PUNTELLU 2 : Creà un Tourism’Lab in industria culturale

Ci serà una ipotesi per introduce stu puntellu : quella di a leia privilegiata trà u patrimoniu è u sviluppu lucale. Anu sviluppatu i Corsi, inde u so raportu di pettu à u territoriu isulanu, un inseme di sapè, d’usi, di pratiche è di raprisentazione inde a durata longa di u spaziu-tempu mediterraniu, à a ghjuntura di a natura è di a cultura, chì custituiscenu una risorza da permette à ogni pulitica di sviluppu di accuncià à tempu a Memoria è u Prugettu. Da ch’elli sianu ammaestrati i fenomeni di qualificazione territuriale (a « Marca » di a Corsica), indutti da a « messa in patrimoniu » di e tracce di u passatu, di i siti naturali, di i prudutti lucali… abbisognanu l’uperazione tappe sfarente, in partinariatu cù l’attori istituziunali. Trà pulitica di sviluppu sbrigliatu è santuarisazione, seguita stu puntellu l’obbiettivu di turnà à inventà un raportu à u territoriu, in particulare isulanu, inde e so cumpunente patrimuniale cum’è sucio-ecunomiche.   Si forma nant’à u tritticu interdisciplinariu : Furmà l’attori è urganizà un campus di i mistieri di u turisimu (Kallist’Ecole/PERFORMATOUR) ; Produce cuntenuti per via di a mubilisazione di u capitale culturale  (RIMeLAB) ; Pianificà una pulitica di valurisazione di a diversità linguistica (ATLAS).

Prugramma 4 ► Furmazione, pruduzzione è pianificazione

Si custruisce stu prugramma in giru à i quattru prugetti chì seguitanu :

• Furmà l’attori : Scola di valurisazione è di prumuzione di i patrimonii di Corsica (Kallist’École). Permette à e cumpunente di ricerca è di pedagugia di cullaburà à u muntame di furmazione mudularie da pudè capitalizà nant’à e so sperienze respettive. À u crucivia di parechji settori d’attività, manca di manera crudele u turisimu in Corsica d’attori furmati, in particulare di pettu à l’imbusche patrimuniale, culturali quant’è naturali di u territoriu isulanu è mediterraneu. Si scumparte in trè tappe stu prugettu : (i) Fà un studiu diagnosticu per identificà i bisogni in quantu à i prufili è e cumpetenze di l’attori di u turisimu in Corsica ; (ii) Identificà è selezziunà l’inseme di i moduli di furmazione chì esistenu è chì mancanu ; (iii) Strutturà a carta di furmazione di a Scola di valurisazione è di prumuzione di i patrimonii di Corsica (Kallist’École) cù a cuncipitura è u sviluppu di un spaziu numericu di messa in reta di l’attori.
• Furmà l’attori : Campus di i Mistieri di u turisimu (Performatour). Hà per scopu u prugettu PERFORMATOUR di sviluppà l’arnesi di perfurmanza privati è publichi da ch’ella fessi caccià u più valore pussibule. Al di là di un diagnosticu di a situazione è di un’articulazione necessaria di i prufeziunali inde u quadru di clusters perfurmanti, sbuccherà sta fasa nant’à a creazione di dui arnesi strutturanti : (i) un Campus di i Mistieri di u turisimu chì permetti di alzà u livellu di cumpetenze di i prufeziunali di u territoriu ; (ii) un Lab turisimu chì hà da rinfurzà per via di a ricerca pluridisciplinaria a cunniscenza di e strategie di l’attori è di l’attese di a populazione lucale.
• Produce cuntenuti per via di a mubilisazione di u capitale culturale : Creà un RIMe Lab (Raprisentà l’Identità Mediterranie attraversu l’arte), mettendu in ballu un prutucollu di ricerca-creazione, chì permetti l’acquistu artisticu d’analisi sucio-antropologiche di raprisentazione cullettive in u Mediterraniu.
• Appiecazione è Trasferimentu per l’Accunciamentu Suciolinguisticu (ATLAS). Accumpagnà l’attori publichi è privati in a messa in ballu di a pianificazione linguistica vutata da l’Assemblea di Corsica in giru à l’azzione in i duminii di a cursufunisazione di i maiò, a cultura, i media, i sporti è i passatempu, i servizii publichi è l’intraprese. Sò dinù vive d’altre lingue nant’à u territoriu, chjama sta diversità linguistica di u territoriu liata à a so storia è à e so attività, un’intervenzione suciolinguistica chì integra a sucetà in i prucedimenti  di scienza è d’innuvazione, elaburendu una guvernanza linguistica nova cù l’attori publichi è privati. Vole dà u prugettu ATLAS un putere d’agisce per via di a sperimentazione di un monitoring suciolinguisticu chì prupunissi un’analisi spartuta di i cuntesti è di i bisogni trattendu si di a furmazione quant’è di a messa in ballu di a nurmalisazione linguistica.

Bernard GIUDICELLI – Rispunsevule di a messa in ballu è di i partinariati di u PIA UNITI
giudicelli_b@univ-corse.fr | Tél. : 04 95 34 82 37
www.universita.corsica

• Scaricà a ducumentazione
• Leghje u focus in francese
• Leghje u focus in corsu
• Cartulare di candidatura