Riescia incù l’Università

Cundizioni è quadru di studii à prò di a riescita di i studianti.

Indiata in una dimarchja di migliurazioni cuntinua di i so furmazioni, l’Università di Corsica hà criatu quistiunarii di valutazioni di i so insignamenti pà i studianti è Cunsigli di perfezziunamentu incù prufiziunali. Incù un parcintuali d’inquadramentu frà i più boni di Francia, l’Università di Corsica mischja a vicinanza è a pluridisciplinarità à a riescita è l’eccellenza. Disponi dinò d’infrastrutturi è d’attrazzi chì li parmettini di sustena a so ambizioni.

 

Scriva si à l'Università di Corsica

Infrastrutturi muderni.

L’Università di Corsica s’arrimba à nantu à un patrimoniu custruttu di qualità chì si stendi à nantu à 50 000m² subratuttu in Corti ma dinò in u rughjonu bastiacciu, u rughjonu aiaccinu è in Carghjese. In Corti, i bastimenta di l’Università di Corsica si trovani à nantu à dui campi principali (Mariani è Grimaldi), in drintu à a cità. Travadda impurtanti sò stati fatti st’ultimi anni, cusì s’hè rinnuvatu l’UFR Lettari, Lingui, Arti, Scenzi Umani è Suciali, ci hè stata a criazioni di una nova bibbiuteca universitaria di 4 500m² è si sò riaccunciati i spazii di fora, chì oramai sò veri loca di vita.

In Aiacciu è in Biguglia (vicinu à Bastia), i piattaformi di Ricerchi MYRTE, PAGLIA ORBA è STELLA MARE sò dinò tarreni di spirimintazioni è d’imparera pà i studianti.

Parvis, Campus Grimaldi

Spaziu di cunvivialità à u pedi di u bastimentu Patrick Pozzo di Borgo, Campu Grimaldi

Pà ciò chì tocca à i spazii di fora, u campu Mariani t’hà più 1000m² di spazii vegetalizati incù essenzi di u meditarraniu : lavandi, alivi, murti, ecc.

U campu Grimaldi, à nantu à stu ritrattu, pruponi iddu dinò un “pulmonu verdu” in cori di u campu.

Bibliothèque universitaire, Campus Grimaldi

U fondu corsu di a Bibbiuteca Universitaria, Campu Grimaldi

Incù i so 4 500m², a Bibbiuteca Universitaria, inaugurata in u 2016, pruponi più di 380 pusatoghji. I 120 000 ducumenta di tutti i tippi ch’idda teni sò scumpartuti in spazii chì t’ani tematichi pà una ricerca facilitata. Pussedi ancu una sala di travaddu in gruppu è urdinatori in accessu libaru chì si trovani in i spazii ducumentarii.

Prisi elettrichi à buzzeffa, accessu generalizatu à a reta wi-fi di l’Università, picculi cascetti sigurizati, carrigona… tuttu hè statu pinsatu pà avè un’asgiatezza di travaddu a più bona pussibuli

Amphi Ribellu, Campus Mariani

Amphi Ribellu, Campus Mariani

U bastimentu di a Facultà di i Lettari, Lingui, Arti, Scenzi Umani è Suciali hà binifiziatu in u 2014 di un rinnovu tutali pà prupona à i studianti un quadru dilittosu è attrattivu pà i so studii. Oramai u bastimentu ùn sdici più da u so ambienti incù facciati in legnu, mobuli novi framanti, un cunfortu termicu più bonu chè nanzi è svantaghji di più presi in cunsidarazioni. I sali di cursu sò, iddi dinò, assai cunnessi incù sali pà a videoprughjizzioni, cabini di traduzzioni, tavulona interattivi, laburatorii di lingui…

Attrazzi di prima trinca.

U materiali di prima trinca in u quali invistisci l’Università di Corsica parmetti à i studianti di cumplità l’insignamenta teorichi incù a pratica à nantu à attrazzi prufiziunali. Sapè è sapè fà sò assuciati quant’è mai.

Le robot humanoïde Nao, utilisé par le département informatique de l'Université de Corse

Nao, l’autumatu umanoidi di a filiera Infurmatica

Si pò ammintà l’asempiu di i studianti in master Sistema d’Infurmazioni è Internet (S2I) chì travaddani incù Nao. Stu automatu umanoidi di 58 centimetri (capaci à spiazzià si è ascultà), li parmetti di furmà si à a prugrammazioni è à i metudi d’intalligenza artificiali pà imparà à Nao novi maneri d’interagiscia incù l’omu o u ziteddu, par asempiu pà l’aducazioni.

Modélisation 3D au Fab Lab Corti de l'Université de Corse

Mudelizazioni 3D à u Fab Lab di l'Università di Corsica

I studianti in Arti, par asempiu, si poni appughjà à nantu à u Fab Lab di l’Università di Corsica pà francà sempri di più i limiti di u so estru. Stampatrici 3D, ricamatrici numerica, plotter di taddu, fresatrici CNC, tanti arnesi chì li dani a pussibilità di cuncipiscia opari unichi è di furmà si à l’improdu di lugiziali è apparechja di prima trinca.

Chaine de fabrication de jus de pomme, utilisée par des étudiants de l'IUT de Corse

Linea di fabricazioni di suchju di mela, aduprata da l'IUT di l'Università di Corsica

Dapoi u 2011, i studianti in Geniu biulugicu si facini u so suchju di mela ! A filiera disponi di u prucedimentu sanu di fabricazioni di suchju di frutta in drintu à u so laburatoriu d’agroalimentariu. I studianti integrani di manera cuncreta u funziunamentu è a dirizzioni di i stallazioni utilizati in u duminiu di l’industrii alimentarii in un cuntestu d’igieni è di qualità.

Innuvazioni pidagogica è innuvazioni numerica.

70
70% di i studianti si cunnettani ugni annu à nantu à a piattaforma di cursi in linea

Cunfarenzi è atteddi pratichi à nantu à u numericu è l’innuvazioni à u serviziu di a pidagugia sò pruposti di modu rigulari à i studianti di l’Università di Corsica via u prughjettu di riflessioni cullittiva “e-s@pè” . St’appuntamenti dani sperimentazioni di pidagugia à prughjettu o di pidagugia arringuarsciata. Di pettu à a mutazioni di u numericu, l’ambizioni glubali di stu prughjettu hè di favurizà u sviluppu di a pidagugia di dumani in l’Università.

L’Università di Corsica pussedi dinò una piattaforma di cursi in linea putenti chì parmetti di prulungà l’insignamenti « in prisenziali ». Quand’idda li pari, i studianti poni ritruvà cursi, annali d’asamini curretti, una bibbiugrafia / webografia, ecc. Poni ancu autovalutà si incù asircizia pruposti da i so prufissori è cumunicà meddu incun iddi è quidd’altri studianti quand’iddi ùn sò in cursu. Criata in u 2012, sta piattaforma t’hà propiu u successu : più di 2 200 cursi ci sò stati criati è 70% di i studianti ci si cunnettani ugni annu !

Inserzioni prufiziunali è imprisariatu.

84
84% di i diplumati di Master t’ani un impiegu !

Cunsulteti l’inchiesta cumpleta clicchendu quì

Una Piattaforma d’Urientazioni è d’Inserzioni Prufiziunali susteni i studianti in a so prossima inserzioni prufiziunali. Frà i dispusitivi missi in anda : un partenariatu strettu incù 20 impresi isulani, una Bursa à l’impiegu è à i stazii incù più di 500 pruposti à l’annu, cunsiglia parsunalizati (cv, lettara di mutivazioni) è arnesi numerichi chì parmettini à i studianti di metta in valori i so cumpitenzi acquistati duranti i cursi è i stazii. Un salonu dedicatu à u scontru trà impresi isulani è studianti, Job Campus, hè dinò urganizatu ugni annu pà prumova i scambii di spirienzi è u ricrutamentu.

L’imprisariatu studiantinu hè dinò un punteddu impurtanti di l’Università di Corsica. Mondi attiva in drintu à u Polu “Pépite” Corsu (Polu Studiantinu Pà l’Innuvazioni u Trasferimentu è l’Imprisariatu), l’Università hà multiplicatu i stondi di scontru studiantini / imprisarii è i cuncursa. Pruponi ugni annu u “Premiu”, premiu di L’imprisariatu studiantinu, di i furmazioni dedicati è t’hà in u so effettivu “Studianti-imprisarii”, chì binifizighja di cundizioni di studii spicifichi pà facilità u sviluppu di u so prughjettu. St’intaressu pà l’imprisariatu studiantinu hè dighjà “anzianettu”, u prima cuncursu, “24 heures pour innover”, s’hè fattu in u 2003 !

Un’Università incù una dimensioni umana è sulidaria.

L’Università di Corsica pruponi una vera vicinanza trà l’insignanti circadori, u parsunali amministrativu è i studianti.

L’annata universitaria principia incù « Allegria », una sittimana d’accolta cuurdunnata da u Serviziu cumunicazioni. Fatta incù a vulintà di sparta è incù mondi cunvivialità, sti ghjurnati sò l’uccasioni di scopra l’Università à traversu à i so attività spurtivi, culturali è assuciativi. Una surtita hè dinò pruposta à i studianti internaziunali pà ch’iddi pudissini scopra u so novu quadru di vita. Una dinamica chì si parsiguisci incù l’associu, mondi attivu, ESN Corsica, membru di a reta Erasmus Student Network Francia.

Poi, longu à l’annata, i poli Vita studiantina è Sulidarità è andicapu facilitighjani a missa in anda di prughjetta assuciativi è individuali è accumpagnani i studianti in i so dimarchji parsunali (saluta, suciali, ecc.). Pà essa à fiancu à i pinseri d’ugni ghjornu di i studianti, sti poli prulongani è aiutani i diversi azzioni in anda : gratuità di i trasporti in trenu, riduzzioni in i cummerci curtunesi, accessu di gratisi à i pezzi di teatru è à i cuncerta pruposti da l’Università, atteddi “Forma(i) è saluta” pà i studianti in suprapesu o suttupesu, dispusitivu di cunvitturera, aiuti finanziarii via u CROUS è a Cullittività Tarrituriali di Corsica…

U CROUS di Corsica pussedi quasgi 850 camari, situati propiu à nantu à i 2 campi curtinesi, o vicinu. Sti camari o picculi appartamenti t’ani una cucinetta, un balconu, u wi-fi… In u risturanti universitariu, campu Mariani, tuttu hè statu rinnuvatu è ripinsatu. Di più accuglienti, pruponi, in più di u ripastu tradiziunali, un spaziu snacking, un spaziu arrustiti è un buffet d’intrati.

È pà sparta a vita di l’Università di Corsica, ci demu appuntamentu à nantu à i reti suciali #UnivCorsica ! Semu prisenti à nantu à Facebook, Instagram, LinkedIn, Twitter