Di 2016, l’Università di Corsica hà fattu a scumessa di ligà a manu cù u spiritu per via di l’apertura di un « maker space » apertu à ogni publicu. U scopu : dà à u territoriu arnesi di pruduzzione artigianale è industriale.
Ne dice abbastanza u mottu di i lochi nant’à l’ambizione di quelli chì i facenu campà : « passà d’una idea à un prughjettu è da un prughjettu à un ogettu ». Eccu, in corte parolle, ciò chì face l’anima di u « Fab Lab », vale à dì fabrication laboratory, per ripiglià a versione inglese di l’iniziu. Hè scunnisciuta abbastanza l’appellazione ella stessa. Eppuru, di 2016 hà messu in ballu un « Fab Lab » l’Università di Corsica, stallatu à u Palazzu naziunale in Corti, induv’elle anu pigliatu pusessu di i lochi una seria di mascine-attrazzi.
Di manera cuncreta, si tratta di un spaziu dedicatu à i designeri, artisti, studienti o intraprenditori d’ogni generu chì volenu passà da a cuncepitura à u sviluppu di u so prughjettu, arrimbendu si à una seria d’arnese da cuncipisce è rializà u so ogettu in e limite di ciò chì si pò imaginà.
In fatti, si tratta di un locu di cuncipitura, cù urdinatori, lugiziali, mascine à cummanda numerica, stamperie 3B, arnesi di taglia cù u laser o d’altri attrazzi in puntu di a tecnulugia da fà ch’elli pudessinu i creatori varii cuncretizà a so idea sott’à a forma di un protottippu. « U nostru scopu hè di fà di manera ch’elli possinu passà l’utilizatori di u Fab Lab da a teuria à a pratica cunfruntendu si à a cuncipitura tecnica di u so prughjettu, spieca Vannina Bernard-Leoni, a direttrice di u polu innuvazione è sviluppu à l’Università di Corsica. L’idea maiò hè di fà protottippi è di pruduce in Corsica, fendu affaccà una generazione d’artigiani chì pruducenu à u livellu lucale. U settore artigianale è industriale raprisenta una parte debbule assai di u pruduttu internu sanu di l’isula. Hè per quessa chì vulemu dà à u territoriu arnesi di pruduzzione per cuntribuisce à u rinnovu di l’ecunumia isulana, utilizendu quant’è pussibule i materiali lucali ».
Di fatti, hè accessibule l’arnese à ogni publicu, i studienti soprattuttu, ma dinù à i prufeziunali è l’artigiani chì volenu ghjuvà si di e mascine è di e squadre tecniche messe à dispusizione da u Fab Lab. Une risposta à un’attesa spressa soprattuttu in u duminiu di l’artigianatu. D’altronde, dapoi u 2016, hà accoltu u Palazzu naziunale parechje decine di studienti intraprenditori è di prufeziunali da mette in ballu u so prughjettu è da innuvà lighendu a manu cù u spiritu. Studiente-intraprenditore à l’Università di Corsica, Jean-Luc Alfonsi hà, per un dettu, fattu a scumessa di sviluppà u so cuncettu trà i muri di u Fab Lab.
Durante un mese, st’ingeniere-designere di furmazione hà circatu à mette in musica un prughjettu di creazione di una gamma di luminari, chjamata Piatoni, fatti à a cummanda numerica è livrati piani, muntatoghji da l’utilizatori stessi. « M’anu permessu l’arnesi di u Fab Lab di l’Università di Corsica di pruvà à rializà u pruduttu, tecnicu assai, ma dinù di fruttà parechje materie da cuncepisce lu, cum’è u legnu di piobbu, u plexiglas è u cartone, preciseghja Jean-Luc Alfonsi. Arrimbendu mi à e tecnulugie nove, sò riesciutu à prupone una scelta larga di pezze artigianale cù una qualità alta assai di finizione ».
Un prughjettu chì si puderia cuncretizà in furia, passendu da a teuria à a pratica cù l’impegnu di u Fab Lab di l’Università di Corsica, da francà u passu di a cummercialisazione. « Anu digià francatu u passu unepochi di prufeziunali, creendu attività nove dopu à u so passeghju in i nostri attelli, face sapè Vannina-Bernard-Leoni. Hè u scopu ch’è no circhemu à tuccà : trasmette quant’è pussibule u spiritu « maker » inde u mondu ecunomicu corsu ».
