Hà per scopu st’azzione di rinfurzà a strategia di cuuperazione di a nostra istituzione cù l’università è l’attori di i territorii euro-mediterranei è isulani. Hè stata imaginata cum’è qualchì labellu chì testimunieghja di a vuluntà d’apertura di a nostra istituzione. Si trattà di assudà, d’accresce è d’animà a reta di e nostre cullaburazione inde una dimarchja di sustegnu à l’innuvazione per via di prugrammi purtati da e sfarente squadre, in un spiritu di sviluppu di e putenzialità di a nostra università à i territorii isulani è d’allarghera di e cumpetenze di e so forze vive.
Hà vucazione à rinfurzà a cuuperazione internaziunale, digià in core à parechji prugetti à l’Università di Corsica, in u duminii di a Furmazione è di a Ricerca. Dà di più sensu stu prugramma à l’animazione è à l’utilità di e rete internaziunale à e quale participeghja a nostra università, cum’è u RETI (Reta d’Eccellenza di i Territorii Isulani) è Téthys (Consortium di l’Università Euro-Mediterranie).
D’altronde, hè da cunsiderà l’avvicinamentu di pettu à d’altri prugrammi d’eccellenza cum’è l’iniziativa PRIMA, UNIMED, e rete d’università europee o puru i consortium d’appoghju à l’università franco-X, sempre incù u scopu di sviluppà è di allargà e rete, appiccendu a nostra università à l’altri attori di u spaziu euro-mediterraneu è isulanu. Vene in appoghju st’arnese, intitulatu di modu simbolicu ARTEMIDE, di u nome di a dea greca di a caccia, prutettrice di i camini è di i porti, anzituttu (ma micca di manera sclusiva) à i prugetti purtati inde i dui puntelli tematichi d’UNITI. Permette st’iniziativa di avvià e squadre di modu duraticciu inde una perspettiva internaziunale, è puru inde a custruzzione di consortium di ricerca è di furmazione, chì permetti à l’Università di Corsica di apre si megliu è di andà al di là di a so isulanità.
U scopu di st’azzione hè di accelerà a trasfurmazione numerica inde e sfarente cumpunente di l’Università, ma dinù inde l’inseme di a sucetà. À i tempi di l’umanità numeriche è di l’avvenimentu di l’intelligenza artifiziale (IA), sò oghje ghjornu e scienze infurmatiche un vettore di prima trinca di u prugressu, ch’ellu sia suciale, ecunomicu, sanitariu, eculogicu, energeticu o culturale.
Deve cuncernà a maestria di i cuncetti maiò di l’infurmazione, in particulare di l’intelligenza artifiziale è di l’intelligenza ambiente, l’inseme di i citadini, da ch’elli possinu aduttà una manera di fà chì sippia attiva è micca passiva di pettu à e tecnulugie nove.
Vene à alimentà st’azzione nant’à u numericu i dui puntelli tematichi d’UNITI, attraversu a creazione di sfarente furmazione ibridate di poca durata cum’è u Diploma Universitariu, chì anu da permette di fà cresce e cumpetenze di i persunali di l’Università, ma dinù di l’attori di a sucetà corsa (decidori, rispunsevuli d’amministrazione, capi d’intraprese, citadini). In cumplementu, devenu esse pruposti unepochi d’arnesi adatti da pudè risponde à i scopi scentifichi, pedagogichi è amministrativi di u prugramma UNITI.
Per quessa, sò messe in ballu duie piattaforme :
In cumplementu, da pudè assicurà stonde di cunvergenza d’attori sfarenti, seranu urganizati parechji scontri trà cercadori è citadini inde terzi lochi chì sippiinu dedicati è chì dessinu accessu à tutt’ognunu à l’arnesi ammintati prima. Serà dinù pruposta è aperta à u publicu una prugrammazione di cunferenze liate à e tematiche di i territorii intelligenti, in leia cù a catedra « Mutazione è Innuvazione Territuriale » (MIT) di l’Università.
Bernard GIUDICELLI – Rispunsevule di a messa in ballu è di i partinariati di u PIA UNITI
giudicelli_b@univ-corse.fr | Tél. : 04 95 34 82 37
www.universita.corsica
Sviluppeghja dapoi parechji anni l’Università di Corsica azzione di diffusione di a Cultura Scentifica, Tecnica, Industriale è di l’Innuvazione. Si hè cuncretizata st’indiatura cù l’uttenzione di u labellu « SAPS » da u ministeriu di l’Insignamentu Superiore è di a Ricerca, d’aprile di u 2022. Forte di sta sperienza è cuscente di l’imbusche sucetale ch’ella raprisenta a diffusione di e cunniscenze à ogni genneru di publicu, è in particulare i più giovani, hà per scopu l’Università di Corsica di mette in ballu una strategia di diffusione di e cunniscenze nant’à l’inseme di u territoriu isulanu. Permette st’azzione nant’à i SAPS di diffonde i risultati è e cunniscenze acquiste nant’à i puntelli 1 è 2 ver’di a sucetà è in particulare i sculari.
Per quessa, rinforza l’Università a strutturazione di u dialogu trà e scenze, a ricerca è a sucetà, in giru à i siti universitarii. Li tocca à assicurà un rollu attivu è centrale inde a messa in ballu di una dinamica territuriale in sinergia cù l’attori è à favurizà l’emergenza di prugetti innuvanti è perenni. Da seguità i sforzi digià ingagiati, si prupone st’azzione trasversale di ghjucà un rollu mutore inde u dispusitivu regiunale, di strutturà inde l’Università a rilazione Scienza Cù è Per a Sucetà, di sviluppà azzione di diffusione di a cultura è in fine di rinfurzà a furmazione di attori sfarenti à a mediazione scentifica.
Di fatti, prupone stu prugettu trasversale :
