Cù guasi 40 % di i studienti scritti à e so attività, face parte l’Università di Corsica di e più spurtive di Francia. Al di là di e cumpetizione naziunale è internaziunale induv’ella si busca e distinzione, hà fattu di u sportu una pratica d’ogni ghjornu per i studienti.
Da per ellu, adunisce guasi a metà di i studienti di l’Università di Corsica. Un sciffru chì a piazza frà l’Università di Francia e più spurtive. Cù più di 1700 scritti – frà i quali 1300 in u quadru di una nutazione – nant’à circa 4700 studienti à l’Università di Corsica, viaghja à l’infuria u serviziu universitariu di l’attività fisiche è spurtive (Suaps) nant’à u campus di Corti.
Cunnisciutu bè da i studienti, u Suaps, messu in sesta subitu cù l’apertura di l’Università di Corsica, in u 1981, prisenta un’offerta larga di 34 attività spurtive è artistiche spartute nant’à 68 urarii à settimana è messe in ballu da 31 persunali. U scopu : « permette à ogni studienti di praticà u sportu chì li cunvene », spiecanu Claire Fontana è Paola Ventura, direttrice aghjunta è rispunsevule amministrativa di u Suaps.
Dapoi una decina d’anni, arregistreghja u serviziu una prugressione custante di e scrizzione, soprattuttu sti trè anni scorsi. D’altronde, à certi studienti, li si pare ancu d’esse in casa soia inde e stallazione spurtive di l’Università di Corsica, ch’elli praticheghjanu di modu regulare mentre i so studii. « Dapoi a rientrata di u 2015, avemu cuntabilizatu guasi un centu di scrizzione supplementarie ogni annu, passendu da 850 studienti in pratica da passà u tempu à 1050 per l’annu universitariu 2017-2018, preciseghjanu Claire Fontana è Paola Ventura. Ci incuragisce, moltu più chì 40 % di i studienti scritti in prima annata praticheghjanu oramai l’attività di u Suaps, pigliendu in contu ogni facultà ». Unepochi di sciffri, di sicuru in prugressione, ma chì ne dicerianu pocu s’elli ùn pigliavanu in contu a qualità di i praticanti è di i cumpettitori. In fatti, al di là di a so pusizione frà i campus i più spurtivi di Francia, hè distinta l’Università di Corsica inde parechje cumpetizione regiunale, naziunale è internaziunale. Per l’annu universitariu 2017-2018, anu participatu 140 licenziati di a categuria « cumpetizione » gestita da u Suaps à dodeci campiunati, in u duminiu di u triatlone è di i sporti individuali è cullettivi.
Nant’à dodeci attività di a Federazione francese di u sportu universitariu (FFSU), i studienti di l’Università di Corsica si sò buscati dui tituli di campione di Francia di scacchi è un titulu di campione di Francia di caratè. Frà i spurtivi curtinesi, Laetitia Ferracci, campiona di Francia, hè ancu statu selezziunata in a squadra naziunale per u campiunatu di u mondu universitariu di karaté à u Giappone, induv’ella si hè buscatu a medaglia di Bronzu. « Parechji studienti sò andati luntanu inde certe cumpetizione, soprattuttu in inter-università, ma dinù in i campiunati naziunali, preciseghja Claire Fontana. U fustal, u ballu, u basket è u karaté sò, per un dettu, raprisentati assai bè. Di pettu à d’altre università chì contanu millaie è millaie di studienti, a risorza ch’è n’avemu hè perfurmante assai ».
Da stu puntu di vista, ùn mancanu l’esempii di riescita spurtiva in e sale di u Suaps di l’Università di Corsica. Studiente in Master Mistieri di l’insignamentu, di l’educazione, di a furmazione Educazione fisica è spurtiva (EPS), Valentin Bricquet, 24 anni, hà vintu u Corsica Raid aventure d ghjugnu 2018 è a face sapè : « Ci hè, in Corti, una dinamica in giru à u sportu universitariu chì ùn si trova micca in altrò ».
Presidente di l’associu spurtivu universitariu di l’Università di Corsica, Valentin Bricquet, chì si vole avvià ver’di una carriera di prufessore di sportu, si hè arrimbatu à l’attività d’instancabilità, di natazione è di corsa chì li anu permessu di participà, di ghjugnu 2018, à u campiunatu di Francia universitaria di triatlone, in Limoges. « L’Università di Corsica dà una facilità d’accessu à tutti sti sporti è una preparazione bona per integrà e sfarente cumpetizione, cunsidereghja Valentin Bricquet. Ci n’hè per tutti i gusti è per tutti i livelli ». U risultatu, forse, d’una squadra pedagogica chì piglia a so missione « Suaps » cù un « spiritu spurtivu » chì ùn si pò staccà. « Circhemu à fà di manera chì e cumpetenze trasversale di u Suaps andessinu al di là di simplice disciplina spurtiva, spieca Claire Fontana. Chì st’attività inghjennanu una rispunsabilisazione più grande di i studienti è mettenu, in fine, a nuzione di citadinanza in core à u ghjocu ».