Università di Corsica : Una ricerca à l’ascoltu di u territoriu

Sti pochi anni, l’Università di Corsica hà messu in ballu assai prugrammi di ricerca impurtanti in parechji duminii. U scopu : cuntribuisce à u sviluppu è à a strutturazione di una sucetà di a cunniscenza, favurizà l’emergenza di un’ecunumia di pruduzzione è risponde à e prublematiche è à l’attese di u territoriu isulanu.

Si tratta di unu di i puntelli di a pulitica di l’Università di Corsica : « fà di manera ch’ella sia a ricerca un fanale da schjarisce l’avvene », riassume u prufessore Marc Muselli, vice-presidente di a cummissione di a ricerca di l’Università di Corsica. U scopu hè chjaru : si tratta di sorte u sapè da i laboratorii da favurizà i ritorni ver’di u territoriu è di cuntribuisce à u sviluppu di una sucetà di a cunniscenza girata ver’di una ecunumia di pruduzzione. Di fatti, dapoi parechji anni, anu messu in ballu e sferente unità di ricerca di l’Università di Corsica, in leia cù i gran’organisimi di ricerca (CNRS, INRA, Inserm, CEA), una seria di prugrammi di studii in parechji duminii. U stabilimentu universitariu hè sullicitatu in modu regulare da i puteri publichi per l’elaburazione di ducumenti strategichi di a Corsica, ch’ella sia in quantu à a gestione di e rumenzule, in u duminiu di l’assestu di u territoriu, di a salute, di a lingua corsa o in quantu à a quistione di u turisimu. Intervenenu dinù in u duminiu di l’agricultura, favurizendu l’emergenza di prudutti identitarii cù valore aghjustatu forte. S’impegnanu, per via di a ricerca fundamentale, per trasferisce cunniscenze ver’di l’intraprese isulane in u settore di l’energie rinnuvevule o quellu di i cusmetichi sustenendu u sviluppu di l’aromaterapia « chì affacca cum’è una filiera d’avvene per a Corsica » face sapè Marc Muselli.

In u listessu tempu, sviluppeghja l’Università prugrammi di ricerca da mette a scenza à u serviziu di u putenziale naturale isulanu è di a biodiversità, in cuncertazione cù i prufeziunali è quelli chì a facenu campà ogni ghjornu. A piattaforma Stella Mare (Unità mista di serviziu CNRS-Università di Corsica), girata ver’di l’ingenieria eculogica marina è litturale, n’hè u spechju u più simbolicu. In fatti, si tratta di una seria larga assai di prugrammi di studii da custruisce l’ecunumia è a sucetà isulane di dumane, piazzendu l’Università di Corsica in core à e strategie di sviluppu. Uchjata nant’à l’andati sfruttati…

Una petra maestra di i ducumenti strategichi di a Corsica

Hè simplice a filusufia : « si tratta di purtà una visione scentifica à u putere puliticu da pudè lu aiutà à definisce e grande urientazione di a regione », spieca Marc Muselli. Dapoi parechji anni, l’Università di Corsica è i so insignanti sò assuciati da i puteri publichi à l’elaburazione di ducumenti strategichi di a Corsica. « Tenendu contu di u nostru pusiziunamentu d’attore centrale per a furmazione in u superiore, a ricerca, a valurisazione è u trasferimentu di e cunniscenze, participemu di modu sistematicu, sott’à a forma di gruppi di travagliu, à i gran’cantieri messi in ballu da i decidori pulitichi », spieca Marc Muselli. U scopu : cunghjucà a spertizia scentifica è una cuncipitura pulitica di i cartulari in parechji duminii. Per un dettu, sò stati integrati l’insignanti-circadori di l’Università di Corsica à a riflessione in giru à l’elaburazione di u Pianu d’accunciamentu è di sviluppu durevule di a Corsica (Padduc), arnese strategicu in quantu à a gestione di u spaziu isulanu o puru di a strategia di specialisazione intelligente di i fondi cumunitarii di u FEDER. Ma sò dinù sfruttati parechji altri duminii da i circadori : si trovanu impegnati in a gestione di l’ambiente, essendu assuciati à l’elaburazione di u schema regiunale Clima, Aria, Energia (SRCAE) è di a prugrammazione pluriannuale di l’energia (PPE) per u periudu 2017-2023. Hè stata d’altronde a Corsica a prima regione di Francia à benefizià di un dispusitivu simule avviendu si ver’di un’autunumia energetica da quì à u 2050.

Inde l’agricultura, l’emergenza di marcatori di qualità

Hè un duminiu à u quale portanu un’attenzione particulare l’Università di Corsica è i so partenarii. Dapoi più di una vintina d’anni, l’insignanti-circadori di l’Università è di u CNRS (UMR SPE) sò impegnati in a strutturazione di parechje filiere agricule inde l’isula. Di fatti, a so azzione in a qualificazione di i meli di Corsica, in cuncertazione cù i prufeziunali di a filiera, hà permessu d’ottene, in u 1998, l’AOC « Mele di Corsica » à u livellu naziunale, po l’AOP in 2000 à u livellu europeu. « Hà introduttu per a prima volta in Francia a nuzione di « Mele di territoriu », preciseghja Marc Muselli. Hè a ricunniscenza di una tipicità chì permette a valurisazione di parechji generi di mele identificati in Corsica ». Hè statu u listessu prucedimentu per l’AOC « Oliu di Corsica ». E ricerche messe in ballu da l’Università di Corsica, cù i so scentifichi chì intervenenu nant’à a caratterisazione chimica è biochimica, in giru à l’alivu è l’oliu d’alivu anu permessu di buscà l’AOC in u 2004 è l’AOP in u 2009. Sicondu à Marc Muselli, ste labellisazione sò « l’emergenza di marcatori di qualità, impurtante per a custruzzione è cunsulidazione di e filiere agricule cuncernate ». In u listessu tempu, l’Università di Corsica ingagia dinù travagli da prevene certe minacce nant’à l’agricultura isulana. Oghje ghjornu, mette in ballu studii nant’à a Xylella Fastidiosa, u batteriu chì tomba i vegetali, da pudè cunnosce megliu u so sviluppu è frenà la.

In core à a lotta contru à u focu

Mentre i vinti anni scorsi, più di 90 000 ettari di vegetazione sò stati parcorsi da u focu in Corsica. Di pettu à stu custattu di un malannu chì culpisce a Corsica ogni estate, da fà ne a regione a più tocca di Francia da stu fenomenu, l’Università di Corsica mette in ballu dapoi una vintina d’anni arnesi numerichi per luttà contru à u focu. In cullaburazione cù i dui servizii dipartimentali d’incendii è di succorsu (SDIS) di u territoriu, una squadra d’insignanti-circadori di l’Università è di u CNRS (UMR SPE) hà creatu lugiziali da permette di cunnosce megliu, in tempu reale, l’evuluzione di un focu. « I travagli messi in ballu anu permessu soprattuttu di creà un simuladore di sparghjera di i fochi di furesta, spieca Marc Muselli. Hè adupratu da i prufeziunali da pudè valutà a surfazia chì serebbe stata brusgiata senza a so intervenzione ». À tempu, ste tecnulugie create da i circadori volenu limità i risichi per i prufeziunali : definiscenu a dimensione di i mezi dedicati à a prutezzione di i spenghjifochi stabiliscendu, per un dettu, una distanza di securità necessaria per i prufeziunali mentre a so intervenzione.

A creazione d’arnesi per un sviluppu turisticu in accordu cù u territoriu

Face parte di l’imbusche maiò ammintate da l’Università di Corsica : capisce l’impattu di a pressione turistica da pudè la megliu ammaestrà. In u quadru di u prughjettu « Dinamica di i territorii è sviluppu durevule » purtatu da l’UMR LISA, insignanti-circadori valuteghjanu e cunsiquenze di l’attività turistica, mutore ecunomicu di l’isula, da traccià perspettive nove per u territoriu in quantu à u turisimu durevule. Arrimbati à stu mutore ecunomicu, i so studii cuntribuiscenu soprattuttu à quantificà l’impattu di u turisimu nant’à a gestione di e rumenzule, l’urbanisazione di u litturale, l’evuluzione di i prezzi di u fundariu è di l’immubiliare. « Stu generu di travagli permette di quantificà l’impattu di i flussi di turisti, sviluppeghja Marc Muselli. U scopu hè di creà simuladori di impatti esogeni da pudè anticipà nant’à evuluzione pussibule di sti flussi nant’à u territoriu, ciò chì pò permette di avvià i decidori pulitichi in u quadru di i so prughjetti d’accunciamentu di u territoriu ». Per un dettu, i studii messi in ballu nant’à a friquentazione di i chjassi litturali, a valurisazione di e specificità lucale in i territorii di l’internu è e perspettive di l’agriturisimu in Corsica volenu favurizà l’emergenza di un turisimu durevule, in leia cù l’attese di u putere puliticu.

Un attore di a salute publica

Hè unu di i prugrammi di primura di l’Università di Corsica in quantu à a salute publica. Dapoi u 2005, a squadra EA 7310 cuurdineghja l’intenna Mediterraniu di a reta Sentinelles, custituita da più di 200 duttori chì facenu ricullà l’infurmazione in diretta da u terrenu. U scopu : participà à l’attività du surveglienza è di ricerca di i sferenti indicadori di salute di a reta Sentinelles. « Affacca l’Università cum’è un arnese di prima trinca in quantu à a surveglienza virulogica di sindromi di a grippa à u livellu naziunale », preciseghja Marc Muselli. À u livellu regiunale, urganizeghja cù l’Agenzia Regiunale di Salute (ARS) è a cellula interregiunale (CIRE) PACA-Corsica, a surveglienza clinica è virulogica di l’infezzione respiratorie acute à u livellu di i stabilimenti medico-suciali di l’isula. Permettenu st’attività di ricerca nant’à e patulugie, soprattuttu a diffusione di u virus di a grippa, una pruduzzione impurtante di dati utili per l’auturità di salute è un trasferimentu di cunniscenze per i sferenti publichi. In u listessu tempu, permettenu sti studii di seguità di manera precisa a dinamica di l’epidemie à u livellu regiunale è naziunale è di capisce le megliu. Un passu d’obligu da ch’ella possi a ricerca inghjennà risposte innuvante di pettu à ste prublematiche.