Per via di l’Usservatoriu Omi-Ambienti Liturale Mediterraniu (OHM-LM), cuntribueghja l’Università di Corsica cù u CNRS è d’altri partinarii scentifichi à un gran’prugettu interdisciplinariu da afferrà megliu stu situ sottumessu à pressione antropogeniche forte. U scopu : accresce e cunniscenze per megliurà a so cunservazione.
Crédit photo : Viviana Ligorni (Laboratoire SPE – Université de Corse / CNRS)
Hè un prugettu di ricerca minuziosu è à longu andà, principiatu una decina d’anni fà. Dapoi u 2012, travaglianu e squadre scentifiche da megliurà e cunniscenze nant’à un situ assai particulare di u liturale isulanu : a laguna custiera di Biguglia. Facenu st’opera i cercadori inde u quadru di l’OHM-LM, chì studieghja parechje zone francese nant’à e coste di u Mediterraniu. Per via di u Laburatoriu d’eccellenza Dispusitivu di Ricerca Interdisciplinaria nant’à l’Interazzione Omi-Ambienti (Labex DRIIHM), chì adunisce i 13 OHM chì esistenu oghje ghjornu, hà per scopu stu travagliu di afferrà megliu u situ di Biguglia è a so evuluzione. Hè tamanta l’imbusca : dapoi una cinquantina d’anni, hè sottumessa sta laguna di 14,5 chm², à u sudu di l’agglumerazione bastiaccia, à pressione antropogeniche forte. Hè diventata l’urbanisazione sempre à cresce una sorza di pulluzione è di sgradazione di l’ambiu. « U scopu hè di studià stu socio-ecusistema sanu sanu, vale à dì l’interazzione trà e cumpunente umane è idro-eculogiche di st’ambiente specificu », spieca Vanina Pasqualini, prufessore d’eculugia à u laburatoriu Scenze per l’ambiente SPE (Università di Corsica-CNRS) è rispunsevule di u situ di Biguglia inde l’OHM-LM.
Hè inde stu spiritu ch’elli anu messu in ballu i scentifichi un metudu innuvante. Arrimbatu à l’interdisciplinarità, hà per scopu di rinfurzà e rilazione trà i cercadori è l’utilizadori di stu situ, mischjendu e scenze umane è suciale è e scenze di a natura, in associu dinù cù i gestiunarii di u situ. « Bisogna à fighjà l’affari di modu transversale per risolve certe prublematiche ambientale, spieca Frédéric Huneau, prufessore d’idrogeulugia à l’Università di Corsica inde u laburatoriu SPE. Hè un affare di primura per avè una visione glubale di u funziunamentu di u situ, ch’ella si tratti di l’aspetti ecunomichi, turistichi, climatichi, agriculi è puru demugrafichi. Sò in cunnezzione stretta tutti st’elementi è tandu ùn si ponu studià di modu staccatu s’omu vole capisce st’imbricazione. »
Crédit photo : Viviana Ligorni (Laboratoire SPE – Université de Corse / CNRS)
Da stu puntu di vista, anu permessu i travagli fatti nant’à u situ di Biguglia di afferrà megliu u funziunamentu di u sistema lagunariu è d’identificà e zone e più vulnerabile à e pulluzione. Sò digià state splurati u spartiacqua è l’acque in surfazia ma si facenu sempre studii nant’à a zona custiera è e so leie idroliche cù l’acque sutterranie di l’internu di e terre, inde un cuntestu di erusione custiera forte è di crescita di u livellu di u mare, sott’à l’influenza di i scambiamenti climatichi. À sente i scentifichi di l’OHM-LM hè sempre di più tamanta l’imbusca di stu prugettu di ricerca chì raprisentanu e lagune custiere guasi 13 % di u liturale mundiale, cù un valore eculogicu è socio-ecunomicu chì ùn si pò nigà di pettu à i so servizii di primura per l’ecusistema.
Classificata da riserva naturale in u 1994, hè ricunnisciuta a laguna di Biguglia cum’è un situ impurtante assai per a fauna è a flora, chì ghjè scritta dinù nant’à u listinu di e zone umide d’interessu internaziunale. S’elle anu permessu l’azzione di ristoru fatte da a Cullettività di Corsica, pruprietaria di u situ, di megliurà a qualità di l’acqua è l’integrità eculogica, ferma vulnerabile a laguna di pettu à l’attività agricule, e strategia di risanamentu di l’acque cullettive o individuale è di a sparghjera urbana di modu generale. « U fattu di capisce megliu u funziunamentu di a laguna ci permette di pruduce unepochi d’arnesi d’aiutu à a gestione di stu situ, stima Vanina Pasqualini. Oghje, sò preziosi assai i dati ch’è n’avemu à dispusizione per fà ricummandazione obbiettive in quantu à u ristoru eculogicu. »
Crédit photo : Viviana Ligorni (Laboratoire SPE – Université de Corse / CNRS)
Ghjugnu 2022
