Title Image

L’Università di Corsica, un puntellu per u sinemà di dumane

Dapoi u 2001, hà messu in ballu l’Università di Corsica duie furmazione dedicate à a filiera di u sinemà è di l’audiovisivu. U scopu : furmà una generazione nova di sineasti è di tecniziani per accumpagnà u sviluppu di u sinemà inde l’isula.

 

 

Dapoi una vintina d’anni, face parte di l’ambizione di l’Università di Corsica : dà un rollu maiò à a Corsica inde u sviluppu di l’industria sinematografica. Hè vera ch’ella hè tamanta a scumessa. Ma bisogna à dì ch’ella si hè datu i mezi di fà la l’Università di Corsica. Dapoi u 2001, a so filiera sinemà-audiovisivu, pruposta da u so Istitutu Universitariu di Tecnulugia – IUT, hà messu in ballu duie furmazione dedicate à u settesimu arte nant’à u campus di Corti. U scopu : « furmà inde l’isula una generazione nova di sineasti è di tecniziani per accumpagnà u sviluppu di u sinemà isulanu », spieca Colomba Santonetti. Diplumata da a Scola naziunale superiore di i mistieri di a maghjina è di u sonu, face parte st’insignante di i puntelli di st’ambizione purtata da l’Università di Corsica.

Dapoi una vintina d’anni, hà participatu Colomba Sansonetti à a messa in ballu di e duie furmazione pruposte in Corti inde stu duminiu. Creata in u 2001, una Licenza prufeziunale Tecniche di u sonu è di a maghjina hà per scopu di furmà i studienti à e missione d’assistante inde tutti i settori di a cuncezzione è di a rialisazione audiovisiva. Cuncipita in giru à a tecnica di a maghjina, di u muntame, di u sonu, di a rialisazione è di a pruduzzione, s’accumpagna issa fumazione da un sviluppu di sucetà di pruduzzione è di parechji prugetti. « S’arrembanu i nostri insignamenti à una messa in pratica di l’acquisti, face sapè Colomba Sansonetti. Seguiteghjanu i studienti parechji corsi in priparazione, di filmata è pruduzzione, è passanu in fine à a rialisazione di fizzione, di ducumentarii è di filmi di cummanda ».

Dapoi u 2001, sò stati furmati circa 400 studienti inde u quadru di sta licenza prufeziunale, frà i quali più di 300 tecniziani chì travaglianu in Corsica o altrò. Hà permessu di arrecà cumpetenze tecniche, ma soprattuttu di cuntribuisce à a custruzzione di una filiera chì era abbastanza debbule inde l’isula. « À u livellu storicu, ci hè statu un’attività sinematografica in Corsica inde l’anni 1960 è 1970, ramenta Colomba Sansonetti. Eppuru, toccu a fine di l’anni 1990, ùn avia ancu avutu una strutturazione vera cù tecniziani furmati per risponde à i bisogni di u so sviluppu ».

Inde u listessu spiritu, per accresce e cumpetenze inde u duminiu di i mistieri di u sinemà è di l’audiovisivu, hà messu in ballu l’Università di Corsica, in u 2008, un diploma universitariu (D.U.), chì li hè stata data a rispunsabilità pedagogica à Colomba Sansonetti. Chjamatu CREATACC, per «  Creazione è tecniche audiovisive è sinematografiche di Corsica », issu D.U., co-finanzatu da a Cullettività di Corsica, insegna in giru à a scrittura, a rialisazione è a pruduzzione. Hè cuncipita sta furmazione cum’è una residenza d’artisti per fà spuntà i talenti giovani, limiteghja ogni annu i so effettivi à una duzina di studienti per cunservà st’accustera, è vole furmà autori, rializatori è pruduttori.

Da ch’elli pudessinu esse diffusi à a televisiò è inde i festivali i filmi prudutti inde u quadru di u D.U., a filiera sinemà-audiovisivu di l’Università di Corsica hà fattu un partinariatu cù u Gruppu di ricerca è d’assaghji sinematografichi (GREC) per ch’elli si pudessinu impegnà i studienti inde a so prima rialisazione o pruduzzione. Mentre un annu, facenu u so scenariu, approntanu a so filmata è rializeghjanu u so filmu, aiutati da parechji prufeziunali. Dapoi u 2008 circa 80 studienti isulani, cuntinentali è internaziunali si sò furmati per via di issu D.U. per sviluppà i so prugetti o a so sucetà di pruduzzione. In fatti, sò stati rializati una cinquantina di filmi è di ducumentarii da i studienti di u D.U. CREATACC dapoi a so creazione. N’hà fattu a sperienza Benoît Bouthors. À 28 anni, issu giovanu diplumatu di un BTS in audiovisivu hà sceltu di seguità u so parcorsu per via di issu D.U. ch’ellu hà seguitatu trà u 2013 è u 2014.

« A mo furmazione iniziale di tecnizianu m’hà incuragitu à andà di più luntanu è m’hà datu a voglia di rializà u mo prugettu propiu, spieca Benoît Bouthors. M’hà permessu a furmazione di u D.U. CREATACC di francà u passu di a rialisazione »Risultatu : dopu à sta furmazione è à capu di parechji mesi di travagli, hè pussutu rializà issu giovanu sineastu un sicondu filmu cortu. Titulatu «  Di quà da i monti », si hè ancu buscatu issa fizzione, per l’estate di u 2017, u premiu di u famosu festivale di u filmu di Lama inde u prugramma di i filmi corti.

Da stu puntu di vista, si scrive a dimarchja di l’Università di Corsica inde un cuntestu di rinnovu di u sinemà corsu. Trà e pruduzzione chì venenu à stallà e so camerà inde a regione, i cumedianti chì ci facenu i so primi passi è e creazione isulane chì spuntanu, sti pochi anni hè diventata a Corsica un persunagiu impurtante inde l’industria sinematografica. Conta oramai l’isula circa 250 tecniziani è 150 attori. Megliu : hè statu multiplicatu via cinque in ott’anni u numeru di ghjorni di filmata, d’ogni furmatu, passendu da 225 in u 2009 à guasi 1200 in u 2017, d’appressu à i sciffri di a Cullettività di Corsica. Una dinamica chì si ritrova dinù à u livellu ecunomicu : e filmate permettenu à l’ecunumia lucale di buscà si circa 7 milioni d’eurò ogni annu.

 

Institutu Universitariu di Tecnolugia

Situ di l'IUT di l'Università di Corsica

READ MORE

Filiera Sinemà-Audiovisivu

Situ di a filiera sinemà-audiovisivu di l'IUT di l'Università di Corsica

READ MORE