Per via di u so laburatoriu Scenze per l’Ambiente, sò l’Università di Corsica è u CNRS attori di prima trinca di u prugettu Intermed. U scopu : riduce i risichi d’incendii nant’à l’interfacce trà a furesta è l’abitazione, prupunendu i mezi efficaci da prutege e pupulazione.
Face parte di i prugetti maiò di l’Università di Corsica in quantu à a lotta contru à l’incendii. Dapoi l’anni novanta, anu messu in ballu i cercadori di u campus Grimaldi, in Corti, un prugramma di ricerca scentifica giratu ver’di a mudelisazione è a sperimentazione in giru à i fochi, da sviluppà unepochi d’arnesi d’anticipazione per luttà megliu contru à sti fenomeni. Si scrive propiu inde st’andatura u prugettu « Intervenzione per gestisce è riduce u risicu d’incendiu à l’interfacce trà l’abitazione è i spazii naturali », chjamatu Intermed. Inde u quadru di stu prugettu INTERREG Italia-Francia Marittima, ci piglia una parte impurtante u laburatoriu Scenze per l’Ambiente SPE (Università di Corsica – CNRS). Dapoi u 2019 adunisce sta dimarchja, sottu à u cumandu di a Cullettività di Corsica, una mansa di partinarii longu à u Mediterraniu : l’Università di Corsica, l’INRAE, l’Università di Sassari, a regione Liguria, l’Anci Toscana è l’Unione di e Cumune di a Versilia. U so scopu : riduce u risicu d’incendiu à l’interfacce trà l’abitazione è a furesta prupunendu i mezi efficaci da riduce a vulnerabilità di ste zone. Sò utilizati dopu i risultati di stu prugettu inde u prugettu strategicu MED-STAR per circà di megliurà a capacità di l’istituzione publiche à prevene è à gestisce u risicu d’incendiu inghjennatu da u scambiamentu climaticu inde e zone di prisenza umana forte è d’interessu naturale. S’interessa in particulare u laburatoriu SPE à a vulnerabilità di ste custruzzione di pettu à un incendiu di vegetazione. « U scopu di sti travagli hè di prupone à l’istituzione publiche, arrimbendu ci à i studii scentifichi, unepoche di precunisazione per pruvà di privene i risichi è di riduce a vulnerabilità di ste zone », spieca Virginie Tihay-Felicelli, maestra di cunferenze in energetica à l’Università di Corsica, membra di a squadra FEUX di u laburatoriu SPE, è rispunsevule di stu prugettu.
Arrimbendu si à e sperimentazione fatte cù un scalellu vicinu à u reale è à parechji arnesi di mudelisazione è di simulazione numerica, facenu i cercadori precunisazione nant’à l’accunciamentu di u paisaghju in giru à e custruzzione, a scelta di e materie per i bastimenti pusiziunati nant’à l’interfacce, in particulare per e terrazze è a lignameria da riduce ne a vulnerabilità, o puru nant’à e distanze da appiecà secondu a vegetazione è a tupugrafia di u locu. Da mette in ballu sti studii, hè stata creata in Corti una piattaforma specifica cù un lucale di 20 metri quadrati cù una terrazza, nant’à un terrenu cumunale messu à dispusizione da u Serviziu d’Incendiu è di Succorsu di u Cismonte. Attrazzata cù unepochi di cattori per seguità l’evuluzione è a putenza di u focu è l’impattu in tempu reale nant’à a custruzzione, permette di fà sta piattaforma EXPLORII* unepoche di sperienze per valutà a vulnerabilità d’una custruzzione contru à un incendiu di vegetazione. Da cumplettà i dati racolti, per via di ste sperienze anu dinù sviluppatu i scentifichi parechji arnesi di mudelisazione numerica per simulà scenarii di fochi vicinu à l’abitati. « Ci permette sta doppia accustera, à tempu numerica è sperimentale, di piglià in contu parechji parametri cum’è e cundizione meteurologiche è i generi sfarenti di vegetazione chì ponu avè un effettu nant’à a sparghjera di u focu è u so impattu nant’à e custruzzione », preciseghja Virginie Tihay-Felicelli. Da stu puntu di vista, volenu valutà dinù i cercadori l’effetti di i regulamenti in quantu à a prevenzione di l’incendii à l’interfacce. In Francia, l’ubligazione legale di smachjera, chì cercanu à limità i risichi di sparghjera di l’incendii, valenu per i terreni piazzati à menu di 200 metri di e fureste. In giru à l’abitazione, hè di 50 metri sta distanza è si pò stende fin’à 200 metri per via di un arrestatu municipale. « À sti studii, li tocca à definisce s’elle bastanu e distanze precunizate trà e custruzzione è i vegetali, o trà i vegetali elli stessi, inde a zona di i 50 metri, per tutte e situazione chì si ponu imaginà, per fà ch’ellu ùn si sparghji u focu da a furesta ver’di a custruzzione, indetta Virginie Tihay-Felicelli. Puderanu tandu ghjuvà di riferenza per l’auturità e precunisazione chì ne seranu ricacciate, da fà evuluà i regulamenti inde u quadru di l’assesti di u paisaghju in giru à e custruzzione. » Pemetteranu dinù e sperienze fatte di definisce cum’elli ponu participà l’elementi di custruzzione à riduce a vulnerabilità di l’abitati. D’altronde, sò digià stata fatte precunisazione inde u quadru di u raportu intermediariu di u prugettu, chì ci anu participatu dinù i servizii uperaziunali.
*EXpérimentations, sensibiLisation et fOrmation aux Risques Incendies dans les Interfaces.
Maghju 2022
Ritratti : Università di Corsica
