Da pudè furmà i quadri superiori di l’isula per dumane, l’Università di Corsica hà messu in ballu una furmazione spezializata cù dece intraprese partenarie. U scopu : sviluppà cumpetenze vicine à i bisogni di u territoriu.
Hè fatta à posta a furmazione da pudè risponde à i bisogni di u mondu impresariu isulanu. Dapoi a rientrata di u 2016, l’Università di Corsica è a so scola di maneghjimentu, l’IAE di Corsica, anu messu in ballu un diploma universitariu di “manager-impresariu” in cullaburazione stretta cù dece intraprese di l’isula* – di dimensione internaziunale, per certe – chì finanzeghjanu una parte di a furmazione.
Longu un annu, hè arrimbatu stu D.U. à un cursus in furmazione iniziale, u Master Amministrazione di l’Intraprese, purtendu li à i studienti un insignamentu specificu di Manager-Impresariu. U scopu : dà un soffiu novu à u mondu ecunomicu corsu è sviluppà quant’ellu si pò cumpetenze vicine à i bisogni di u territoriu. Vale à dì, à l’ingrossu, da l’analisi finanziaria à a gestione di e risorze umane passendu per u marketing o l’arnesi numerichi. “À l’iniziu, currisponde sta furmazione à una dumanda di parechje intraprese isulane chì circavanu persunali d’inquadramentu di altu livellu, spieca Jean-Marie Furt, u direttore di l’IAE. Ùn truvavanu micca sempre inde l’isula i prufili chì currispondianu. Di pettu à stu custattu di mancanza, avemu decisu di urganizà una furmazione specifica. Si tratta di purtà à i studienti un soprappiù in quantu à l’insignamentu cù cumpetenze cruciate, à tempu scentifiche è manageriale, da permette li di participà à u sviluppu, à l’innuvazione è à a dinamica di l’intraprese” .
Per avvicinà si à e realità di u mondu di l’intrapresa, sò accolti i studienti indrentu à e strutture partenarie da pudè mette e mani in pasta è avvezzà si à i posti ch’ella li pò apre sta furmazione, è mette in ballu prughjetti definiti da u capu d’impresa. Hè, per un dettu, ciò ch’ella face Anais Federici-Mondoloni. À 24 anni, dopu buscatu si un Master di dirittu è di pratica di l’affari internaziunali, si hè lanciata inde l’avventura di u D.U. « manager-impresariu » dopu passatu e prove diverse di selezzione. Essendu oramai frà i cinque studienti ritenuti, si hè pussuta furmà à a realità di u terrenu mettendu in opera prughjetti inde l’intraprese, accumpagnata da e squadre di i stabilimenti è da l’insignanti di l’Università. “M’hè toccu, per un dettu, à travaglià mentre parechji mesi à EDF nant’à un prughjettu di digitalisazione in internu è a rilazione cù i clienti, preciseghja Anais Federici-Mondoloni. Hè un’imbusca impurtante per l’intrapresa è, à u compie di i mo travagli, una volta ch’ellu era rifinitu, aghju prisentatu u prughjettu à l’agenti” .
U benefiziu cacciatu per ella hè impurtante : fora di e cumpetenze buscate in u duminiu di u maneghjimentu, hà chjappu un librettu d’indirizzi bellu più zeppu è una sperienza vera in u mondu di l’intrapresa. Puru al di là di e fruntiere di l’isula, postu chì hè assuciatu stu dispusitivu à un staziu di quattru mesi à u strangeru. Hè bastatu, in tutti i casi, à purtà à l’intraprese partenarie u soprappiù aspettatu, participendu à dà un abbriu à l’attività soie : “U fattu di pudè benefizià di risorze umane furmate à u livellu lucale hè un avantaghju impurtante, cunsidereghja Jean-Nicolas Antoniotti. Ci porta metudi è visione nove per u sviluppu di l’intrapresa, è unepoche di cumpetenze inde duminii chì ùn sò micca sempre ammaestrati, cum’è u numericu” . U presidente di a sucetà di custruzzione « Demeures corses » sà propiu ciò ch’ellu ammenta : in u quadru di a furmazione, si hè pussutu arrimbà à i studienti di u D.U per sviluppà un pruduttu d’accessu à a pruprietà per i residenti corsi, cunfidendu li a messa in ballu di u prughjettu à u livellu finanziariu è tecnicu. “A ricchezza di sta furmazione hè nanzituttu ch’ella si cunface cù e realità di l’isula è a pussibilità di adattà i studienti à i bisogni precisi di l’intrapresa, assicureghja Jean-Nicolas Antoniotti. Serà quessa, a forza di un’università à dimensione umana : avè una capacità di riattività è d’ascolta di pettu à u so territoriu” .
*EDF, Oscaro, Demeures corses, Gloria Maris, Les Charpentiers de la Corse, Domaine Mavela, Akuo Energy, Kyrnolia, Corstyrène, La Caisse d’Épargne.