Studieghjanu i cercadori di l’Università di Corsica è di u CNRS u spaziu è i sapè fà di a furesta d’un puntu di vista transdisciplinariu. U scopu : custituisce una banca di dati da pudè trasmette ste cunniscenze patrimuniale à u gran’publicu.
Crédits photos – Tony Fogacci
Sò state parechje e raprisentazione di a furesta inde i tempi : locu di l’interdettu, di u periculu, di l’imaginariu o di u scunnisciutu… hè dinù un spaziu patrimuniale è identitariu, un rifugiu di tradizione è di sapè fà trasmessi longu à i seculi è sottumessu à parechje mutazione. Dapoi parechji anni, si trova stu locu cumplessu in core à un prugramma di ricerca messu in ballu da l’Università di Corsica è da u CNRS inde u quadru di u prugettu Boost Cultural Competence in Corsica (B3C) di u laburatoriu LISA (Lochi, Identità, Spazii è Attività). Anu per scopu sti travagli, in giru à a piazza accurdata à a Corsica inde a rilazione ch’ella intrattene cù l’ambiu euro-mediterraniu, d’interrugà e pratiche suciale è culturale di a sucetà isulana. Di modu più particulare, s’interessa u versu « sapè fà di a furesta » à i gesti, à a tupunimia, à e tradizione è à l’attività rurale in leia cù stu spaziu d’un puntu di vista materiale è immateriale.
Poste de chasseur sur rocher.
Crédits photos – Tony Fogacci
« U scopu di i nostri travagli hè di custituisce una banca di dati abbastanza larga, à parte da testimunianze è d’usservazione pratiche in leia cù a furesta, spieca Tony Fogacci, prufessore in antrupulugia culturale à l’Università di Corsica è riferente per a parte « sapè fà di a furesta » di u prugettu B3C. Hè cambiata cù u tempu a manera ch’è no avemu di percepisce stu spaziu, ma dinù u raportu suciale di pettu à a furesta, chì si tene oghje un rollu di più ricreativu. A nostra missione hè di analizà sti fenomeni culturali per circà à dà unepoche di chjave di capiscitura. »
Di modu più precisu, portanu e ricerche nant’à a tupunimia specifica di i cacciadori, arricchita da l’inchieste di studienti inde parechji rughjoni di l’isula, è nant’à a custruzzione, l’impiazzamenti è a denuminazione d’anziane carbunare è a so archittura simbolica. « Cunsiste stu studiu à arrecà ci analisi più fine in giru à stu sapè fà precisu assai, chì hà dinù un aspettu iniziaticu è simbolicu, trattendu si di a so trasmessa », accerta Tony Fogacci. Per via di parechji supporti – etnoducumenti, testimunianze urale, cartugrafie, fondi toponimichi… – cercanu à ritruvà i cercadori di l’Università di Corsica l’usi di stu spaziu patrimuniale cù una dimarchja transdisciplinaria. U scopu : acquistà cunniscenze nove nant’à a furesta d’eri è d’oghje, nant’à quelli chì ci campanu è chì a facenu campà ogni ghjornu.
À longu andà, anu da permette sti travagli di arricchisce a Mediateca culturale di a Corsica è di i Corsi (M3C), a piattaforma numerica di u laburatoriu LISA. Per via di cullocchii, di seminarii, di publicazione è di mostre itinerante, anu l’ambizione i cercadori di ristituisce u fruttu di sta ricerca à u gran’publicu. « Si tratta di vulgarizà ste cunniscenze cù, in u listessu tempu, un scopu di trasmissione ver’di e generazione nove, da ch’elle ritruvessinu a leia cù a natura è u patrimoniu di a muntagna », indetta Tony Fogacci.
Ma anu un’altra vucazione sti travagli. Arreca l’analisi antropologica di a furesta è di i sapè fà tradiziunali in leia cù u focu, una cuntribuzione à u prugettu « Fochi » di l’Università di Corsica (Laburatoriu SPE Scenze per l’Ambiente, Università di Corsica / CNRS), un prugramma dedicatu à e sperimentazione in giru à l’incendii, da aiutà i prufeziunali à luttà megliu contru à sti fenomeni cù parechji arnesi numerichi di simulazione è d’anticipazione.
Poste de chasseur marqué.
Crédits photos – Tony Fogacci
Ottobre 2022
