U PIA UNITI (UNIversità : per a Trasfurmazione à u serviziu di i territorii isulani di u Mediterraniu), purtatu da l’Università di Corsica, face parte di i 17 laureati di a seconda tappa di a chjama à prugetti « Excellences sous toutes ses formes » di l’Agenzia Naziunale di a Ricerca (ANR), inde u quadru di u PIA 4. Si busca un aiutu di u Statu, gestitu da l’Agenzia naziunale di a Ricerca à nome di « France 2030 », incù a riferenza ANR-22-EXES-0016.
Dutatu di 7,1 milioni d’eurò (per un costu tutale di 15,6 M€), s’arremba UNITI à una strategia custruita nant’à sei anni (2023-2028) chì hà per scopu di rinfurzà a firma di l’Università di Corsica nant’à e risorze naturale è culturale. S’arremba l’Università à e so cumpetenze scentifiche digià ricunnisciute è ci hà assuciatu di modu strettu i so partinarii da pudè lancià una dinamica di trasfurmazione di i territorii isulani di u Mediterraniu. In fatti, in più di l’impegnu di i so partinarii istituziunali (Cullettività di Corsica è Accademia di Corsica) è scentifichi (CNRS, INRAE è CIRAD), benefizieghja dinù l’Università di Corsica di l’accumpagnamentu di parechji attori (cullettività lucale, camere cunsularie, attori prufeziunali, culturali, assuciativi, Università membre di u RETI…)
Serve un’ambizione di eccellenza, cullaburativa è, in fine, megliurà a qualità di vita di e populazione, eccu i scopi ch’ella seguiteghja l’Università di Corsica per via di u prugramma UNITI. Interfaziu attivu trà i studienti, l’insignanti-cercadori è l’attori istituziunali è sucioecunomichi, vole mette in ballu l’Università una pulitica glubale di stabilimentu girata non solu ver’di u so territoriu ma dinù ver’di i territorii isulani di u Mediterraniu.
S’avvianu l’azzione di u prugramma in giru à dui puntelli strategichi, cumplettati da un puntellu trasversale :
Ripone dinù l’uriginalità di UNITI nant’à a custituzione di un Cumitatu d’Orientazione Strategicu (COS) custituitu da partinarii lucali è internaziunali accademichi, scentifichi, istituziunali è sucio-ecunomichi, chì facenu affaccà u so caratteru inclusivu maiò. Serà sperimentatu stu prugramma in leia stretta cù st’attori, inde una perspettiva di trasferimentu à favore di un sviluppu ragiunatu è duraticciu di i territorii isulani di u Mediterraniu è inde una dimarchja d’eccellenza, di visibilità è d’attrattività ver’di a cumunità scentifica internaziunale.
Hà per scopu UNITI di sincrunizà l’inseme di e scadenze cuntrattuale di l’Università di Corsica. Custituisce di fatti un quadru sperimentale chì hà da permette di produce, toccu u 2028-2029, un mudellu cunvenziunale specificu, da pudè cuurdunà l’obbiettivi è i mezi di l’inseme di i partinarii è di impegnà l’Università inde una traghjettoria perenna in quantu à a furmazione, a ricerca è u trasferimentu ver’di u territoriu.
LANCIAMENTU UFFICIALE
Si hè fatta luni u 22 di maghju di u 2023 a reunione di lanciamentu ufficiale di u prugramma UNITI, in Corti (Sala di i Cunsiglii, bastimentu Desanti) in prisenza di :
• Dominique Federici – Presidente di l’Università di Corsica Pasquale Paoli
• Lise Dumasy – Rispunsevule di l’azzione ExcellencES du PIA 4, ANR
• Jean-Philippe Agresti, Rettore di l’Accademia di Corsica
• Jean-François CUBELLS (raprisentante di u Presidente di l’Esecutivu di Corsica)
• Philippe Maroselli (raprisentante di u merre di Corti)
• Yann Froelicher, Cercadore è raprisentante di u CIRAD
• Aurélie Philippe, Delegata regiunale CNRS Pruvenzia è Corsica (in visiocunferenza)
• Stéphane Blanc, Direttore di l’Istitutu eculugia è ambiente di u CNRS (in visiocunferenza)
• Pascal Agostini, Direttore IMF Borgu, raprisentante di u presidente di a CCI di Corsica (in visiocunferenza)
• André Torre, Presidente INRAE Corsica (in visiocunferenza)
• Charles-Henri MOULIN, Cercadore di u CIRAD (in visiocunferenza)
Eranu prisenti dinù Vanina Pasqualini, Vice-presidente di a cummissione Furmazione di l’Università di Corsica, i rispunsevuli di i cumpunenti di furmazione è di l’unità di ricerca, è parechji rispunsevuli d’azzione di u PIA UNITI.
Hè stata sta ghjurnata l’uccasione di prisentà u PIA UNITI di manera glubale è ancu a so guvernanza, d’introduce dinù i sfarenti prugrammi per via di ogni rispunsevule è di urganizà i scambii cù i partinarii nant’à u so impegnu inde e so azzione diverse. Hà spostu l’ANR e mudalità di l’esecuzione è di u seguitu di u PIA UNITI. Hè stata messa in ballu dopu una visita di i laburatorii di ricerca.
