Dapoi u 2016, a squadra d’accolta Bioscope Corsica Mediterraniu di l’Università di Corsica face ricerche nant’à l’epitate E è i patogeni in leia cù e zecche. U scopu : mette in ballu un sistema d’alerta per prevene i risichi d’epidemia.
Cunnosce megliu e malatie infezziose da pudè le parà megliu. Eccu u scopu di e ricerche messe in ballu da a squadra d’accolta Bioscope Corsica Mediterraniu di l’Università di Corsica. Dapoi u 2016, sta squadra, chì face da intenna per a regione PACA è a Corsica in leia cù a reta Sentinelles di l’Inserm, hè in carica di u seguitu epidemiologicu è virologicu di e malatie infezziose inde l’isula. Portanu in particulare i travagli di i so cercadori nant’à dui generi di malatie dette « infezziose » : l’epatite E è i patogeni in leia cù e zecche.
« Fidighjemu sti fenomeni per custituisce banche di dati epidemiologichi, virologichi è serologichi nant’à u territoriu corsu, spieca Alessandra Falchi, a direttrice di l’EA Bioscope Corsica Mediterraniu. Hè impurtante assai per pudè analizà e cause di a cuntaminazione è di a trasmissione, per capisce megliu a dinamica di ste malatie inde e pupulazione umane è animale ».
Di fatti, in u 2018 anu fattu un studiu di seroprevalenza cù guasi un millaiu di studienti, persunali di l’Università di Corsica è dunatori di sangue corsi per valutà u gradu di spusizione di a pupulazione isulana à 16 agenti infezziosi, frà i quali l’epitate E, cagiunata da un virus chì culpisce u fegatu.
U scopu : identificà i fattori di risichi o chì prutegenu di pettu à ste malatie infezziose. I primi risultati buscati da i cercadori anu permessu di fà vede ch’ella era tocca a Corsica in particulare da certi fenomeni. In fatti, hà digià scuntratu 60 % di a pupulazione corsa u virus di l’epatite E, contru à 22 % in media à u livellu naziunale. « Certe regione induve si cunsuma assai prudutti cù u fegatu di porchi facenu vede una seroprevalenza abbastanza forte, preciseghja Alessandra Falchi. Invece, per ciò chì tocca à a Corsica è in particulare a pruduzzione di figatellu, ci simu avvisti chì l’allevi tradiziunali chì sò praticati inde l’isula cù un travagliu artisgianale permettianu di fà calà u risicu d’infezzione ».
Facenu à tempu i cercadori ricerche di più diverse inde u quadru di stu partinariatu cù l’Unità di i virus emergenti d’Ecchisi-Marseglia, a reta Sentinelles di l’Inserm è u stabilimentu francese di u sangue, per identificà d’altri fattori di trasmissione di u virus à l’omu, cum’è a cunsumazione di l’acqua. Inde u listessu tempu, s’interessanu dinù e ricerche di a squadra d’accolta Bioscope Corsica Mediterraniu di l’Università di Corsica à i patogeni in leia cù e zecche, per via di u vettore di trasmissione ch’elli raprisentanu. Dapoi u 2016, sò messi in ballu studii inde i macelli cù i prilevamenti di zecche nant’à e pelle di buini. U so scopu : analizà sti parasiti per cunnosce megliu e patulugie chì sò trasmesse per via di ste zecche. D’altronde, hà permessu stu prugettu scentificu d’identificà in Corsica i patogeni chì ùn eranu ancu stati messi à palesu in Europa fin’à tandu.
Face dinù l’isula da porta d’entrata ver’di u cuntinente europeu per certe malatie chì affaccanu da e sponde suttane di u mediterraniu, è chì si puderianu sparghje.
« Riguardu a so pusizione geugrafica è l’isulanità, si trova a Corsica à u centru di migrazione umane è animale, soprattuttu per via di l’acelli, spieca Rémi Charrel, prufessore in virulugia medicale à u Polu Infezziulugia di l’Assistanza Publica di l’Ospidali di Marseglia. Pò esse l’isula à tempu un locu per mandà l’alerte per l’Europa è una zona di spertizia. Tandu, hè impurtante d’accumpagnà u sviluppu di u laburatoriu di virulugia di l’Università di Corsica da ch’ellu possi ghjucà un rollu propiu maiò in quantu à a surveglienza ».
Da stu puntu di vista, sò chjari l’obbiettivi di a squadra d’accolta Bioscope Corsica Mediterraniu di l’Università di Corsica : à longu andà, si tratta di mette in ballu un sistema d’alerta inde l’isula per permette à tempu di urganizà misure di prevenzione è di gestisce un’epidemia à u livellu lucale.
Ghjugnu 2019
