U paese di Cuzzà hè in core à un prugettu sperimentale di l’Università di Corsica è di u CNRS. U scopu : uttimizà a gestione di e risorze di sta piccula cumuna rurale di u Pumonte, mettendu a ricerca à u serviziu di l’attori lucali.
U scopu hè chjaru : fà di a cumuna di Cuzzà un « paese intelligente » cunnettatu è durevule in core à u mondu rurale. Dapoi a fine di l’annu 2017, u prugettu pensatu è messu in ballu da l’Università di Corsica è da u CNRS spunta pian’pianinu in u paese di a valle di u Taravu, à un’ora è mezu d’Aiacciu. U so nome : « smart paese ». Una riferenza rivendicata à u cuncettu di « smart city » chì si sviluppeghja à traversu u mondu in e cità cunnettate è affiancate à u sviluppu durevule. Arrimbendu si à stu mudellu, una squadra di cercadori di l’Università Pasquale-Paoli è di u CNRS hà lanciatu una riflessione in u cuntestu di a Corsica. In u frattempu, affacca una quistione : s’è, da quì à qualchì decenniu, si trova 70 % di a pupulazione di u mondu in e cità, chì avvene ci puderà esse per i territorii chì ùn sò urbani ? « À u livellu suciale è storicu, u paese hà un pesu impurtante in a vita di l’abitanti di a Corsica, spieca Thierry Antoine-Santoni, maestru di cunferenze in infurmatica, in carica di u prugettu « smart paese » à l’Università di Corsica. Pruvà si la cù una sperienza di stu generu inde l’isula si hè imposta di manera naturale ».
Da fà sta scumessa, Cuzzà, una piccula cumuna di l’internu di l’isula, hè stata selezziunata dopu à una chjama à prugetti nant’à u numericu di a cullettività di Corsica (via i fondi Feder), in partenariatu cù EDF è a SITEC*, per esse à fiancu à l’Università Pasquale-Paoli è u CNRS. U paese di u Taravu pudia cuntà d’altronde nant’à parechji vantaghji di prima trinca : dapoi una vintina d’anni, si hè scrittu cù i so 300 abitanti in una dinamica assai pusitiva nant’à u sviluppu durevule chì ne face un locu distintu. Ben ch’ella sia cunfruntata à i capatoghji demugrafichi è geugrafichi, hà sviluppatu a cumuna una scalderia biomassa è microcentrale idroelettriche per diventà un territoriu à energie pusitive, pruducendu ne di più ch’ellu ne cunsuma. Ma al di là di st’infrastrutture, à l’incuntrariu di parechje altre cumune di l’internu, Cuzzà hà sempre servizii publichi : una scola cù una quarantina d’elevi, una mediateca, una ciucciaghja municipale, alloghji suciali, o puru un scannatoghju microregiunale.
Arrimbendu si à st’acquisti, u paese hè assuciatu oramai à i cercadori di l’Università di Corsica è di u CNRS da cunduce travagli in leia cù u sviluppu di u territoriu. U scopu : « uttimizà per via di a simulazione a gestione di e risorze arrimbendu si à infrastrutture numeriche cù un valore aghjustatu tecnulogicu forte à u serviziu di a pupulazione, cù u fine di un sviluppu durevule è di megliurazione di e cundizione di vita di l’abitanti purtendu li suluzione », preciseghja Thierry Antoine-Santoni, chì hè dinù vice-presidente di l’Università di Corsica Pasquale-Paoli in carica di u numericu. In Cuzzà, i cercadori anu fattu di a dimensione rurale u core di a so riflessione scentifica, impegnendu ci l’attori lucali. Un allevatore purcinu stallatu nant’à a cumuna viderà per un dettu i so porchi ecchippati di cattori da pudè identificà di manera precisa u so parcorsu. « Al di là di l’aspettu praticu chì hà da minimizà i spiazzamenti di l’allevatore, hà da pudè dispone di un rilevu numericu cù dati precisi chì ùn avia fin’à tandu, face sapè Thierry Antoine-Santoni, autore di una tesa in u 2007 nant’à i cattori di rete senza filu. Permetterà di seguità u modu d’alimentazione di i porchi è u so parcorsu fin’à a tumbera per analizà ne l’impattu nant’à a carne è dà un schjarimentu nant’à a tracciabilità, è uttimizà di manera generale u so sfruttamentu ».
In u listessu tempu, un saffraneru biologicu, cunfruntatu à imperativi di racolta quandu hè troppu forte a sfarenza termica trà u ghjornu è a notte, hà da esse ecchippatu di cattori in terra. U scopu : li permette di racoglie i dati nant’à i mumenti i più favurevuli di a racolta, ma dinù, frà altri affari, i bisogni d’irrigazione. Altru esempiu : cunnettata, a piccula caserna di i spenghjifochi di Cuzzà hà da pudè seguità i so omi nant’à u terrenu, è l’evuluzione di u so pusiziunamentu mentre un’intervenzione per un focu di furesta. Di sicuru, a lista ùn hè cumpletta, tantu ella si pò mette a tecnulugia à u serviziu di parechji altri duminii in giru à u mondu rurale. Da a parte di a cumuna, u prugettu hè vistu cum’è una bona. U merre, Jean-Jacques Ciccolini, spera di caccià ne i frutti da pudè risponde megliu à i penseri di a so cumuna rurale : « tutti st’attrazzi ci devenu permette di facilità a vita in paese è à rende lu attrattivu soprattuttu à u livellu ecunomicu è ambientale, cunsidereghja u merre. Dapoi qualchì annu, Cuzzà face parte di i paesi corsi, belli scarsi, chì diventanu di più in più putenti è arringuerscianu a tindenza à u livellu di a dinamica demugrafica ». Ùn ci hè dubbitu ch’ellu diventerà dinù un paese imbrancatu assai.
*Sucetà di servizii infurmatichi stallata in Corsica.
