Dapoi anni è anni, hà messu in ballu l’Università di Corsica parechje furmazione è prughjetti da affirmà l’impurtanza di l’innuvazione è di u sviluppu di l’intraprese. U scopu : sparghje a cultura d’intrapresa inde u mondu studientinu.
Face parte di i sughjetti di primura di l’Università di Corsica. Megliu : hè unu di i settori i più dinamichi di l’istituzione, in espansione piena sti pochi anni. Dapoi un decenniu, l’Università di Corsica hà messu in ballu furmazione numerose è prughjetti strutturanti da affirmà l’impurtanza di l’innuvazione per u sviluppu di l’intraprese di l’isula. U scopu di sti prugrammi universitarii : « si tratta di sparghje a cultura di l’intrapresa inde u mondu studientinu », riassume Nathalie Lameta, insignante è circadore à l’Università di Corsica. Rispunsevule di a Licenza Prufessiunale Impresariatu dapoi u 2008, hè stata frà l’artisgiani principiali di a messa in ballu di sta strategia inde l’istituzione. « À u livellu naziunale, l’inchieste d’opinione facenu vede chì più di a metà di i giovani volenu intraprende ma risentenu un frenu à u mumentu di passà à l’attu, spieca Nathalie Lameta. U nostru scopu, hè d’accumpagnà li è d’aiutà li à assudà i so prughjetti da pudè francà u passu. Moltu più chì risentimu un interessu di più in più impurtante per u mondu di l’intrapresa, forse per creà u so impiegu da per elli in un settore ch`l’interessa ».
Per via di quessa, l’Università di Corsica si hè buscatu, sti pochi anni, l’attrazzi necessarii. Di marzu 2014, sott’à l’egida di Nathalie Lameta, un « Pôle Pépite »* di Corsica labellizatu à u livellu naziunale – po arrimbatu à u FabLab di l’Università di Corsica – hè statu creatu da sensibilizà è accumpagnà i studienti chì si volenu lancià in l’impresariatu, ma dinù un diploma di stabilimentu « Studiente-Impresariu » (D2E) è un Polu « Innuvazione è Sviluppu », natu di veranu 2016. Di chè fà nasce unepoche di vucazione è attirà i studienti ver’di u mondu di l’intrapresa. À puntu, s’elli eranu 9 studienti scritti à u « Pôle Pépite » di Corsica l’annu di a so fundazione, sò stati 53 à pruvà l’avventura per l’annu universitariu 2016-2017. Aggrupendu una vintina di partenarii stituziunali, attori maiò di a furmazione, di u finanziamentu è di l’impresariatu in Corsica, u « Pôle Pépite » di Corsica hà da sustene quist’annu 80 studienti chì benefizieghjanu di l’aiutu logisticu di parechji arnesi cum’è Inizià, un incubatore d’intraprese innuvante creatu da l’Agenzia di sviluppu ecunomicu di a Corsica (Adec).
Jérémy Neyrou
Fatta fine, dapoi u 2014 sò stati accumpagnati guasi una centina di studienti in u quadru di sti sfarenti dispusitivi è anu francatu u passu di a creazione è di a ripresa d’intrapresa una cinquantina d’iniziative. Una somma di prughjetti chì, d’altronde, ponu tuccà i duminii classichi di u bastimentu è di i travagli publichi fin’à e tecnulugie e più fine di l’era numerica. « Di modu generale, 60 % di i prughjetti ch’è no sustenimu sboccanu mentre l’annu chì seguita a fine di i so studii », preciseghja Nathalie Lameta. Per un dettu, in u duminiu di u numericu, hè soprattuttu « Icare » à avè fattu da puntellu, purtatu da dui studienti, Jérémy Neyrou è Fabien Raiola. U cuncettu ? Si tratta di un sistema d’identificazione senza cuntattu è securizatu, per via di un anellu permettendu di apre un veiculu, di fà da mezu di pagamentu, di rimpiazzà una carta di fedeltà, una chjave, ecc. Dapoi u 2014, stu prughjettu, sustenutu da e squadre di u « Pôle Pépite » di Corsica, hà ricevutu distinzione assai in i sfarenti cuncorsi d’innuvazione è d’impresariatu messi in ballu da l’Università di Corsica, è hè statu ancu laureatu naziunale di u cuncorsu PEPITE I-Lab di l’intraprese innuvante. À 25 anni, Jérémy Neyrou hè oramai direttore generale di a start-up « Icare » chì conta 9 brivetti dipusitati è dece impiegati stallati in i so lucali d’Aiacciu. È ùn a piatta micca : « Hè u « Pôle Pepite » di Corsica chì ci hà aiutati à fà i nostri primi passi. Al di là di l’accumpagnamentu di e squadre pedagogiche di l’Università di Corsica, i so sfarenti attrazzi, cum’è u so Fab-Lab, ci anu permessu di benefizià di a logistica necessaria da megliurà u prughjettu è da realizà i nostri primi prototippi. Tandu, hè statu propiu un passu maiò da avvià ci ver’di u mondu di l’intrapresa ».
D’altronde, dopu à avè participatu à u salone mundiale di l’innuvazione di Las Vegas, di ghjennaghju 2017, i dui fundatori d’Icare contanu oramai vede di più luntanu. Quist’annu, anu finalizatu una pisata di fondi di 2,5 milioni d’eurò da finanzià una seria di prototippi, lancià a cummercialisazione di u so pruduttu in u 2018 è mette in ballu subitu avà prughjetti novi. Una manera di ramintà ch’elli sò nanzituttu l’innuvazione è u spiritu d’intrapresa un challenge permanente.
*Polu studientinu per l’innuvazione, u Trasferimentu è l’Impresariatu.
