Dapoi l’anni ottanta, l’Università di Corsica è u CNRS anu accumpagnatu a strutturazione di a filiera apicula isulana. Attraversu un novu prugramma di ricerca, sta dinamica permette di apre d’altre vie cù nichje cummerciale per a so pruduzzione.
Face parte di i puntelli di l’Università di Corsica è di u CNRS in quantu à a ricerca chimica è biulogica. Dapoi l’anni ottanta, accumpagna di manera scentifica i prufeziunali di a filiera apicula per u studiu di i meli corsi. Attraversu un novu prugramma di ricerca, i so insignanti cercadori contanu di seguità i so travagli nant’à d’altri prudutti di l’apicultura da diversificà e nichje cummerciale di u settore. « À u principiu di l’anni ottanta, l’apicultura corsa era à l’iniziu di l’edificazione di a filiera. Si trattava soprattuttu di fà ricunnosce un statutu propiu d’attività agricula da favurizà e stallazione è a crescita di a pruduzzione », spieca Marie-Josée Battesti. Ingeniere di ricerca à l’Università di Corsica dpoi u 2010, sta biulugista di furmazione hè stata, dapoi guasi quarant’anni, un puntellu di a strutturazione di a filiera apicula isulana. Durante anni è anni, hè stata vicina à l’apicultori in un associu di difesa è di prumuzione di a qualità di u mele di Corsica, mettendu in ballu travagli nant’à a caratterisazione di i meli è di l’apa ecotippu corsa. « Stu travagliu longu assucendu u terrenu è a ricerca universitaria ci hà permessu di fà valè e specificità di e nostre bugne è di e so pruduzzione », cunsidereghja Marie-Josée Battesti.
Fendu a scelta di a valurisazione è di a qualità in leia cù l’urigine è a tipicità di i so meli, hè stata efficace a strategia di a filiera : in u 1998, si hè buscata l’appellazione d’urigine cuntrullata (AOC) « Miel de Corse – Mele di Corsica », po u so equivalente europeu, l’appellazione d’urigine prutetta (AOP), in u 2000. Ste « cunsecrazione » anu permessu d’intruduce, per a prima volta in Francia, a nuzione di « miel de terroir » per i sfarenti registri di l’isula, cù a ricunniscenza à tempu di a diversità è di a qualità di i prudutti.
Per Pierre Torre, u presidente di u sindicatu AOP « Mele di Corsica », l’affari sò chjari : « Per a filiera, ci hè statu un « prima » è un « dopu » AOC, cunsidereghja l’apicultore, stallatu dapoi u 1985 nant’à a cumuna di Cutuli è Curtichjatu. Hè statu un passu maiò à tempu per ricunnosce a tipicità di i nostri prudutti è per creà una vera attività ecunomica. Nanzu l’appellazione, eranu scarsi l’apicultori chì campavanu di a so attività è aviamu ancu e difficultà à vende a nostra pruduzzione chì u mele ùn era ricunnisciutu. Oghje, l’offerta ùn basta più à suddisfà a dumanda è stallemu di più in più giovani prufeziunali ».
À puntu, sò oghje ghjornu 115 apicultori censi in AOC, frà i quali 80 cù un statutu propiu di prufeziunali. Di fatti, da accumpagnà u sviluppu di a filiera è di i so prudutti, u laboratoriu Scenze per l’ambiente (CNRS / Universià di Corsica), in u quadru di una chjama à prughjetti di u Fondu europeu di sviluppu regiunale (Feder)*, hà messu in ballu un prugramma di ricerca nant’à i principii attivi di i prudutti di a bugna, in partenariatu cù u sindicatu AOP « Mele di Corsica » trà u 2017 è u 2020.
In leia stretta cù a filiera apicula, stu prugramma messu in opera nant’à a piattaforma tecnica di l’Università di Corsica/CNRS deve « arricchisce i registri di e pruduzzione apicule cummerciale, preciseghja Julien Paolini, circadore in chimica è rispunsevule di stu prugramma. Al di là di l’analisi cunvenziunale, per un dettu in giru à u gustu è u culore di i sfarenti registri di mele, cunsistenu i nostri travagli à identificà cumposti chimichi, cum’è l’urigine botanica è geugrafica di i prudutti, da fà ne marche di qualità ».
Ma, al di là di u duminiu qualitativu, vole dinù apre stu prugramma novu di ricerca perspettive altre per a filiera à u livellu ecunomicu. Per quessa, una decina di cercadori travaglianu ogni ghjornu sott’à a direzzione di Julien Paolini per sfruttà d’altri prudutti apiculi chè u mele. « Circhemu à sviluppà e cunniscenze nant’à prudutti di a bugna capaci à esse valurizati da l’apicultori, prughjetta Julien Paolini. Certe vie sò studiate, trattendu si per un dettu di e specificità di i pollini è di a propolis per dà un valore aghjustatu à ste pruduzzione. Assai valurisazione, sempre pocu cunnisciute per avà, sò da circà per un dettu in giru à i curamenti cusmetichi cù prudutti naturali o l’apiterapia sicondu u cuncettu di Hypocrate : ch’ellu sia l’alimentu a to prima medicina ».
Sò unepoche di « piste di diversificazione » chì trovanu un’attenzione particulare da a parte di i prufeziunali di a filiera apicula. In fatti, malgradu una cummercialisazione di u mele forte assai dapoi parechji anni, sti pochi tempi s’impetta a prufezione cù una calata sprupusitata di a pruduzzione di mele, sciffrata da u sindicatu AOP à « circa 50% » di pettu à u 2016, colpa soprattuttu à a sicchia è à a debbulezza di e culunie d’ape. « Oghje, straziemu di più à pruduce chè à cummercializà u mele, custatteghja Pierre Torre. Hè inchietante assai è ci deve purtà à truvà prestu nove nichje ecunomiche in giru à l’apicultura, per assicurà a perennità di a nostra attività da cumpensà e cadute di a pruduzzione ». L’impegnu di l’Università di Corsica è di u CNRS, cù u so novu prugramma di ricerca, serà di risponde à st’imbusca tamanta.
*Cofinanzatu da l’Unione europea è a Cullettività di Corsica.
