Dapoi l’anni ottanta, in partinariatu strettu cù u CNRS, cuntinueghja l’Università di Corsica à arricchisce i scambii cù l’isule è i paesi vicini in u quadru di dispusitivi europei di cuuperazione. In core à ste cullaburazione : prugrammi di ricerca è di furmazione da sviluppà u territoriu.
Dapoi a so apertura à i primi di l’anni ottanta, face parte di e scumesse di l’Università di Corsica : mette in ballu una dinamica forte di cuuperazione trasfruntaliera in u circondu mediterraniu. Hè definitu di modu chjaru u scopu. Si tratta di rinfurzà l’attrattività di u campus di Corti, circhendu à tempu à prumove è à sviluppà u territoriu corsu. « Avemu prublematiche simule abbastanza inde parechji duminii cù e regione trasfruntaliere, spieca Marc Muselli, u vice-presidente di a Cummissione di a Ricerca di l’Università di Corsica. Hè per quessa chì travagliemu inseme nant’à temi scentifichi cumuni arrimbendu ci à chjame à prughjetti inter-regiunali da pruvà à risponde ci ».
Tandu, dapoi parechji anni, cuntinueghja l’Università di Corsica à accresce i scambii cù l’isule è i paesi vicini per via di dispusitivi europei di cuuperazione. U scopu : mette in ballu studii scentifichi arrimbendu si à e similitudine di e regione da purtà risposte cumune à unepoche di prublematiche. Per un dettu, trà u 2007 è u 2013, in u quadru di u prugramma Interreg-France Maritime, per via di u so prughjettu strutturante « Fochi » anu travagliatu l’Università di Corsica è u CNRS cù a Liguria è a Sardegna nant’à un prugramma di gestione di i risichi di l’incendii. Battizatu PROTERINA-C, vole mette valutà l’impattu di a variabilità di e cundizione climatiche nant’à stu generu di risichi in i spazii naturali è urbani per e trè regione da dà li arnesi cumuni per a lotta.
« L’idea hè di mischjà è di apprufittà di e cumpetenze di ogni regione da risponde à l’imbusche cumune»
À tempu, per di u prugramma MARTE+ (Mare, Ruralità e Terra : potenziare l’unitarietà strategica), si sò assuciati i cercadori di l’Università di Corsica è di u CNRS à scentifichi liguri, tuscani è sardi. U scopu : favurizà u sviluppu di l’innuvazione è di u spiritu d’intrapresa nant’à i sfrarenti territorii cuncernati da accresce a cumpetittività di i spazii rurali è di u turisimu à l’internu d’un spaziu mediterraniu è europeu più largu. Unica regione francese eleghjitoghja à u prugramma, hè stata assuciata l’Università di Corsica à cinque prughjetti d’Interreg per un bugettu di 1,9 milioni d’euri trà u 2007 è u 2013.
Per a prugrammazione 2014-2020, hà decisu a Cummissione Europea di allargà a zona di cuuperazione à a regione Provence-Alpes-Côte d’Azur è à l’Alpe Marittime « ciò chì hà permessu di truvà partinarii è di sviluppà a nostra riflessione nant’à un spaziu più impurtante, nota Marc Muselli. L’idea hè di mischjà è di apprufittà di e cumpetenze di ogni regione da risponde à st’imbusche è à e scumesse cumune ».
Da stu puntu di vista, sò assai chjari l’obbiettivi strategichi definiti da Marittimo : toccanu à u turisimu innuvante è durevule, à e biotecnulugie, à i svilippi di l’energie rinnuvevule è à u nautisimu, cunsiderati cum’è filiere cù un putenziale forte d’innuvazione. L’esempiu di u prughjettu GRRinPORT, sviluppatu oghje in u quadru di u prugramma Marittimo 2014-2020 basterebbe à fà ne vede l’indiatura. Messu in ballu per via di l’Università di Corsica / CNRS è di quella di Cagliari, vole megliurà a qualità di l’acqua marina in i porti limitendu l’impattu di l’attività di i porti è di u traficu marittimu nant’à l’ambiente, circhendu à definisce e pratiche bone di gestione di i ghjetti è di l’acqua usata, rispettendu a valurisazione di e risorze è di l’ecunumia circularia. Ma, bench’elli sianu fatti i travagli di cuuperazione in u circondu mediterraniu, cercanu à tempu l’Università di Corsica è u CNRS à sviluppà cullaburazione al di là di stu spaziu.
Da offre à l’universitarii un spaziu di scambii chì li permetti d’elaburà prughjetti cumuni è di valurizà i so travagli, hà creatu l’Università di Corsica in u 2010 a Reta d’Eccellenza di i Territorii Isulani chì era statu fundata in giru à 19 membri fundatori è conta oghje 28 stabilimenti membri da dà li un’audienza più larga è fà la finità cù a marginalità di l’isulanità.
Dui doppiu-diplomi appruntati
Invece, à tempu à sti partinariati scentifichi, ùn si limiteghjanu e cullaburazione di l’Università di Corsica cù i so territorii vicini à l’attività di ricerca. Per via di u prugramma Erasmus+, sò partuti più di una quarantina di studienti curtinesi à fà i scambii internaziunali in licenza è in master. « Avemu tissutu dapoi un pezzu rilazione cù parechje università europee, in particulare cù i nostri partinarii naturali taliani in Pisa, Sassari è Cagliari, è da fà fronte à u Brexit insulchemu dinù in l’Europa di u nordu induv’elle sò numerose l’università anglofone, preciseghja Mathieu Graziani, u vice-presidente di l’Università di Corsica in carica di e Rilazione Internaziunale. In soprappiù di u prugramma di scambii tradiziunali, dapoi a rientrata di u 2018 prupunimu un doppiu diploma trà a nostra scola d’ingenieri Paolitech è l’Università politecnica di Bucarest, è toccu sittembre di u 2019 ci serà un doppiu diploma in scenze ecunomiche è suciale trà l’Università di Corsica è quella di Sassari. Furmazione nove sò dinù per esse elaburate in giru, per un dettu, à l’ecunumia ragiunata di u turisimu, da risponde à ste prublematiche spresse in particulare nant’à u territoriu corsu ».
Da stu puntu di vista, ùn conta limità a so azzione l’Università di Corsica à l’attività di furmazione, ma cerca dinù à apre perspettive nove per i so studienti. Per via soprattuttu di u cunsigliu permanente corsu-sardu, un locu di scambii pulitichi trà l’eletti corsi è sardi da incuragisce a cuuperazione trà e populazione è l’istituzione di e duie isule, spera l’Università di Corsica di pudè rinfurzà a mubilità di i studienti chì vulerianu mette in ballu un prughjettu, una missione o un staziu in Sardegna. « Travagliemu in particulare da creà, à mezu andà, una borsa per i stazii, face sapè Mathieu Graziani. Piglieria, per un dettu, a forma di una piattaforma internet da riceve l’offerte di stazii cumune per e duie isule. Hè simplice l’idea : si tratta di urganizà una reta d’intraprese da sviluppà à tempu a sperienza internaziunale è i sbocchi prufeziunali per i nostri studienti ».
