Title Image

Intraprenariatu studientinu : l’accumpagnamentu in core à a riescita

Per via di u polu PEPITE Corsica, l’Università di Corsica accumpagna ogni ghjornu i studienti chì si volenu impegnà inde l’intraprenariatu. Mettendu l’innuvazione in core à e so ambizione, face vede chì u spiritu d’intrapresa hè una scumessa d’ogni ghjornu.

 

 

Cù a creazione di u polu PEPITE* di Corsica, di marzu 2014 hè stata una di e grande scumesse ch’ella si hè lanciata l’Università di Corsica cù i so partenarii : sensibilizà è accumpagnà i studienti chì si volenu astradà ver’di u mondu di l’’intrapresa. L’imbusca hè tamanta, in sti tempi chì l’inchieste d’upinione facenu vede chì a metà di i giovani chì volenu intraprende s’impettanu à spessu à cumplessità chì sò tanti freni à u mumentu di francà u passu. « U numeru di studienti intraprenditori hè statu multiplicatu via 5,6 trà u 2014 è u 2017 à u livellu naziunale, è in Corsica hè statu multiplicatu via 8,6 », preciseghja Nathalie Lameta, rispunsevule di u polu « PEPITE Corse ». « A nostra vuluntà, hè di aiutà i studienti chì volenu purtà un prughjettu, da ch’elli possinu francà u passu », spieca Alexandra Pagni. Incaricata di missione « PEPITE Corsica » dapoi u 2016 in u serviziu « Innuvazione è sviluppu » di l’Università Pasquale-Paoli, face parte di i puntelli di u dispusitivu messu in ballu in i lucali di l’Università, à u Palazzu Naziunale, in Corti.

 

U so rollu : aiutà ogni ghjornu è inde tutti i duminii, da u marketing à u finanziamentu, passendu per l’aspetti i più tecnichi, i studienti chì anu fattu a scumessa di lancià si inde l’intraprenariatu per via di u polu « PEPITE Corsica ». Per l’annu 2017-2018, Alexandra Pagni dà di capu à circa 70 studienti chì anu integratu u dispusitivu è rializeghjanu ogni settimana à fiancu à ella un puntu nant’à u statu di i so travagli.

Di pettu à una dumanda chì cresce da a parte di quelli chì portanu i prugetti, l’Università di Corsica ùn hè stata tantu à dà si i mezi di e so ambizione : hà messu in ballu un statutu di studiente-intraprenditore è hà lanciatu un diploma di stabilimentu « Studiente-intraprenditore » (D2E) in u 2015. « Vulemu mette i studienti in e cundizione e più bone pussibule da permette li di sviluppà u so prugettu, liberendu li u tempu necessariu da pudè la fà è mettendu li à dispusizione u Fab-Lab di l’Università è u nostru spaziu di co-working », face sapè Alexandra Pagni.

Per quessa, l’Università di Corsica pò cuntà nant’à u sustegnu finanziariu è logisticu d’una vintina di partenarii di u mondu ecunomicu isulanu : urganisimi publichi, intraprese, camere cunsularie, attori di a furmazione… Unepochi di puntelli chì sò diventati indispensevuli per assai studienti chì anu integratu u polu « PEPITE Corse ». Cum’è parechji altri, Marie-Jeanne Casu, 28 anni, ne hà cacciatu assai frutti per l’elaburazione di u so prugettu dapoi u 2016. Dopu à un master in marketing, sta giovana studiente si hè assuciata à Joséphine Canava, 25 anni, da fà sta scumessa di a creazione d’intrapresa in u polu « PEPITE » nanzu di integrà Inizià, l’incubatore d’intraprese innuvante di l’Agenzia di sviluppu ecunomicu di a Corsica (Adec).

 

 

Tene in duie parolle u so prugettu : « Izi bag ». U cuncettu ? « Si tratta di un’appiecazione mobile capace à prupone prudutti chì rispondenu à i bisogni di u cunsumatore, arrimbendu si à un algoritimu, ditaglia Marie-Jeanne Casu. Oghje, 5 % di i siti di vendita in linea raprisentanu 85 % di u sciffru d’affare glubale. Di fatti ci hè un settore da sfruttà, fendu valè e marche chì strazieghjanu à fà si una piazza nant’à u net, in u primu tempu in u duminiu di i vestiti feminili ».

Da fà maturà u so prugettu, l’avventura hà purtatu à Marie-Jeanne Casu è à Joséphine Canava fin’à Lisbona, à u Purtugallu, induv’elle sò state accolte per un staziu « d’accelerazione » di trè settimane in u quadru di l’European Innovation Academy, chì hà adunitu studienti di u mondu sanu per furmà li à l’intraprenariatu  in u duminiu di l’innuvazione numeriche. Oramai per compie, u prugettu di u duo multiplicheghja e distinzione : Marie-Jeanne Casu è Joséphine Canava sò state laureate di u premiu « Oscaro » di u « Premiu » di a Fundazione di l’Università di Corsica, di u premiu « Impresa sì » di l’Adec è di u premiu regiunale di « PEPITE Tremplin-I-Lab ». « Senza u sustegnu logisticu di u polu PEPITE Corsica è di u coworking chì ci anu messe in anda, ùn ne seriamu forse micca à stu puntu di u prugettu », cunsidereghja Marie-Jeanne Casu. A prossima tappa : dopu à una versione « test » chì duverebbe esse elaburata per l’estate di u 2018, e duie giovane intraprenditore contanu di lancià di manera ufficiale u so pruduttu da quì à a fine di l’annu, da pudè passà da a grammatica à a pratica. Fatta fine, nant’à i 43 studienti-intraprenditori integrati à u polu PEPITE Corsica per l’annu 2017, 18 creazione d’intraprese sò state ufficializate.

*Polu Studiente per l’Innuvazione, u Trasferimentu è l’Intraprenariatu.

PÉPITE CORSE

Ritruvate tutta l'attualità di u polu PÉPITE Corse nant'à https://pepite-corse.universita.corsica/

READ MORE

Cullaburatori

Instituziunale : Università di Corsica, CTC, ADEC, CCI Corse-du-Sud et Haute- Corse, Chambres des Métiers et de l’Artisanat Corse-du-Sud et Haute-Corse

Urganismi prufeziunale : CGPME, Ordre des experts-comptables, CRESS Cor­sica, MEDEF Corse

Strutture d’accumpagnamentu : La couveuse d’entreprises de Corse, A Prova, Inizià, BGE, My pitch company, Corsican business woman

Finanziatore : Corse active, Initiative, Femu quì, Caisse des dépôts, Crédit Agricole Corse