Dapoi a so creazione in u 2014, hà iniziatu stu cuncorsu d’idee di a Fundazione di l’Università di Corsica dedicatu à l’innuvazione guasi un millaiu di studienti à a cultura di l’intrapresariatu. A so ambizione : aiutà li à trasfurmà un’idea in prugettu d’intrapresa.
Hè un evenimentu maiò di a Fundazione è un tempu forte di l’annu universitariu : u Challenge Innovation. Dapoi a so creazione in u 2014, inizia ogni annu stu cuncorsu d’idee dedicatu à l’innuvazione studienti di sfarente filiere à a cultura di l’intrapresariatu. U cuncettu : mentre trè ghjorni, travaglianu in squadra i studienti da mette in ballu un prugettu, arrimbendu si à unepochi di sperti, di capi d’intrapresa, d’insignanti o di startupers, nanzu di prisentà u so cuncettu à una ghjuria. « U nostru scopu hè di inizià i giovani à a gestione di prugetti, sullicitendu a so capacità à innuvà per trasfurmà idee originale in prugetti di start-up, chì appiinu un impattu sucetale è chì rispondessinu à l’imbusche à u livellu territuriale, spieca Graziella Luisi, a direttrice di a Fundazione di l’Università di Corsica. Cunsiste u metudu à accumpagnà li, mettendu à a so dispusizione i mezi tecnichi è umani da pudè li cuncettualizà. »
Mentre i trè ghjorni di u Challenge, si buscanu i cuncurrenti a spertizia o i cunsiglii di coachs, ingenieri o tecnichi da rende u so prugettu campatoghju d’un puntu di vista tecnulogicu. Li permettenu dinù l’arnesi è l’ecchippamenti numerichi prisenti à u Fab Lab di l’Università di Corsica di fà i so primi prototipi. À u termine : un sviluppu di u spiritu creativu è di u travagliu di squadra, l’acquistu di cunniscenze nant’à e tecnulugie numeriche è u mondu di l’intrapresa, vale à dì un pannellu largu di cumpetenze da permette à i studienti di apprudà a so vita prufeziunale futura. À a vigilia di u so decesimu anniversariu, hà iniziatu u cuncorsu guasi un millaiu di studienti à a cultura di l’intrapresariatu. Frà i prugetti chì anu marcatu u cuncorsu, si trovanu per un dettu un’appiecazione smartfonu per a gestione di a vita universitaria, un braccialettu cunnettatu chì cuntene i dati di salute di i pazienti, qualchì ricoveru di staziunamentu imaginatu per e bissiclette elettriche…
Ne caccianu parechji insignamenti i studienti chì anu participatu à l’ultime edizione di u Challenge. « M’hà permessu stu cuncorsu di cunfruntà mi di modu cuncretu à a messa in ballu di un prugettu, essendu accumpagnata, è m’hà datu a voglia di superà mi per riesce à fà la », stima Carla Goalard. Hà participatu sta studiente di 22 anni, scritta à a scola d’ingenieri PaoliTech, à a 9esima edizione di u Challenge, in u 2022. Chjamatu Aquasol, hà per scopu u so prugettu di riguarà l’acqua prisente inde l’umidità per via di un cullettore. Li hà permessu di esse selezziunata frà i laureati è di participà à un viaghju di studii à u Regnu Unitu. D’altronde, ùn fermanu a maiò parte di l’idee nate mentre u cuncorsu in u solitu campu di a teuria : seguiteghjanu a so avventura un terzu di i participanti sott’à u statutu di studiente impresariu per via di u « Pôle Pépite » di l’Università di Corsica. Frà i prugetti in gestazione, ci hè per un dettu a Zitellina Box, una scatula educativa per sensibilizà i zitelli à l’imbusche eculogiche. Imaginata da Laura Nivaggioli, Victor Godde è Carla Trombella, piglia forma à pocu à pocu st’idea sott’à l’egida di una cuuperativa spezializata inde l’accumpagnamentu di quelli chì portanu i prugetti d’intrapresa. « Ci hà fattu vede u travagliu rializatu mentre u cuncorsu ch’ellu era campatoghju u nostru prugettu, spieca Laura Nivaggioli, una studiente di 22 anni in licenza prufeziunale d’intrapresariatu. Simu pussuti valutà u so interessu è mette in ballu un pianu finanziariu chì ci hà da permette di sviluppà lu, travagliendu nant’à a marca. » Serà in fatti custì una di e sfide di u Challenge innovation : passà da a grammatica à a pratica, franchendu u passu di a creazione d’intrapresa. Da permette à i so laureati di lancià si, prevede u cuncorsu una seria di premii – dutazione finanziare, viaghji di studii, materiale infurmaticu… « Si tratta di dà li i mezi di inizià un veru prugettu è di accumpagnà li inde a so brama d’innuvà, cunsidereghja Graziella Luisi. Sempre cù u listessu scopu : risponde à l’imbusche di u territoriu è à i so bisogni di sviluppu. »
Ferraghju 2023