi sprissioni : musica, baddu, teatru, scrittura litararia, cantu, arti plastichi è visuali, stilisimu…
Infini, diversi dispusitivi parmettini di sustena è d’incuraghjiscia a sprissioni artistica. U gruppu “A Pasqualina” illustra binissimu sta vulintà. Cumposta di studianti di l’Università di Corsica, scrivi, cumponi è canta i so canzoni chì sò, d’obligu, urighjinali.
Unu di i punteddi di u dinamisimu universitariu hè a vita assuciativa chì dà u ritimu à l’attività di u campu. L’Università di Corsica conta più di 20 associi è un polu hè dedicatu à u seguitu di i so prughjetta. À mezu à u Campu Mariani, a Casa studientina, gestita da u CROUS di Corsica, parmetti à l’associa di binifizià di un locu di travaddu, d’accolta è di scambiu. In drintu à sta casa, ci sò ancu mostri chì sò urganizati è pruposti di modu rigulari.
Veru ribombu di a vita assuciativa, Radio Nebbia Campus Corte hè a radiu fatta da i studianti, pà i studianti. Pruponi una prugrammazioni varia chì laca una bedda piazza à u dibattitu, à l’associa è à a cultura. Frà l’emissioni i più ascultati, ci hè « U toc show », sò studianti chì dibattini ugni sittimana di l’attualità di manera libara è ancu scherzosa. Si pò ascultà à nantu à l’appiicazioni smartfonu di l’Università di Corsica è in FM in Corti à nantu à u 90.6.
L’associu ESN Corsica, membru di a reta Erasmus Student Network, idda, si movi, longu à l’annu pà crià scambii trà i studianti isulani è quiddi di u mondu sanu. À l’ingrossu 60 naziunalità sò d’infatti raprisintati ugni annu à nantu à i nosci campi. Vali à dì quasgi 60 culturi da scopra quandu ci sò l’attività è i sirati urganizati da ESN Corsica.
I prughjetta chì t’ani un carattaru culturali, spurtivu, ambientali, umanitariu… sò sustinuti da sfarenti dispusitivi chì parmettini à l’associa di binifizià di un seguitu è d’aiuti finanziarii.
