À u serviziu di u tarritoriu

Interlucutori didicati.

A pruposta di furmazioni di l’Università di Corsica hè pinsata, ben’intesa, pà risponda à i bisogna di u tarritoriu. Certi furmazioni sò d’altrondi unichi in Francia. Francata st’evidenza, l’Università s’hè ancu arricchita di strutturi è d’attrazzi spicifichi pà facilità i scambii trà l’istituzioni è l’attori sucioecunomichi isulani.

A Fundazione di l’Università di Corsica.

A Fundazione di l’Università di Corsica t’hà un doppiu scopu : quiddu di libarà i sinergii trà u mondu accademicu è u mondu sucioecunomicu è quiddu di cucustrucia incù l’attori sucioecunomichi prughjetta d’intaressu generali innuvativi, à altu valori aghjuntu pà u tarritoriu. Hà parmissu di slancià è di sviluppà parichji azzioni in 4 duminii priuritarii :

  • L’innuvazioni è a criatività
  • A diffusioni di u spiritu d’intraprenda
  • L’attrattività internaziunali è a prumuzioni di l’identità universitaria
  • U trasferimentu di i sapè è di i cumpitenzi di l’università versu u tarritoriu isulanu

Incù i so partinarii, hè impignata a Fundazioni dapoi parichji anni in azzioni liati à l’internaziunalizazioni di i furmazioni è di i carrieri incù a bursa Improving, à a prumuzioni di u spiritu d’impresa prupunindu u parcursu Custruì è una bursa didicata à i studianti imprisarii U Premiu, à l’innuvazioni è à a criatività sviluppendu atteddi didicati à u prucedimentu criativu è à u Design Thinking, una risidenza d’artistu designer Fabbrica Design, u Challenge Innuvazioni, un cuncursu d’idei innuvativi chì toccani u numericu, ecc.

Polu innuvazioni & sviluppu.

U Polu innuvazioni & sviluppu di l’Università di Corsica urganizighja l’azzioni, u funziunamentu è u spannamentu di i novi loca attrazzi ch’idda metti à u serviziu di u sviluppu è di l’innuvazioni tarrituriali. Si trova à u Palazzu Naziunale in Corti, in stu polu ci hè :

  • un Fab Lab
  • un spaziu di coworking è di risorsi pà l’imprisariatu
  • u polu tarrituriali PEPITE (Polu Studiantinu Pà l’Innuvazioni, u Trasferimentu è l’Imprisariatu)

U Polu pò custituiscia un’intrata pà l’attori sucioecunomichi chì volini travaddà incù l’Università. T’hà com’è scopu di sviluppà partinariati incù l’attori sucioecunomichi di u tarritoriu à nantu à i quistioni di pruduzzioni è d’innuvazioni suciali è/o tecnulogica. In leia stretta incù a Fundazione di l’Università di Corsica, cuurganizighja evenimenti chì toccani à l’imprisariatu, a ù design è à l’innuvazioni.

Fab Lab.

U Fab Lab Corti – Università di Corsica, à u crucivia di l’ecunumia numerica è di l’ecunumia cullaburatrici, hè à tempu un atteddu di fabricazioni è un locu di scambiu di cumpitenzi.

Parmetti di passà da un’idea à un prughjettu, è da un prughjettu à un ughjettu. In drintu ci sò apparechji à cummanda numerica (stampatrici 3D, mascina à cusgia, ricamatrici, plotter di taddu, taddu laser è fresatrici), attrazzi tradiziunali, kit d’elettronica, u seguitu di una squadra (tecnicu + designer chì poni furmà, aiutà, pruducia è cuncipiscia) è di tutta a cumunità di i maker pà avanzà. Hè apartu à tutti, prumovi u DIY (Do It Yourself) è l’open innuvazioni. Hè statu criatu pà favurizà l’ecunumia pruduttiva è innuvativi in u settori sigundariu in Corsica (artigianatu è industria).

Un purtonu internet didicatu à i partinarii prufiziunali.

L’Università di Corsica hà missu in linea un purtonu web didicatu à i partinarii prufiziunali : impresi, associ, imprisarii, istituzioni… U situ, omu ci pò andà à l’adrizzu https://pro.universita.corsica, racoddi tutti l’infurmazioni utili à nantu à l’accumpagnamentu chì l’Università pruponi pà ciò chì tocca à l’aiutu à l’innuvazioni, à u ricrutamentu, à a furmazioni cuntinua, à i servizii, ecc.

Parmetti di facilità l’accessu à l’infurmazioni pratichi è à i cuntatti ma dinò di prisintà i pussibilità di cullaburazioni incù l’Università di Corsica.