Di pettu à a criscenza sprupusitata di e minacce in leia cù u numericu, hà messu in ballu l’Università di Corsica una furmazione innuvante à prò di i studienti, di l’intraprese è di e cullettività. U scopu hè di prupone misure per privene è risponde à l’incidenti di securità.
Hè una sfida maiò chì ghjè posta da a rivuluzione numerica : fà fronte à e minacce cybernetiche custante è sempre di più cumplesse. Secondu un raportu nant’à l’attacchi infurmatichi in Francia fattu da Jedha, una scola spezializata inde e tecnulugie di i dati è di a sicurezza infurmatica, anu patutu omancu 43 % di l’intraprese è di l’urganisazione publiche francese di un attaccu infurmaticu riesciutu in u 2025. Serà di fatti più chè mai un’imbusca di avè cumpetenze nove per prutege e so rete di pettu à a crescita sprupusitata di e minacce per via di u numericu, è à a sparghjera di e tecnulugie d’intercunnezzione di i sistemi infurmatichi. Hè in sta logica ch’ella hà messu in ballu l’Università di Corsica, per via di u so serviziu di furmazione cuntinua, una certificazione in giru à « l’imbusche di u numericu è di a sicurezza infurmatica. »
« Inde una regione periferica cum’è a Corsica, à le volte ci cridimu à l’aggrottu di pettu à sti gran’fenomeni mundiali, spieca Paul Bisgambiglia, prufessore in infurmatica à l’Università di Corsica è rispunsevule di sta certificazione. Cù l’infurmatica, ùn hè micca u casu. Pò esse toccu tutt’ognunu, inde un quadru prufeziunale o privatu, da fatti malvuglienti, da un attaccu terruristu o da una scruccuneria. Ci hè parsa tandu necessaria di accumpagnà a sucetà per prutege si di certi fallimenti. »
Si hè cuncretizata sta dimarchja, in u 2023, cù a creazione di una furmazione innuvante, in partinariatu cù Airbus, l’agenzia di u sviluppu ecunomicu di a Corsica (Adec), a Sitec, u CSIRT di Corsica, l’AR Corse IHEDN, è l’associu Corsica Sfera. Scumpartuta nant’à trè ghjorni, s’indirizza sta furmazione corta ma zeppa à i nuzivii quant’è à l’attori digià sensibilizati. Pare ancu di più pertinente in Corsica sta dimarchja, chì hè custituitu u tissutu ecunomicu lucale à 95 % di TPE/PME, una categuria d’intraprese di più vulnerabile è spessu priparata pocu di pettu à st’attacchi. Sò spessu cunsiderate st’intraprese cum’è sibule privilegiate da i criminali di l’infurmatica, per via di a so dimensione è di e poche risorze ch’elle anu in quantu à a securità infurmatica.
Prupone tandu a furmazione di ammintà i fundamentali di sta minaccia numerica, da l’igiene cyber fin’à e strategie di risposta per afferrà si megliu l’incidenti, chì ponu andà da l’arrubbecciu di dati fin’à e perdite finanziarie tamante. « Ponu esse grave e cunsiquenze di una viulazione di a securità per un’intrapresa, una cullettività, o tutt’ognunu », seguiteghja Paul Bisgambiglia. Permettenu i partinariati fatti da l’Università di mette in ballu una reta di sperti per capisce megliu l’imbusche geostrategiche di a cybercriminalità. Hè purtatu dinù un sguardu particulare nant’à a geupulitica è l’influenza di i cunflitti militari, ecunomichi o territuriali, a cybersecurità, à u livellu naziunale è lucale. Per via di messe in pratica è di ritorni di sperienza cuncreti di spezialisti di a cybersecurità, di u dirittu di u numericu o di u rinsignamentu, cerca di trapassà sta furmazione l’insignamentu tradiziunale.
Dapoi u 2023, circa 300 persone – studienti, persunali di l’educazione, d’intraprese è cullettività – sò pussute esse furmate à l’imbusche di u numericu è di a sicurezza infurmatica. Hà oramai l’ambizione l’Università di Corsica di seguità sta dimarchja denzana, fendu entre st’insignamentu inde i sfarenti cursus di Master, di tutte e so cumpunente pedagogiche. « Hè ammintatu pocu, o mancu appena, st’aspettu inde e furmazione classiche d’oghje, face rimarcà Paul Bisgambiglia. Tandu, riguardu a piazza pigliata da u numericu inde a sucetà d’oghje, serà imperativu d’acquistà cumpetenze sode nant’à a prutezzione di i dati, è di modu proattivu. Serà ancu fundamentale. »
Nuvembre 2025