Dapoi u 2017, per via di u prugramma PADDUC-CHANGE, cercanu l’Università di Corsica, u CNRS è l’INRA à fà u censu, à mantene è à rinfurzà i pozzi di carbonu ch’ella si tene l’isula per via di i so eco-sistemi specifichi, è cuntribuisce à una valutazione più bona di u so bilanciu carbonu.
Hè simplice a filusufia di u prugettu : si tratta di cuntene quant’è pussibule l’effetti di u cambiamentu climaticu in Corsica. Dapoi u mese di nuvembre di u 2017, per via di u prugramma PADDUC-CHANGE, à fiancu à i so partinarii, l’Uffiziu di l’ambiente di a Corsica (OEC), a STARESO è u centru di ciuttata sottu marina Costa Verde Loisirs, cercanu l’Università di Corsica, u CNRS è l’INRA, per via di a Federazione di Ricerca Ambiente è Sucetà, à fà u censu, à mantene è à mette in valore i pozzi di carbonu naturali prisenti inde l’isula. Detta altrimente, e riserve naturale è artifiziale capace à tene u carbonu in circulazione in a biusfera.
In u filu di l’accordu di Parigi di dicembre 2015, chì vole cuntene a riscaldata di a pianeta, u prugramma custituitu da una squadra di una decina di cercadori di l’Università di Corsica / CNRS / INRA studieghja e pruviste di carbonu chjappe da a vegetazione isulana è a so cuntribuzione à a siquestrazione di i gaz à effettu di serra (anziani gaz carbonichi). « Si tene a Corsica parechje qualità inde stu duminiu, face sapè Gérard Pergent, prufessore d’eculugia marina à l’Università di Corsica è rispunsevule di u prugramma PADDUC-CHANGE. Hè nanzituttu u so ambiente priservatu chì permette di fà sti studii specifichi, è u fattu ch’ella appia l’isula dui eco-sistemi bunissimi in quantu à a cunservazione è a siquestrazione di u carbonu ».
Ùn piatta mancu appena u scentificu sti dui eco-sistemi maiò chì sò oghje in core à stu prugramma di ricerca. Travaglianu in fatti i cercadori nant’à dui puntelli specifichi di a Corsica : e pozzine in altitudine, sorte d’oasi di e muntagne corse, è l’erbaghji sottu marini di pusidunie prisenti assai in giru à l’isula. « U nostru scopu hè di cunservà megliu è, s’ella hè pussibule, di rinfurzà sti pozzi di carbonu naturali, preciseghja
Gérard Pergent. Si face per via di un censu di e quantità di carbonu siquestrate inde sti dui eco-sistemi, per via di un’analisi di a so evuluzione, ma dinù cù un studiu di i meccanisimi naturali chì ne sò à
l’origine ».
Longu à u mese d’aostu di u 2018, anu giratu d’altronde i cercadori di u prugramma PADDUC-CHANGE per ste sponde corse da circà à misurà, per via di una campagna di ricerca cù un battellu oceanograficu, e quantità di carbonu chì sò in i 53 000 ettari di pusidunie di u liturale isulanu. Sicondu e prime stimazione di i scentifichi, serebbenu capaci à cuncentrà l’erbaghji di pusidunie parechje centinaie di chilò di carbonu per ogni metru quadratu. Ne sò cunvinti oramai i cercadori : si tene a Corsica un postu propiu soiu in u Mediterraniu per via di i so eco-sistemi specifichi è di a so cupertura vegetale unica (eco-sistemi di a furesta), è
ci vole à mantene la circhendu à riduce l’impatti di a manu di l’omu. « Dapoi parechje decenie, ci sò pressione forte nant’à e pozzine per via di a friquentazione turistica di e muntagne, insiste Gérard Pergent. Per
u mare, si vede dinù chi l’impattu di l’attività marittime è e di custruzzione
liturale mette in periculu e pusidunie è i servizii eco-sistemichi ch’elle porghjenu. Tandu, u nostru rollu serà di mette in ballu piani di gestione da assicurà a cunservazione di st’eco-sistemi è di mantene l’attività socio-ecunomiche chì sò in giru ».
Tandu, s’arrembanu assai i scentifichi à l’Uffiziu di l’ambiente di a Corsica, chì intervene da gestice i siti sensibuli. Hè statu numinatu in particulare da fà l’animazione di u situ Natura 2000 « gran’erbaghju di a Costa Urientale » di circa 20 000 ettari, chì face parte di l’erbaghji di pusidunie frà i più maiò di u Mediterraniu. Ma ùn si pianta custì u rollu di l’OEC : in tantu chè stabilimentu in carica di a pulitica ambientale corsa, intervene da racoglie i dati è participeghja à prugrammi in leia cù l’adattazione à u cambiamentu climaticu. « Per via di a creazione è di a gestione di spazii prutetti, terrani o marini, ma dinù cù l’azzione specifiche cum’è a strutturazione di un usservatore regiunale di e zone umide, participemu à megliurà a cunniscenza di l’eco-sistemi maiò studiati cù st’uperazione, spieca Joseph Donini, u rispunsevule di u dipartimentu « strategie è scenze di u mare » à l’OEC. Ci duverebbe permette di valutà à mezu andà a resilienza di st’eco-sistemi di pettu à un’antrupisazione sempre à cresce, a so cuntribuzione da cuntene l’effetti di u cambiamentu climaticu, è di prupone, in fine, misure di gestione da megliurà a so cunservazione ».
Da stu puntu di vista, i travagli messi in ballu per PADDUC-CHANGE cercanu quantunque à trapassà u quadru di a priservazione da uttimizà u rollu di st’eco-sistemi è u raportu trè l’emissione è u mantenimentu di u carbonu. « Pò avè a Corsica un rollu di prima trinca in quantu à a prutezzione di l’ambiente, chì serà forse frà e regione e più efficace per via di u so eco-sistema naturale, capace à riduce da per ellu l’effetti di u cambiamentu climaticu, cunsidereghja Gérard Pergent. In u Mediterraniu è soprattuttu in Europa, sò scarse e regione chì prisentanu un bilanciu carbonu pusitivu, chì cunsisteria à cunservà u carbonu più chè à emette lu. A Corsica si tene una piazza bella inde st’equilibriu è e qualità chì abbisognanu da permette di buscà si un bilanciu carbonu pusitivu per l’isula ».
