Facenu studii apprufunditi u laboratoriu Stella Mare (Università di Corsica – CNRS) è u Cumitatu regiunale di a pesca marittima è di l’allevi marini di Corsica in giru à sta spezia prutetta è minacciata di smarrisce. U scopu : amparà à cunnosce la, da pudè megliurà a so cunservazione inde l’ambiu naturale.
Crédit photo Tony Viacara – 2021
Hè un pesciu cartilaghjinosu, cù u corpu pianu è spizzatu, diventatu scarsu assai inde u Mediterraniu. U so nome ? U sgherru, o Squatina squatina. Chjamata dinù « sguatronu », hè scritta sta spezia bentica, cù e so nutaghjole larghe, nant’à u listinu di e spezie prutette da a Cunvenzione di Berne dapoi u 1979, ma hè arregulamentata a so pesca inde l’acqua europea solu dapoi u 2009. Cunsiderata frà e centu spezie e più minacciate inde u mondu, hè stata classificata cum’è essendu in « periculu criticu di smarrizione » da l’Unione internaziunale per a cunservazione di a natura (UICN). Anu purtatu a distruzzione di l’abitati di e coste, a soprapesca è l’urbanisazione di u liturale u sgherru vicinu à a smarrizione.
Crédit photo Thibaut Bernard – 2022
Dapoi a fine di u 2021, hè stu pesciu, cunsumatu tempi fà è bundante assai vicinu à u liturale, in core à un prugettu di ricerca, battizatu Corsic’Ange, messu in ballu da u laburatoriu Stella Mare (Università di Corsica – CNRS) è finanzatu da i Fondi europei per l’affari marittimi è a pesca, à nome di a prutezzione di a biodiversità è di l’ecosistemi marini. A so ambizione : cunnosce megliu u sgherru da pudè megliurà a so cunservazione, inde u filu di a dimarchja internaziunale iniziata da l’Angel Shark Conservation Network. « Per via di e pressione antropiche chì sò menu forte è di a pesca chì hà di menu impatti, ferma a Corsica una di l’ultime zone di u Mediterraniu induv’ella cuntinueghja à esiste sta spezia, spieca Eric Durieux, insignante-cercadore in eculugia pescareccia è rispunsevule di stu prugettu per u laboratoriu Stella Mare. Ci dà sta situazione a pussibilità di studià la per cuntribuisce di modu cuncretu à a so prutezzione è, in fine, à u ristoru di e so pupulazione. »
Impegna stu prugettu un altru partinariu impurtante : u Cumitatu regiunale di a pesca marittima è di l’allevi marini di Corsica (CRPMEMC), chì raprisenta i pescadori di l’isula. Da ultimi usservatorii di sta spezia, fermanu i soli à avè una cunniscenza di pratica di a so spluttazione passata è di l’evuluzione di e so pupulazione. Sott’à u cummandu di Eric Durieux è di Caroline Bousquet, ingeniera di studii nant’à stu prugettu, sò stati piazzati i pescadori cum’è una carta maestra inde stu dispusitivu. Per via di quistiunarii è di a marcatura di i pesci mentre e catture fatte à l’ispensata, rinsegnanu i scentifichi sti prufeziunali nant’à
Crédit photo Pierre-Antoine Gougelet – 2022
sta spezia emblematica. U scopu hè di racoglie e cunniscenze nant’à i lochi di ripruduzzione, di migrazione è nant’à u territoriu vitale di i sgherri nant’à u liturale. Sò stati attrazzati una quarantina di pesci, catturati è cappiati da i pescadori, cù l’emettori da permette di studià u so cumpurtamentu inde l’ambiu per via di una reta di recettori piazzati nant’à a costa urientale di l’isula. « Hè impegnata tutta a prufezione inde stu prugettu per circà di mantene sta spezia cù u so valore patrimuniale forte, face sapè Jessica Dijoux, a direttrice di u CRPMEMC. Hè difficiule di usservà la è ferma a Corsica unu di l’ultimi rifugii da pudè la fà, per via di a nostra pesca artisgianale è antica. »
Ottobre 2022
