Dapoi u mese di sittembre di u 2017, u prugramma AGRIEX messu in ballu da l’Università di Corsica cerca à valurizà e risorze naturale vegetale di l’isula. Per via di un partenariatu cù l’intraprese private, stu prugettu d’innuvazione vole prumove e pruduzzione chì esistenu nant’à u territoriu corsu.
Hè simplice a filusufia di u prugramma : si tratta di valurizà e piante arumatiche è medicinale (PAM) specifiche di a Corsica per innuvà è truvà sbocchi novi à i prudutti ricacciati da u territoriu isulanu. U so nome ? AGRIEX, un acronimu sceltu bè per assucià l’agricultura è l’eccellenza.
Dapoi u mese di sittembre di u 2017, sò à fiancu l’Università di Corsica è u CNRS, parte di u Laboratoriu Scenza per l’Ambiente, per mette in ballu stu prugramma, finanzatu da u FEDER è a Cullettività di Corsica, in giru à a valurisazione di e spezie vegetale è l’agro-risorze di l’isula. U scopu : cuntinuà a valurisazione di l’olii essenziali, cum’è a murza, cultivata nant’à circa 300 ettare in Corsica, ma circà dinù appiecazione nove da diversificà l’offerta arrimbendu si, per un dettu, à l’agrumi è i derivati d’olii vegetali. « Permettenu i PAM di buscà si l’olii essenziali, prudutti cù un valore aghjustatu forte è cumpunenti principali di a fabricazione di prufumi è cusmetichi », spieca Félix Tomi. Prufessore di chimia à l’Università di Corsica è co-rispunsevule di u prugettu AGRIEX à fiancu à Liliane Berti. Travaglia stu cercadore cù una vitina di scentifichi da valurizà i PAM specifichi à a Corsica da ricercà appiecazione nove, soprattuttu in u duminiu di i cusmetichi cù l’attività anti-ossidente è anti-infiammatorie di l’olii essenziali è di i stratti vegetali.
Per un dettu, travaglianu e squadre di l’Università dapoi parechji mesi nant’à un prugettu di strazzione d’olii essenziali ricacciati da i zesti d’agrumi « da pudè ottene prudutti ricercati assai per l’odori, in particulare per a cuncipitura di i prufumi », prughjetta Félix Tomi.
In u listessu tempu, mettenu e mani in pasta i circadori di l’Università di Corsica è di u CNRS in particulare nant’à i turtelli d’alivi, vale à dì ciò chì ferma dopu a strazzione di l’oliu, da ghjunghje à una seria di prudutti derivati di l’oliu d’alivu, ma dinù nant’à e mulecule prisente inde l’alghe marine o e biacche di vigna. Palesa quant’ellu pò tuccà u prugettu una mansa di filiere agricule, da a viticultura à l’agrumicultura, fin’à l’oleicultura. « L’idea hè di ghjuvà si in i laboratorii di ciò ch’elle facenu e piante di manera naturale per mette in sesta metudi biotecnichi è pruduce e mulecule arumatiche, preciseghja Jacques Maury, maestru di cunferenze in biochimia à l’Università di Corsica. Ci deve permette di tuccà rindimenti più boni è di accresce u valore aghjustatu di i prudutti, ciò chì puderia inghjennà sorze di rivenuti per i pruduttori di e sfarente filiere agricule ».
Per fà la, l’Università di Corsica è u CNRS travaglianu à fiancu à trè intraprese di l’isula, Corsica Essences, Solyvia è Teppe Rosse, da valurizà megliu i PAM mettendu in cumunu a materia prima è i sapè fà chì permettenu d’investisce mercati novi è di diversificà l’offerta. Una manera di sorte di i laboratorii per rende accessibule e cumpetenze di l’universitarii è i frutti di a ricerca à prò di l’intraprese corse chì travaglianu in u settore è abbisognanu à diversificà si.
Patrone di a sucetà Corsica Essences, un laburatoriu di creazione di prufumi è di cusmetichi stallatu dapoi u 2005 in u Sampolu, inde l’Altu Taravu, Patrick Paquet mette assai speme inde u prugettu AGRIEX. Sicondu ellu, l’assistanza tecnica è scentifica di i cercadori hè un veru attrazzu da pudè « megliurà i rindimenti arrimbendu si à i travagli di spezialisti di l’enzimi. Hè indispensevule per ch’è no possimu diversificà a nostra offerta prupunendu prudutti novi di qualità à lancià nant’à u mercatu, cunsidereghja Patrick Paquet. Pò creà nove nichje è sbocchi per certi ghjetti agriculi trasfurmati, capace à inghjennà un ritornu ecunomicu chì ùn eranu ancu à pensà fin’à avà per l’agricultori ».
Un’imbusca tamanta per e risorze chì esistenu nant’à u territoriu corsu, in un cuntestu di criscenza forte assai in giru à i prudutti naturali. Oghje, si tratta di parechji milioni di sciffru d’affari per u settore in Corsica, cù un mercatu duminatu assai da a murza (circa 800 chilò prudutti ogni annu).
In u 2017, i PAM anu raprisentatu un mercatu mundiale di 64 milliarde di dollari è di più di 35 000 piante.
