Nata in u 2010 da un’iniziativa di l’Università di Corsica, a Reta d’Eccellenza di i Territorii Isulani (RETI) dà à l’universitarii un spaziu di scambii da sviluppà cullaburazione scentifiche. U scopu : fà sorte l’isulanità da a so marginalità.
Dapoi anni è anni, face parte di e primure maiò di l’Università di Corsica : mette in ballu una dinamica di cuuperazione internaziunale da sviluppà e cullaburazione scentifiche. Per dà à l’universitarii un spaziu di scambiu da elaburà prugetti cumuni, hà creatu l’Università di Corsica, di lugliu 2010, a Reta d’Eccellenza di i Territorii Isulani (RETI). Custituita da 28 membri, conta sta piattaforma di travagliu assai territorii isulani cum’è Madagascar, Okinawa (Giappone), Cuba, a Sardegna, a Scozzia o e Baleare.
A filusufia di sta reta ? « si tratta di sviluppà travagli di ricerca è di fà piglià in contu u fattu isulanu, ricunnisciutu pocu oghje da l’istanze internaziunale cum’è l’Unione europea », riassume Mathieu Graziani, direttore di a RETI è vice-presidente di l’Università di Corsica in carica di e rilazione internaziunale.
À u prugramma : travagli scentifichi spartuti, attività di ricerca nant’à tematiche cumune è una messa in rilazione più stretta di i membri di a reta. « I territorii isulani anu prublematiche simule inde parechji duminii, cum’è l’energia, i trasporti o a vita cara, per via di i sopracosti inghjennati da l’isulanità, spieca Mathieu Graziani. Di fatti, l’interessu di sta reta hè di cunfruntà e sperienze è e cumpetenze inde tutte l’università, da capisce megliu sti fenomeni è prupone suluzione ».
Per un dettu, in u quadru di a RETI travaglianu in particulare i cercadori di l’Università di Corsica è di quella di Cagliari nant’à l’effetti di u trafficu marittimu nant’à l’ambiente, a qualità di l’acqua marina è di a gestione di e rumenzule in i porti. « U risultatu di sti travagli hà da esse valurizatu per via di cunferenze, di symposium è di prisentazione di studii, preciseghja Mathieu Graziani. Permette à l’Università di buscà si un’audienza più larga, puru s’ellu hè cumplessu à le volte di fà sorte l’isulanità di a so marginalità fendu, per un dettu, pruposte à i puteri publichi di pettu à certe prublematiche ».
Eppuru, in u quadru di a RETI ùn sò limitate e cullaburazione trà l’Università di Corsica è l’isule à l’attività di ricerca scentifica. Toccanu dinù à a furmazione di i studienti. Di sittembre 2019, hà da esse apertu un doppiu diploma in scenze ecunomiche è suciale trà l’Università di Corsica è quella di Sassari, in Sardegna. Intantu, d’altri prugrammi, in giru à i stazii inde l’intraprese, sò per esse elaburati è participeghjanu dinù à « creà una dinamica di mubilità studientina trà sti territorii », face sapè Mathieu Graziani.
Tandu, travaglia dinù a RETI cù u cunsigliu permanente corso-sardu, un arnese puliticu trà l’eletti sardi è corsi da favurizà a cuuperazione trà l’isule, da rinfurzà a mubilità di i studienti trà ste regione vicine, sviluppendu per un dettu una reta d’intraprese per facilità sti stazii. « Al di là di a rinumata ch’ellu face per l’Università di Corsica, a RETI impegna i studienti è li permette d’acquistà una vera sperienza internaziunale », face sapè Mathieu Graziani.
Una dinamica chì s’arremba in particulare à u prugramma Erasmus, fendu di i territorii isulani europei distinazione priuritarie per i scambii internaziunali di i studienti. Di fatti, accoglie ogni annu l’Università di Corsica una decina di studienti d’isule membre di a RETI. Da stu puntu di vista, ùn face mancu appena dubbiti l’attrattività di a reta, è cresce puru longu à l’anni : custituita in u 2010 da 19 membri d’isule di u mondu sanu, conta oramai a RETI 28 territorii isulani è dumande d’adesione regulare chì li duverebbenu permette di stende si torna per l’anni à vene.
