Dapoi l’anni 1990, mette in ballu l’Università di Corsica un prughjettu di ricerca nant’à a mudelisazione è a sperimentazione in giru à i fochi. U scopu : sviluppà unepochi d’arnesi numerichi di simulazione è d’anticipazione per aiutà i prufeziunali à luttà megliu contru à sti fenomeni cù mezi di prima trinca.
Basterebbe un sciffru à mette à palesu a prublematica : st’ultimi dece anni, sò stati 21 699 ettari à esse arruvinati da u focu in Corsica. Un fenomenu chì pare arradicatu propiu inde l’isula, fin’à à fà ne una regione frà e più tocche di Francia. Di pettu à stu custattu pocu alegru, l’Università di Corsica, cù l’impegnu di u Prufessore Jacques-Henri Baldi, hà messu in ballu dapoi u principiu di l’anni 1990 risposte scentifiche per via di un prughjettu di ricerca da pudè luttà megliu contru à sta prublematica.
In cullaburazione stretta cù l’attori di a lotta inde l’isula, soprattuttu l’Uffiziu naziunale di e fureste (ONF), i spenghjifochi furestieri di a Cullettività di Corsica, u Parcu naturale regiunale di Corsica (PNRC), l’Uffiziu di l’ambiente di a Corsica (OEC) è i dui servizii d’incendii è di succorsu (SIS) di l’isula, una squadra di 16 circadori è tecniziani di l’Università di Corsica è di u CNRS (Laboratoriu di e Scenze per l’Ambiante) hè impegnata in un dipartimentu scentificu dedicatu à stu duminiu. U scopu : « capisce megliu i fenomeni chì intervenenu mentre un incendiu da pudè li predisce è mudelizà, per trasferà a cunniscenza universitaria è sviluppà arnesi di lotta è d’accunciamentu di u territoriu per i prufeziunali », spieca Lucile Rossi, maestra di cunferenze à l’Università di Corsica è rispunsevule scentifica di u prughjettu « Fochi » dapoi u 2017.
Fin’à oghje, sò stati ingagiati parechji travagli di ricerca in giru à a mudelisazione per sviluppà arnesi di simulazione è d’anticipazione da pudè analizà in tempu reale l’evuluzione di un focu è l’energia ch’ellu ricaccia sicondu a so pusizione è e cundizione di u tempu. « Travaglia a nostra squadra per mette i dati in equazione è capisce i fenomeni di prupagazione », preciseghja Lucile Rossi.
Di fatti, parechji prugrammi, oghje per sbuccà, sò stati messi in ballu in giru à e zone d’appoghju à a lotta (ZAL) senza vegetazione, a tussicità di i fumi, e cunsiquenze di e debbiature nant’à a terra è nant’à a prupagazione di i fochi. A finalità : a creazione d’arnesi numerichi d’aiutu à a decisione, sott’à a forma di protottippi, per dà infurmazione à l’attori di a lotta contru à l’incendii. Frà quessi, u prugramma DIMZAL permette d’anticipà a prugressione di u focu è di valutà e distanze di securità nant’à u terrenu per i spenghjifochi, assicurendu li l’attrazzi ammaniti per a prutezzione di quelli chì lottanu. À tempu, anu sviluppatu i cercadori di l’Università di Corsica è di u CNRS un lugiziale à destinazione di i prufeziunali. Battizatu « Fore fire », permette di fà simulazione per valutà a prupagazione di un focu è u so dinamisimu pigliendu in contu parechji fattori, cum’è u ventu, è pusiziunendu lu nant’à Google Earth.
D’altronde, quelli chì ne anu bisognu à l’ogni ghjornu contanu assai nant’à ste tecnulugie nove da avvià li in e so prese di decisione per gestisce megliu e situazione di crisa in tempu reale. « Ci permettenu ste spertizie di anticipà a dinamica di u focu, d’identificà e parte e più sensibule è di urganizà megliu a nostra azzione arrimbendu si à i dati è à l’infurmazione chì sò purtate à a nostra cunniscenza, face sapè Philippe Caramelle, aghjuntu à u direttore di l’ONF in Corsica. Trattendu si, per un dettu, di e ZAL, ci aiutanu st’arnesi à prevede l’infrastrutture adattate per l’intervenzione da esse più efficaci ».
Ma, da megliurà torna e cundizione d’intervenzione di l’attori di a lotta contru à u focu, ùn contanu di piantà si quì l’Università di Corsica è u CNRS. Per avà, dui prugrammi novi di ricerca strategichi sò per esse validati. U primu, chjamatu « Goliat », per « gruppamentu d’arnesi per a lotta contru à l’incendii è l’accunciamentu di u territoriu », duverebbe assucià l’Università di Corsica / CNRS, u PNRC, i dui SIS di l’isula, l’ONF, l’università Ecchisi-Marseglia è un’intrapresa chì serà selezziunata da sviluppà arnesi novi d’aiutu à a decisione. In quantu à u sicondu, si scrive in un prugramma europeu di cuuperazione in giru à i fochi di furesta, da studià e vulnerabilità di l’abitazione di pettu à i fochi per urganizà megliu a so prutezzione. Un’operata tamanta da mette in ballu cù a listessa necessità di cunnosce megliu per pudè luttà.
