Nata dopu à un travagliu di ricerca, di racolta è di numerisazione di i sapè isulani, arreca a M3C di l’Università di Corsica è di u CNRS una banca di dati tamanta à a cumunità universitaria è u gran’publicu. A so missione : produce è sparghje i sapè scentifichi è culturali à prò di l’attori di u mondu universitariu è di a sucetà civile.
Si tratta di una banca di dati tamanta, cumposta d’articuli, di libri, di manuscritti, di ritratti, di musiche, d’arregistramenti è d’altri ducumenti, chì ricustituisce à pocu à pocu un patrimoniu isulanu à le volte tagliatu à pezzi è spargugliatu. Cù più di 43 000 ducumenti, 33 cullezzione patrimuniale è 18 mostre virtuale, arreca a Mediateca Culturale di a Corsica è di i Corsi (M3C) di l’Università di Corsica Pasquale Paoli è di u CNRS una mansa di risorze in giru à a cunniscenza di l’isula. Principia a so creazione di 2008. Abbisogna l’apertura in Corti di u laburatoriu « Lochi, Identità, Spazii, Attività » (UMR 6240 LISA Università di Corsica/CNRS), solu laburatoriu di Corsica dedicatu à a ricerca in Scenze Umane è Suciale, ch’ella si mettissi in ballu una strategia fundata nant’à e tecnulugie nove di u numericu, appiecate à u duminiu corsu, à tempu ch’ella si pone a quistione di custruisce un centru d’archivii ducumentarii tradiziunale cunsacratu à u corsu è di modu più largu à e lingue è e literature minurate.
Venerianu tremindui in appoghju per vie di e so funzione scentifiche, di a furmazione per a ricerca è di una pulitica di restituzione di e cunniscenze ver’di a sucetà civile, capace à favurizà u sviluppu di u territoriu per a pruduzzione è a demucratisazione di i sapè. Hè tandu ch’ella si hè posta a stalca cuncettuale di a M3C iniziata è purtata da u prufessore Dumenica Verdoni. Hà per scopu sta piattaforma numerica di scenza aperta, finanzata da a Cullettività di Corsica, da u Statu è da l’Europa, di ricustituisce e cunniscenze culturale è i sapè scentifichi, da pudè li diffonde di modu gratisi à tutt’ognunu, frà a cumunità universitaria è a sucetà civile. « Raprisenta nanzituttu sta banca di dati a vitrina digitale di e pruduzzione scentifiche di u laburatoriu LISA, spieca Christophe Luzi, ingeniere di ricerca abilitatu à direge e ricerche à u CNRS è rispunsevule scentificu di a M3C. Hà per obbiettivu stu prugettu trasversale di participà à l’irradiamentu di sti sapè, di modu assai largu, seguitendu una logica di mediazione scentifica. » Nata dopu à un travagliu paziente assai di racolta, d’inventariu è di numerisazione di e cunniscenze, si scrive a M3C inde una dimensione pluridisciplinaria chì adunisce in particulare e scenze di l’educazione, a literatura, a storia, a linguistica, l’antrupulugia, a suciulugia o l’archeulugia. Anu permessu parechji partinariati istituziunali cù unepochi d’attori maiò cum’è l’Istitutu Naziunale di l’Audiovisivu (INA), u Ministeriu di a Cultura, l’UNESCO, u prugramma EMAN di l’UMR THALIM (Università Sorbonne Nouvelle/ENS/CNRS), è parechji istituti di ricerca, di fà l’inventariu di a fonte corsa chì esiste inde l’archivii naziunali è internaziunali.
Frà i ducumenti emblematichi in accessu liberu, si trovanu per un dettu La Istoria di Corsica di Anton Pietro Filippini, publicata in u 1594, currispundanze di Pasquale Paoli di u XVIIIu seculu o puru i corsi manuscrutti in latinu di a prima università di Corsica, in u 1765. Di pettu à a difficultà cagiunata da a spargugliera di ‘sse fonte nant’à a Corsica, di a cunfidenzialità o di a cunservazione precaria di certi ducumenti, si scrive in fatti a M3C inde un prucessu di patrimunialisazione da pudè risparmià sti sapè per via di l’arnese numericu, da ch’elli sianu trasmessi megliu, dinù cù una prugrammazione evenimenziale ricca è varia. « Hè dinù a Mediateca un spaziu cullaburativu chì permette à ognunu di cuntribuisce à arricchisce a fonte è i studii nant’à a Corsica, accerta Christophe Luzi. Tutt’ognunu ci pò prupone i so ducumenti da ch’elli sianu dipusitati. U nostru scopu hè di custituisce un veru ecusistema participativu in giru à a cunniscenza, impegnendu a sucetà civile inde stu prugettu da fà lu campà. » Inde stu spiritu, si hè attrazzatu u laburatoriu LISA, subbitu cù a so apertura, cù un serviziu dedicatu à a numerisazione ducumentaria, da pudè cunservà è ricustituisce sta lascita culturale è patrimuniale, da pudè la valurizà megliu.
Sò dinù stati creati d’altri ecchippamenti dedicati à a diffusione di sti sapè : una sala di cunsultazione ducumentaria ricca di parechje millaie di ducumenti, una sala di numerisazione è una sala d’immersione virtuale muderna à prò di a cumunità di l’insignanti cercadori è di i studienti. « Hè a M3C un arnese sempre in evuluzione, cunsidereghja Christophe Luzi. Testimunieghja dinù di l’arradichera suciale di a ricerca à l’Università di Corsica è di una vuluntà di favurizà u sviluppu di u territoriu isulanu per via di a demucratisazione di i sapè. »
Dicembre 2022
