Per via di un prugettu di ricerca cù u laburatoriu Stella Mare è a sucetà Acquadea di u gruppu Gloria Maris, mettenu in ballu l’Università di Corsica è u CNRS una sperimentazione in acquacultura multitrofica nant’à u chjosu marinu di i Sanguinari. U scopu : definisce un mudellu di pruduzzione duraticcia è diversa.
Crédits photo Laboratoire StellaMare / Université de Corse
Cumu si puderà fà à rende l’attività acquacule più perfurmante è più duraticce ? Hè ghjustu à puntu u scopu di un gran’ prugettu di ricerca messu in ballu da l’Università di Corsica è u CNRS. U so nome ? Bio-attenuazione in acquacultura integrata multitrofica (BioAttaqua). Dapoi parechji anni, mette in associu stu prugramma europeu u laburatoriu Stella Mare (Università di Corsica – CNRS) è u gruppu Gloria Maris, u capimachja francese di l’acquacultura marina, inde una sperimentazione in acquacultura integrata multitrofica (AIMT) nant’à u chjosu marinu di i Sanguinari, in Aiacciu, rinumatu per a so pruduzzione artisgianale è rispunsevule. L’hà messa in risaltu u Labellu Rossu chì pruibisce i trattamenti antibiotichi mentre a vita sana di i pesci è chì impone una densità d’allevu sottu à i 20 chilò per ogni metru quadratu.
Crédits photo Laboratoire Stella Mare (CNRS/Université de Corse)
Daretu à st’acronimu, affacca in fatti una tecnica propiu innuvante è carca à prumesse. Hà per scopu l’AIMT di valurizà l’ambiu di l’acquacultura marina integrendu ci parechji elementi di a catena alimentaria da rende a pruduzzione più diversa inde una logica di sviluppu duraticciu. In più di a bocca d’oru, di e laurate è di e ragnole allevate sopra locu, hà accoltu dinù u situ i zinzi, i lucapanti, l’ostrice sparte è e crinte nate nant’à a piattaforma Stella Mare. U scopu hè di ghjunghje à allevà ste spezie lucale vicinu à i chjosi per i pesci, per parte per via di i nutrimenti ch’elli ùn anu micca surpati. « Cunsiste u studiu à valutà a capacità di ste spezie à ghjuvà si di i ghjetti di a piscicultura per a so criscenza è di fatti à buscà si una parte di sti nutrimenti chì venenu da a pruduzzione di pesci è chì si ritruvavanu fin’à tandu inde l’ambiu, spieca Brian Four, ingenieru di ricerca in carica di u prugettu BioAttaqua à Stella Mare. U nostru scopu hè di andà sempre di più luntanu inde sta dimarchja d’acquacultura di qualità, duraticcia è ragiunata, chì possa risparmià à tempu l’ambiente è a pruduzzione. » Hè tamanta l’imbusca.
Crédits photo Laboratoire Stella Mare (CNRS/Université de Corse)
Oghje ghjornu, arreca l’acquacultura guasi a metà di u pesciu cunsumatu inde u mondu sanu, secondu l’Urganisazione di e Nazione Unite per l’Alimentazione è l’Agricultura (FAO). À sente e predizzione, duverebbe cuntribuisce l’acquacultura à 62 % di l’offerta mundiale toccu u 2030. Invece, s’ellu hè efficace stu metudu di pruduzzione, chì permette di pruvede u pesciu à i cunsumatori tuttu l’annu, fendu calà a pressione nant’à a pruvista salvatica, ponu avè un impattu st’allevi, quand’elli sò intensivi, nant’à l’ambiente per via di i ghjetti inde l’ambiu marinu (feccie è lenghjicheghji), chì ponu disturbà l’equilibrii di l’ecusistemi cum’è per un dettu a catena alimentaria d’altre spezie. Hà per scopu l’acquacultura integrata multitrofica di mette in ballu un’altra logica, passendu da un allevu tradiziunale, chì cunsiste à nutrisce tutte e spezie, à un allevu più diversu chì permette di ricreà un ecusistema cù unepoche di spezie « cumplementarie. » Sò tandu nutrite certe spezie ma micca tutte, chì dipendenu unepoche di i ghjetti di l’altre per u so sviluppu, cum’è inde l’ambiu naturale.
Nant’à u situ di i Sanguinari, studieghjanu tandu i cercadori di Stella Mare i tassuli di sopravivenza, di criscenza è d’assimilazione di e spezie per definisce e pratiche e più efficace da mette in ballu, u so impattu nant’à l’ecusistema, in particulare nant’à i fondi marini è nant’à a salute di e spezie. Cunsiste per un dettu a sperimentazione à ghjuvà si di l’urganisimi opportunisti chì manghjanu i ghjetti sott’à i chjosi marini cum’è e crinte o i lucapanti per cunsumà e feccie è i lenghjicheghji chì sortenu da i chjosi, ch’elli abbisognanu per a so criscenza o puru e cunchiglie chì ghjovanu da filtri cum’è e moscule o l’ostrice sparte, chì ponu limità i ghjetti organichi di modu à megliurà a qualità di l’ambiu. Tandu, hè doppiu l’obbiettivu : accresce a so pruduttività, arrimbendu e so ricerche à unepoche di spezie lucale è chì ponu esse avvalurate inde u cummerciu, da mantene l’aspettu duraticciu è rispunsevule di sta filiera. « U fattu di rende a pruduzzione più diversa per via di spezie nove hè dinù una manera di pudè la securizà, stima Chloé Barrier-Loiseau, ingeniera è rispunsevule qualità è ricerca è sviluppu di u chjosu marinu d’Aiacciu di Gloria Maris. L’idea nostra hè di avvià ci ver’di un’acquacultura sempre più virtuosa à u livellu eculogicu, mantinendu un livellu di pruduzzione chì ci hà da guarantisce una durabilità d’un puntu di vista ecunomicu, inde un’attività chì ferma assai vulnerabile, in particulare di pettu à e cundizione climatiche o ambientale. » Un versu à tempu eculogicu è ecunomicu, in fatti, per circà à inventà l’acquacultura di dumane.
Crédits photo Laboratoire Stella Mare (CNRS/Université de Corse)
Lugliu 2022
