Title Image

Fabbrica Design, a creazione arrimbata à u territoriu

Ogni annu, a Fundazione di l’Università di Corsica è a filiera d’Arte mettenu in ballu a residenza d’artisti-designer “Fabbrica Design”. U scopu : esplurà manere nove di creà è di pruduce, arrimbendu si à e risorze ricacciate da u territoriu isulanu.

 

Hè simplice a filusufia di u prughjettu : si tratta di purtà un sguardu novu nant’à e tradizione à manu, circhendu à sfruttà e risorze lucale di manera nuvatrice. Dapoi u 2014, a Fundazione di l’Università di Corsica, in cullaburazione stretta cù a filiera d’Arte plastiche, anu fattu a scumessa di creà una residenza d’artisti-designer in Corti da lancià un travagliu d’esplurazione in giru à materiali ricacciati da u territoriu isulanu. U nome di u prughjettu : Fabbrica Design.

 

Inde stu quadru, l’università lampa ogni annu una chjama à candidatura da pudè accoglie giovani artisti, designer, architetti, è diplumati novi di scole d’arte o di design chì facenu valè un prughjettu in giru à un materiale identificatu capunanzu. U sbucinà di l’affare ? Dopu à esse statu sceltu da un cumitatu di selezzione, si busca u candidatu ritenutu una borsa da pudè sperimentà forme nove di design mentre quattru mesi, ghjuvendu si di u Fab Lab di l’Università da pudè cuncepisce prototippi à tempu uriginali è utili. Una sorte di « mini-laboratoriu » da pudè imaginà è innuvà, assucendu e scumesse artistiche è quelle di a pruduzzione. “Raprisenta Fabbrica Design una scumessa impurtante per a Corsica, spieca Graziella Luisi, a direttrice di a Fundazione chì mette in ballu u prughjettu. Al di là di a pruduzzione estetica di oghjetti, permettenu ste residenze di mette in anda una riflessione vera nant’à l’usi, e putenzialità di i materiali è di creà una dinamica in giru à e risorze lucale. Per un dettu, hè stata cunsacrata à u legnu a prima edizione cù Sébastien Cordoleani, ciò chì ci hà permessu di riflette à e prublematiche in giru à sta filiera custì è à a valurisazione di i so prudutti”.

Un altru esempiu à fà valè : quellu di Yohan Trompette è di Quentin Vuon. Tramindui laureati di a siconda edizione di Fabbrica Design, anu messu in ballu un prughjettu in giru à u suveru corsu, per circà à valurizà sta materia bundante assai chì ùn hè ancu sfruttata abbastanza in Corsica.

Mentre a so residenza, anu cacciatu fruttu di u carattere propiu di u suveru da imaginà prudutti parechji : sedute di sedinu, manechje di porte, paraventi, o puru e rivestiture di muri. Una somma di prototippi fatti à a manu, in cullaburazione cù artisgiani corsi, chì ponu dinù dà à certi creatori a voglia di avvià si ver’di una dimarchja ecunomica cù una messa in mercatu di a so pruduzzione. Pauline Avrillon, laureata di a terza edizione di Fabbrica Design in 2017, vede d’altronde ste residenze cum’è una manera di avvià si megliu ver’di sti mistieri di a creazione. Giovana designer, hè stata diplumata pocu fà da a scola Boulle è selezziunata per a residenza frà una vintina di candidature affaccate da l’Europa sana. Oramai, n’hè sicura : stu prughjettu hà affermatu e so scelte prufeziunale. Moltu più a so vuluntà di “interrugà i sapè fà, di fà nasce idee essendu in cuntattu cù a materia è e risorze di u territoriu”, spieca Pauline Avrillon. Mentre quattru mesi, si hè attaccata à e terre corse. U scopu di u so travagliu : si tratta di cunfruntà a so qualità è di valurizà le, essendu accumpagnata da artisgiani, da ceramisti è da geuloghi per stu prughjettu battizatu “terre à terre”. Li anu permessu, sti travagli, di fà mattoni à parte si da terre lucale, da pudè fà ne un elementu di custruzzione cum’è, per un dettu, tramizane à l’indrentu di e case. Ma hè dinù una manera di risponde à prublematiche di chì riguardanu l’ambiente : “Ghjuvà si di a terra lucale hà un impattu à u livellu eculogicu, preciseghja Pauline Avrillon. Ci risparmia di fà la vene da u Cuntinente. Hè un materiale chì si pò valurizà s’è omu sà ghjuvà si ne. Serà nanzituttu quessu, u scopu di Fabbrica Design : fà ciò ch’ellu pò omu fà cù e risorze ammanite, in Corsica”.

[titlesidebar margintop=”non” title=”TERRA | Pauline Avrillon”]
[titlesidebar margintop=”non” title=”SUARA | Yohan Trompette et Quentin Vuong”]
[titlesidebar margintop=”non” title=”LEGNU | Sébastien Cordoleani”]