Title Image

STELLA MARE (Università di Corsica / CNRS) : a ripruduzzione di i zinzi in core à un prugramma di ricerca

Dopu à cinque anni di ricerca, e squadre di a piattaforma scentifica di l’Università di Corsica è di u CNRS sò riesciute à ammaestrà u ciculu di ripruduzzione di i zinzi. Una scumessa eculogica, ecunomica è partimuniale.

 

 

Face parte di i puntelli di a ricerca marina à l’Università di Corsica. Dapoi u 2012, trà i muri di u Laburatoriu STELLA MARE (Università di Corsica / CNRS), nant’à a piattaforma dedicata à l’ingeneria eculogica marina è liturale in u Mediterraniu, e squadre di cercadori si sò impegnate per studià i zinzi nant’à u liturale corsu sott’à tutti i so aspetti.U scopu : cunnosce megliu i zinzi è risponde à una dumanda di i prufeziunali di a pesca chì anu sullicitatu l’Università di Corsica, inchieti di vede li di più in più scarsi. « Dapoi parechji anni, avemu custattatu una sminuzione forte di e risorze », usserva Maxime Bianchini, u presidente di a cummissione « zinzi » di u cumitatu regiunale di e pesche marittime è di l’allevi marini di Corsica (CRPMEM).

 

Stabilitu in Bunifaziu dapoi una vintina d’anni, hà rimarcatu longu à l’anni u piscadore una sfruttera eccessiva di a spezia, e digradazione di l’abitati è dinù pulluzione chì averebbenu, sicondu ellu, cagiunatu a calata di e risorze di zinzi. « Si trattava nanzituttu di mette a ricerca à u serviziu di u territoriu, rispundendu à sta prublematica chì raprisenta una scumessa eculogica è chì mette in periculu l’attività di i prufeziunali di a pesca », cunsidereghja Sonia Ternengo, maestra di cunferenze à l’Università di Corsica è rispunsevule di u prugramma « zinzi » à Stella Mare.

 

A a direzzione di una squadra di sette scentifichi, s’hè impegnata a cercadore per studià soprattuttu i periudi quandu chì si facenu l’ovi, a genetica è e cundizione di vita di i zinzi in l’ambiu naturale per mette in ballu sperienze di ripruduzzione in i bacini da cumpensà l’effetti di a manu di l’Omi.

 

Risultatu : à capu di cinque anni di ricerca, e squadre di a piattaforma marina di l’Università di Corsica è di u CNRS sò riesciute à ammaestrà u ciculu di ripruduzzione di i zinzi. In u quadru di sti travagli, sò nati 60 000 ghjuvanili nati in Stella Mare, venendu da u liturale corsu. Per via di e cunniscenze acquiste è di l’avanzate significative in e tecniche d’allevu di i zinzi, una parte di i ghjuvanili hà da esse intrudutta in l’ambiu naturale nant’à certi siti assai indebbuliti. Deve permette à i cercadori di studià u cumpurtamentu di i zinzi in l’ambiu naturale inde cundizione securizate di spiazzamentu è d’introduzzione sopra locu.

 

Una scumessa tamanta, in sti tempi chì i zinzi parenu d’esse per smarrisce in certi lochi marini. Da seguità l’evuluzione di e pupulazione di zinzi, sò stati usservati in particulare ottu siti liturali da i cercadori in ogni scornu di a Corsica induv’ella pare propiu scarsa a spezia. « In una parte di u Capicorsu, in Macinaghju, cuntemu di manera regulare i zinzi dapoi u 2013, spieca Sonia Ternengo. Nant’à una surfazia di circa 120 metri quadrati osservata da i nostri cercadori, ne truvemu da trè à ondeci sicondu l’anni… »

 

Ammaestrà a ripruduzzione di i zinzi deve dunque permette di cumpensà e risorze chì calanu di più in più da assicurà a sopravivenza di a pesca. U risicu ùn si pò, d’altronde, negligentà per i prufeziunali : ogni annu, circa un milione di zinzi sò pescati in Corsica da una vintina di prufeziunali chì l’anu messi in core à a so attività. « Senza st’accumpagnamentu chì ci hà da permette di ammaestrà a risorza rispettendu l’ambiu, ci puderiamu truvà cunfruntati à prublemi impurtanti di gestione, è forse custretti à piantà st’attività », preciseghja Maxime Bianchini.

 

D’altronde, e squadre scentifiche di Stella Mare è di u CNRS ùn contanu di piantà si à stu livellu di ricerca. Parechje fase sperimentale di risturazione di e pupulazione di zinzi devenu esse messe in ballu in e quattru prudumie di Corsica. In u listessu tempu, travaglianu i cercadori nant’à un’altra prublematica : quella di e gunade micca piene abbastanza. « A longu andà, u nostru scopu hè di avè zinzi maturi cù belle gunade, circhendu un’alimentazione naturale adattata chì hà da influenzà a crescita è u gustu di i zinzi », prughjetta Sonia Ternengo.

Tamantu cantieru.

Piattaforma STELLA MARE

https://stellamare.universita.corsica/

READ MORE

A Ricerca à l'Università di Corsica

https://ricerca.universita.corsica/

READ MORE
Logo CNRS