Università di Corsica / CNRS / Università Nizza Sophia Antipolis : L’Istitutu di studii scentifichi di Carghjese, un « ortu » internaziunale di e scenze in Corsica

Focus

Dapoi l’anni 1960, hà fattu u paese di u Pumonte da puntellu di a ricerca internaziunale cù l’accolta di l’Istitutu di studii scentifichi di Carghjese, un’unità di serviziu di l’Università di Corsica, di l’Università Nizza Sophia Antipolis è di u CNRS. Un locu maiò di a ricerca chì hà un equivalente solu in Francia.

In a cumunità universitaria, basta à ammintà u paisolu di u Pumonte da ch’ellu torni sinonimu d’una sorte di « paradisu » di a ricerca scentifica. Palesa quant’ellu hà sappiutu fà si l’Istitutu di studii scentifichi di Carghjese una riputazione al di là di e fruntiere. À u livellu di a Francia, à fiancu à a prestigiosa Scola di fisica di e Houches, vicinu à u Mont Blanc, Carghjese, veru picculu paradisu à bor’di u Mediterraniu, face parte di i dui lochi maiò di a ricerca scentifica induv’ella grana a riflessione nant’à u mondu di dumane. Creatu di modu ufficiale di lugliu 1960 cù l’impegnu di u fisizianu è teurizianu Maurice Levy è di parechji cercadori, l’Istitutu, natu cù u sustegnu di u CNRS, duvia risponde à un’ambizione di prima trinca : sparte è sviluppà i sapè cù l’adunita di i più grandi spezialisti mundiali in giru à sughjetti scentifichi. Digià tandu, ùn lasciava nisunu dubbitu a qualità di l’intervenanti nant’à i travagli d’altu livellu chì eranu messi in ballu : vene John Bardeen, Premiu Nobel di fisica di u 1962, à travaglià in Carghjese nant’à e stensione di a so teuria di a sopracunduttività, cum’ellu participeghja, in u 1970, u neerlandese Gerardus t’Hooft à i studii chì li purteranu una distinzione simule 29 anni dopu.

 

 

Ma, à l’epica, ci si sbucineghjanu ogni annu solu qualchì scola di fisica teorica toccu l’estate. Ci vulerà à aspettà l’anni 1990, cù l’impegnu di a so direttrice Elisabeth Dubois-Violette, da ch’ellu pigliessi l’Istitutu un altru versu. Per via di un finanziamentu publicu, si busca u stabilimentu lucali novi cù una capacità d’alloghju chì li permettenu di allargà u periudu di e so scole è e tematiche scentifiche. « Hè nanzituttu l’Istitutu un locu di spartera è di trasmessa di e cunniscenze acquiste da furmà giovani cercadori, cunsidereghja Fabrice Mortessagne, u direttore di u stabilimentu dapoi u mese di ghjennaghju di u 2018. Arrimbatu à u scambiu direttu è e ragiunate in un ambiu cunviviale, permette di cunfruntà i punti di vista è di sviluppà a ricerca inde parechji duminii. D’altronde, s’ellu ricevia l’Istitutu à principiu solu i scontri in giru à a fisica, accuglimu oghje ogni disciplina. Oramai, raprisenta a fisica 40 % di e tematiche è simu aperti di più à d’altre scenze, cum’è l’ecunumia ».

Ogni annu, accoglie l’Istitutu di studii scentifichi di Carghjese, liatu à l’Università di Corsica, à u CNRS è à l’Università Nizza Sophia Antipolis dapoi u 1990, una trentina d’evenimenti, nant’à un periudu di 9 mesi, capace à adunisce 2000 participanti, frà i quali guasi 50 % di strangeri. Alluntanati da u ritimu di a vita d’ogni ghjornu, à colpi di telefunate è di lettere elettroniche, in cuntattu cù a natura è i paisani, venenu à insignà sapienti rinumati i sughjetti maiò di a scenza, à scambià in giru à a so sperienza è à sparte e so ultime avanzate cù l’elevi è u gran’publicu. « In ogni locu di u mondu, à u Giappone o à i Stati Uniti per un dettu, hè cunnisciutu u paese di Carghjese da a cumunità universitaria », rimarca Mathias Fink. Fisizianu è prufessore di a Scola superiore di fisica è di chimia industriale di a cità di Parigi, hà fattu stu cercadore di prima trinca circa una quarantina d’affaccate à l’Istitutu di studii scentifichi di Carghjese dapoi u 1995 per travaglià soprattuttu nant’à l’appiecazione di l’onde à l’imageria biomedicale. Un locu adattatu propiu à a meditazione chì hà permessu di sfruttà vie nove per ghjunghje à unepoche di scuperte mundiale. « I scambii trà i fisiziani è i sismologhi inde e scole di Carghjese anu inghjennatu, per un dettu, l’invenzione di un metudu novu, a sismulugia passiva, chì rivuluziuneghja oghje a sismulugia in u mondu sanu, face sapè Mathias Fink. U fattu d’esse in un locu di prima trinca permette di adunisce a cumunità universitaria in giru à perspettive cumune. Tandu, si hè creatu dapoi guasi cinquant’anni in Carghjese bellu più chè un cuncettu : un mudellu ».

Istitutu di Studii Scentifichi di Carghjese

http://www.iesc.univ-corse.fr/