Dui designeri di a residenza d’artisti di l’Università di Corsica anu travagliatu nant’à a valurisazione di sta materia assai bundante ma sempre sfruttata pocu inde l’isula. U scopu : circà manere nove di creà per sviluppà prugetti innuvanti.
U scopu hè chjaru : si tratta di rinuvellà u sguardu nant’à a lana corsa, circhendu usi innuvanti da pudè valurizà sta materia. Per a quarta edizione di Fabbrica Design, una residenza d’artisti designeri messa in ballu in u 2014 da a Fundazione di l’Università di Corsica è a filiera Arte plastiche è arte appiecate per sviluppà prudutti in giru à e materie ricacciate da u territoriu isulanu, dui giovani designeri anu travagliatu nant’à a valurisazione di sta materia bundante ma sempre sfruttata pocu inde l’isula.
Ritenuti da un cumitatu di selezzione dopu à una chjama à prugetti, Pauline Bailay, 24 anni, è Hugo Poirier, 25 anni, diplumati da a Scola Boulle è di l’ENSCI, si sò buscati una borsa da pudè mette in ballu sperimentazione nant’à a lana corsa mentre quattru mesi arrimbendu si à u Fab Lab di l’Università di Corsica, cù i strumenti è l’attrazzi necessarii per cuncipisce è fà prototippi di prudutti innuvanti.
Durante a so residenza, anu sfruttatu di manera autonoma e caratteristiche propiu di a lana corsa per imaginà sfarenti tippi di prudutti, da i tappetti muderni à i scarpi passendu per i stucci per urdinatori è smartphone 100% di lana. U scopu : prupone prototippi da sviluppà à fiancu à artisgiani lucali per travaglià nant’à a trasfurmazione di a materia è avvià si ver’di una cummercialisazione di a so pruduzzione. « L’idea hè di truvà vie nove assucendu parechji settori ecunomichi, cum’è i scarpari è i tissaghjoli, da scopre sbocchi innuvanti per a lana corsa, spiecanu Pauline Bailay è Hugo Poirier. Ùn smintichendu u so caratteru ruvidu assai, si hè trattatu, longu à i nostri travagli, di cunfruntà la à materie diverse per truvà usi altri chè vestimentarii chì a lana corsa ùn hè propiu adattata à u cuntattu cù u corpu ».
Una manera di risponde, dinù, à una prublematica ecunomica in leia cù una risorza sfruttata pocu : nant’à circa 90 tunnellate di lana prudutte ogni annu in Corsica, oghje ghjornu solu 500 chilò sò utilizati. « Sviluppà un prugettu in giru à sta materia antica, purtendu ci un sguardu mudernu per dà un soffiu novu à a filiera pasturale corsa truvendu sbocchi novi, cunsidereghja Jean-Joseph Albertini, chì porta u prugettu Fabbrica Design à l’Università di Corsica. Sti travagli di design devenu permette d’interrugà sti sapè fà è fà nasce idee nove à u cuntattu di a materia, di e nove tecnulugie è di e risorze di u territoriu per trasmette tecniche innuvante ».
Una scumessa tamanta per a sfruttera di a lana corsa. D’altronde, in u filu di i travagli iniziati à Fabbrica Design dapoi u 2014, a squadra pedagogica chì gestisce a residenza d’artisti travaglia dapoi parechji mesi nant’à a securisazione ghjuridica di una marca dipusitata da l’Università di Corsica. U scopu : buscà si a creazione di un label « Fabbrica Design », segnu di a qualità è di u caratteru innuvante di i prudutti cuncipiti in i muri di a residenza d’artisti. « A nostra ambizione hè di pudè acquistà e materie dispunibule nant’à u territoriu isulanu per dà li un veru valore aghjustatu, face sapè Jean-Joseph Albertini. Chì a risorza esiste è tocca à noi à valurizà la per dà li un’utilità suciale è, dopu, ecunomica ».
Cù una spressione maestra chì face da filu per a squadra di Fabbrica Design : fà ciò ch’omu pò cù ciò ch’è no avemu induve ci truvemu.
