Dapoi u 2012, travaglia l’Università di Corsica cù a Sucetà d’Accelerazione è di Trasferimentu di Tecnulugie (SATT) Sud-Est da avvicinà a ricerca fundamentale è u mondu ecunomicu.
Mette un ponte trà a ricerca scentifica è a sfera ecunomica di a Corsica. Eccu, in corte parolle, u scopu di a leia fatta dapoi u 2012 trà a Sucetà d’Accelerazione è di Trasferimentu di Tecnulugie (SATT) Sud-Est è l’Università Pasquale-Paoli. Stabilitu trà e duie stituzione, stu partenariatu strategicu vole valurizà e tecnulugie ricacciate da a ricerca fundamentale universitaria inde l’intraprese mettendu nant’à u mercatu innuvazione da cuntribuisce à u sviluppu ecunomicu è à a creazione d’impieghi qualificati. Hè, in tutti i casi, a missione cunfidata da u Ministeriu di l’Insignamentu Superiore, di a Ricerca è di l’Innuvazione à e 14 SATT di u territoriu metrupulitanu. Sò state messe in ballu da assicurà un cambiu trà i laburatorii di ricerca è l’intraprese per via di u finanziamentu di a maturazione di prughjetti innuvanti.
À l’ingrossu, valurizeghja a SATT Sud-Est un putenziale di più di 10 000 circadori è dutturanti inde guasi 200 laburatorii. « Hè un arnese di prima trinca da ch’elli possinu cuntribuisce i frutti di a ricerca publica à u sviluppu sucio-ecunomicu di un territoriu, cunsidereghja Marc Muselli, vice-presidente di a Cummissione di a Ricerca di l’Università di Corsica. À fiancu à noi, l’azzione di a SATT permette à i prughjetti di i nostri laburatorii di vince maturità per diventà di più cumpetitivi nant’à u mercatu ».
Primu esempiu di sta dimarchja, a piattaforma Stella Mare, puntellu di l’Università di Corsica è di u CNRS in quantu à a ricerca in ingenieria eculogica marina è liturale, stabilisce dapoi parechji anni sta leia trà a ricerca fundamentale è a ricerca appiecata. « Per via di e so tecnulugie di punta per a maestria di a risorza di u mare in u Mediterraniu, si scrive l’unità Stella Mare in una dimarchja virtuosa di trasferimentu di e ricerche messe in ballu è porta risposte à i bisogni di i prufessiunali di u mare per sustene e filiere di l’ecunumia « turchina », cuntinueghja Marc Muselli. Da stu puntu di vista, in giru à parechji prugrammi nant’à a maestria di spezie nobile cum’è l’ostrice piatta, u lupacante, u denti o i zinzi, almanaccheghja l’Università di Corsica/CNRS a valurisazione è u trasferimentu di tecnulugie è di sapè fà ricacciati subbitu da a ricerca publica, nant’à a dumanda è à u serviziu di l’attori di l’ecunumia corsa ».
Da rinfurzà sta leia trà i cercadori è l’intraprese, è à a dumanda di l’Università di Corsica, hà staccatu a SATT un persunale in a Direzzione di a Ricerca è di u Trasferimentu dapoi maghju 2017 da accresce a dettezzione d’innuvazione in i centri di ricerca è da assicurà un scambiu trà e duie sfere.
U scopu : sfruttà in i laburatorii di ricerca è e sfarente piattaforme di l’Università/CNRS – vale à dì i travagli di circa 160 circadori – da valurizà i prugrammi di ricerca capaci à inghjennà attività ecunomica è innuvazione.
Per avà, sò in anda una quindecina di prughjetti inde l’isula in leia cù a sfera ecunomica, cù pussibilità di cuncessione di licenze di sfruttamentu per l’intraprese. Dapoi u 2012, hà messu in ballu l’Università di Corsica 18 dichjarazione d’invenzione frà e quale dui brivetti è l’aiutu scentificu à a creazione d’una start-up, Stepsol, arrimbata à u sviluppu di una suluzione di pruduzzione ammaestrata è di pruvista d’energia d’urigine fottovoltaica.
Altru prughjettu maiò : un prugramma di ricerca nant’à a molecula « géraniol » ricacciata da a murza di Corsica cù parechje virtù curative. Si tratta di prupone un’alternativa è una suluzione cumplementaria à l’antibiotichi in u quadru di a lotta contru à l’antibio-resistenza. Dopu à avè si buscatu una dichjarazione d’invenzione, s’hà chjappu una licenza sclusiva per una sucetà spezializata in u duminiu di a salute umana. « Si vede in Corsica a messa in ballu di un ecosistema di l’innuvazione, usserva Marc Muselli. Ci hè una vuluntà vera di custruisce un mudellu novu di sviluppu ecunomicu in giru à a ricerca. Hè, ghjustu à puntu, una di e scumesse di sta cunvenzione trà l’Università di Corsica è a SATT è in cullaburazione stretta cù l’altri attori di l’innuvazione da permette à l’Università di seguità a diffusione di una vera cultura di l’innuvazione in i so laburatorii. È da avè un ritornu di i frutti di a so ricerca ver’di a sucetà isulana ».
