Si hè impegnata l’Università di Corsica inde una dinamica per a prumuzione di a scenza aperta. U scopu hè di facilità l’acquistu di a scenza per i cercadori è u publicu.
Rende a ricerca scentifica di più accessibule, trasparente è cullaburativa. Hè in giru à sti trè scopi ch’ella si hè impegnata l’Università di Corsica inde una dinamica per a prumuzione di a scenza aperta. « L’idea hè di incuragisce a diffusione libera è gratisi di a ricerca scentifica, per ristituisce di u modu u più largu pussibule i frutti di i travagli di i nostri cercadori, spieca Christophe Luzi, ingeniere di ricerca à u CNRS, abilitatu à dirige e ricerche à u laburatoriu Lochi, Identità, Spazii è Attività di l’Università di Corsica (UMR LISA 6240 – CNRS) è incaricatu di missione « scenza aperta » à fiancu à u Presidente di l’Università. Si tratta, in corte parolle, di rende li di più leghjitoghji per u publicu ma dinù d’altri scentifichi chì puderianu tandu fà ne l’acquistu inde una logica di spartera di i sapè. »
Hà tandu a scenza aperta un rollu di prima trinca inde a sucetà à favore di l’accessu liberu à i risultati di a ricerca scentifica, à tempu ch’ella permette di fà cunnosce à i citadini i sapè è l’avanzate scentifiche, sbucchendu di fatti nant’à sviluppi ecunomichi, suciali o tecnulogichi impurtanti assai. Hà a Scenza Aperta un impattu pusitivu, prima riducendu i scarti in quantu à l’accessu à l’infurmazione scentifica ma dinù per via ch’ella incuragisce u publicu à participà di più.
Avia digià fattu da precursore inde stu duminiu l’Università di Corsica Pasquale Paoli, dapoi un decenniu è più, cù a creazione di a mediateca culturale di a Corsica è di i Corsi (M3C). Fruttu di un travagliu di ricerca, di culletta è di numerisazione di i sapè isulani, hà per scopu sta piattaforma di scenza aperta di ricustituisce e cunniscenze inde u duminiu di e scenze umane è suciale, incù u scopu di fà ne a diffusione per tutti è di gratisi.
Avia postu sta dimarchja i fundamenti di una dinamica per a prumuzione di a scenza aperta à l’Università di Corsica. Si hè rinfurzatu stu muvimentu dapoi u 2022, sottu à l’egidu di Vanina Pasqualini, a vice presidente di a cummissione di a ricerca. Si scrive oramai inde un muvimentu à u livellu naziunale è internaziunale per rende accessibule à tutti i risultati di a ricerca universitaria, à tempu e publicazione è i dati, senza restrizzione nè costu d’accessu. Si scrive u fogliu di strada per a scenza aperta, messu in ballu da l’Università di Corsica, inde un pianu naziunale svoltu dopu à a lege per una Republica numerica, aduttata d’auturnu 2016, chì cerca à tuccà un obbiettivu di 100 % di publicazione in accessu liberu da quì à u 2030.
Hè sbuccata in particulare nant’à a creazione di u purtale numericu HAL di l’Università di Corsica, un’archiviu apertu istituziunale dedicatu à a diffusione, à a valurisazione è à a cunservazione di a pruduzzione scentifica. Sò guasi 6000 ducumenti chì sò stati messi in linea da i cercadori di l’Università. Si tratta di un travagliu participativu chì impegna a cumunità universitaria inde parechje azzione priuritarie : l’apertura à u publicu di e publicazione è di i dati scentifichi, l’edizione scentifica aperta, a scenza participativa è l’accumpagnamentu di a cumunità universitaria.
Da arradicà st’usi novi, hà messu in ballu l’Università di Corsica un prugramma di sensibilisazione è di furmazione per i so insignanti cercadori, per favurizà l’acquistu di l’arnesi di a scenza aperta è incuragisce li à publicà i so risultati di ricerca in accessu liberu. Dendu à tutti l’accessu à i risultati di a ricerca, hà da permette sta dimarchja innuvante una cullburazione più larga è più aperta trà i cercadori è l’università. « Hè in traccià di scambià a scenza aperta a manera di fà è di cumunicà in giru à a ricerca universitaria, rimarca Christophe Luzi. Li hà da permette, inde l’anni à vene, di fà risplende a ricerca inde è fora di i muri di l’Università. »
Ottobre di u 2025