Per via di cinque furmazione addirizzate à l’insignanti cercadori, à l’intraprese, à l’amministrazione è à a sucetà civile, vole vulgarizà l’Università di Corsica l’usu di l’arnesi digitali per accumpagnà a trasfurmazione numerica.

Face parte di l’imbusche maiò, à i tempi di l’intelligenzia artifiziale è di a cultura di a data : accumpagnà a sucetà inde a so trasfurmazione numerica. Ùn a si francanu a ricerca è l’insignamentu da sta rivuluzione nova chì cambia di manera prufonda e manere di travaglià, di pensà, d’analizà è di creà. Si scrive propiu u Prugramma d’Investimentu d’Avvene UNITI * (UNIversità : per a Trasfurmazione à u serviziu di i territorii Isulani di u Mediterraniu) purtatu da l’Università di Corsica, inde sta dinamica di trasfurmazione è di mudernisazione per via di u numericu. Inde stu quadru, si hè ingagiatu l’Istitutu naziunale superiore di u prufessuratu è di l’educazione (INSPE) di Corsica per accumpagnà sta dimarchja. « U nostru scopu hè di dà a maestria piena di st’arnesi novi à l’insignanti cercadori ma dinù à un publicu esternu », spieca Bastien Poggi, maestru di cunferenze à l’INSPE è vice presidente di u cunsigliu d’amministrazione di l’Università di Corsica.

Per via di 5 furmazione di una sessantina d’ore, pigliate in carica sane sane è messe in ballu inde u quadru di u PIA UNITI, vole demucratizà l’INSPE di Corsica l’usu di st’arnesi digitali novi.

           

Duie furmazione qualificante, chì anu da esse uperaziunale toccu u mese di nuvembre di u 2024, sò à distinazione di l’insignanti cercadori. Avviate ver’di a maestria di l’intelligenzia artifiziale, in scenze fundamentale è appiecate, ma dinù in scenze umane è suciale, anu per scopu di pruiettà i persunali universitarii inde l’insignamentu è a ricerca di dumane. « À spessu, hè vista l’intelligenzia artifiziale cum’è una minaccia, ne vulemu fà un’opportunità per ch’elli possinu esse di più efficaci l’insignanti è avè di più cunfortu, accerta Bastien Poggi. In corte parolle, l’idea hè di mette u numericu à u serviziu di i travagli universitarii. » À mezu andà, permetteranu ste furmazione d’integrà una vera cultura di a « data » inde l’attività di a ricerca, in particulare per via di parechji algoritimi di strazzione di e cunniscenze.

Un diploma universitariu (DU) à distinazione di l’insignanti, è di a sucetà civile, chì serà messu in ballu per u veranu di u 2025, si scrive inde a listessa dimarchja, chì cerca à prumove l’accessu à i sapè universitarii per via di u numericu. Si hè datu duie missione stu dispusitivu : furmà prufessiunali qualificati in u duminiu di a vulgarisazione scentifica, è inizià li à un’accustera participativa di a ricerca scentifica, cunforma à i bisogni di a sucetà è favurizendu una cullaburazione trà i scentifichi è i citadini.

« Anu dinù per vucazione ste furmazione à caratterizà a firma di u nostru stabilimentu, spieca Bastien Poggi. U digitale dà à a Corsica l’opportunità di sguassà certe custrette cagiunate da l’isulanità. Hà propiu un rollu à ghjucà inde stu duminiu l’Università di Corsica per mette in ballu una dinamica d’innuvazione. » Inde stu spiritu, vole dinù prupone l’Università di Corsica, mentre l’annu universitariu, furmazione specifiche dedicate à i prufessiunali per « infonde una cultura digitale adattata à i bisogni è à e specificità di a sucetà isulana. »

Duie altre furmazione, chì anu da prupone dinù elle cuntenuti in linea, s’anu da addirizzà di manera più specifica à l’intraprese è à l’amministrazione per aiutà le à adattà si à i scambiamenti cagiunati da a trasfurmazione numerica. Si hà da trattà di accumpagnà le per turnà à pensà, mudernizà è dinamizà u so funziunamentu, cù l’usu di st’arnesi novi. « À mezu o longu andà, hà da cuncernà l’emergenza di ste tecnulugie numeriche tutte l’attività suciale è ecunomiche di a nostra sucetà, cunsidereghja Bastien Poggi. Seranu di fatti penalizati quelli chì ùn anu micca a maestria di st’arnesi, o puru marginalizati. Hè per quessa ch’è no duvimu esse à l’iniziativa inde stu duminiu, per caccià i più belli frutti di ciò ch’elli ci ponu arrecà à tutti u digitale è l’intelligenzia artifiziale. »

 

E furmazione :

• Ammaestrà l’IA in Scenze Fundamentale è Appiecate : furmazione qualificante universitaria à distinazione di l’insignanti cercadori, 66 ore di corsi in prisenziale di nuvembre di u 2024, cù cuntenuti in linea.
• Ammaestrà l’IA in Scenze Umane è Suciale: furmazione qualificante universitaria à distinazione di l’insignanti cercadori, 66 ore di corsi in prisenziale di nuvembre di u 2024, cù cuntenuti in linea.
• Esse un attore di e scenze cù è per a sucetà : Diploma Universitariu à distinazione di l’insignanti è di a sucetà civile, 60 ore di corsi in prisenziale di marzu è d’aprile di u 2025, cù cuntenuti in linea.
• Mette in ballu una dinamica d’innuvazione inde l’amministrazione : Diploma universitariu à distinazione di i prufessiunali, 54 ore di corsi in prisenziale, dui ghjorni di corsi à settimana da ferraghju à aprile di u 2025, cù cuntenuti in linea.
• Mette in ballu una dinamica d’innuvazione inde l’intraprese : Diploma universitariu à distinazione di i prufessiunali, 54 ore di corsi in prisenziale, dui ghjorni di corsi à settimana da ferraghju à aprile di u 2025, cù cuntenuti in linea.

*U PIA UNITI (Pianu d’Investimentu d’Avvene UNIversità : per a Trasfurmazione à u serviziu di i territorii isulani di u Mediterraniu), purtatu da l’Università di Corsica, face parte di i 17 laureati di a seconda tappa di a chjama à prugetti « Eccellenze sott’à tutte e so forme » di l’Agenzia Naziunale di a Ricerca (ANR). Benefizieghja di un aiutu di u Statu à nome di Francia 2030.

Di più infurmazione nant’à u situ internet di l’INSPÉ https://inspe.universita.corsica/

 

Ottobre 2024