Per via di u so prugramma UNITI*, vole rinfurzà a so signatura l’Università di Corsica in giru à dui puntelli strategichi : e risorze naturale è culturale isulane. In leia stretta cù i so partinarii, vole cunfurtà u so rollu d’interfaziu cù a sucetà civile.
Hè un prugramma maiò di l’Università di Corsica, chì vole serve a so ambizione d’eccellenza à prò di u so territoriu. U so nome ? UNITI, un acronimu sceltu à posta per « UNIversità : per a Trasfurmazione à u serviziu di i territorii Isulani di u Mediterraniu. » Ricolla a genesi di stu prugramma à u mese di lugliu di u 2022. À fiancu à sedeci altri stabilimenti universitarii, hè stata laureata l’Università di Corsica da a seconda chjama à prugetti « Excellence sous toutes ses formes » di l’Agenzia Naziunale di a Ricerca. Lanciatu inde u quadru di u pianu France 2030 è di u quartu prugramma d’investimentu avvene (PIA 4), hà per scopu di accumpagnà i stabilimenti d’insignamentu superiore è di ricerca chì portanu un prugettu di trasfurmazione strutturante per u so territoriu, cuncipitu à parte da e so putenzialità proprie è da i so bisogni specifichi. « Hè un prugettu strategicu per u nostru stabilimentu, chì ci deve permette di sviluppà e cumpetenze specifiche per rinfurzà a nostra signatura, spieca Vanina Pasqualini, vice-presidente di a Cummissione di a Ricerca di l’Università di Corsica. Cunsiste u scopu à fà di l’Università un veru catalizatore di e dinamiche territuriale. »
Dutatu di 7,1 milioni d’eurò nant’à un periudu di sei anni, si arremba soprattuttu stu prugettu à dui puntelli. U primu hè giratu ver’di e risorze naturale. Ch’elle sianu energetiche, marine, agricule, in acqua o di a furesta, facenu propiu da carte maestre inde un cuntestu d’isulanità. Per via di u rinfurzamentu di e piattaforme è di i laburatorii chì esistenu (Myrte, Paglia Orba, Stella Mare), ambiziuneghja u prugramma UNITI di sustene e pulitiche publiche fendu a sperimentazione di suluzione duraticce di cunservazione di ste risorze è di accumpagnà e filiere di pruduzzione. « Hà digià sviluppatu l’Università una spertizia scentifica inde i duminii di e risorze marine, di u scambiamentu climaticu o puru di a lotta contru à l’incendii di vegetazione, accerta Vanina Pasqualini. Si tratta di fatti di accresce ste dinamiche, rinfurzendu i nostri prugetti di ricerca ma dinù a nostra offerta di furmazione per via, per un dettu, di a creazione di una scola d’ingenieri spezializata inde l’agrunumia è u scambiamentu climaticu. »
Hè avviatu u secondu puntellu di u prugettu ver’di e risorze culturale. U so scopu : accumpagnà u sviluppu di un’industria culturale inde l’isula, turnendu à inventà u raportu à u territoriu à u livellu patrimuniale, culturale è socio-ecunomicu, per via di a creazione di un « tourism’Lab » ; un laburatoriu d’innuvazione turistica, favurizendu l’emergenza di intraprese nove per elaburà un’offerta turistica culturale è duraticcia. Ùn hè limitata l’andatura di stu prugettu à sti dui puntelli. Cerca dinù à arradicà si torna appena l’Università inde u so ambiu isulanu è mediterraneu, rinfurzendu e so rete internaziunale è arrimbendu si à l’arnese numericu. A so ambizione : arrecà risposte nove à l’inciampii naturali – isulamentu, custrette geugrafiche, risorze limitate… – chì nocenu à spessu à u sviluppu di e regione mediterranee, soprattuttu quelle isulane. Si trova dinù l’uriginalità di u prugramma UNITI inde a creazione di un Cumitatu d’urientazione strategicu.
Cumposta da parechji partinarii lucali è internaziunali (istituziunali, accademichi, scentifichi è sucio-ecunomichi), cerca à cunfurtà st’instanza u rollu d’interfazia ch’ella vole ghjucà l’Università di Corsica trà l’insignanti, i cercadori è a sucetà. « L’idea centrale hè di cuncorre à mette in ballu una pulitica glubale, pusiziunendu l’Università cum’è una vera forza di pruposte per ingagià a trasfurmazione di i nostri territorii, cù tutti i nostri partinarii, cunsidereghja Vanina Pasqualini. Si deve arrimbà st’ambizione d’eccellenza à a valurisazione ma dinù à a diffusione di e cunniscenze per, in fine, megliurà a qualità di vita di e pupulazione. »
*Hà benefiziatu u prugramma UNITI di un aiutu di u Statu, gestitu da l’Agenzia Naziunale di a Ricerca per via di France 2030, incù a riferenza
« ANR-22-EXES-0016 ».
Marzu 2023
