Cuncipitu in associu cù a piattaforma di corsi di lingua in linea Gymglish, permette st’arnese numericu d’amparà a lingua corsa à distanza per via di un accessu di quindeci minuti ogni ghjornu. U scopu : sviluppà e cumpetenze di i studienti in quantu à a cursufunia.
Edifiziu Edmond Simeoni, Campus Mariani
Si tratta di un metudu propiu ineditu in quantu à l’amparera di a lingua corsa : prupone corsi in linea, cuncisi è persunalizati. Eccu, in corte parolle, u scopu di l’arnese chì hè statu creatu à l’Università di Corsica. In associu cù a piattaforma Gymglish, anu sviluppatu una decina d’insignanti di u campus di Corti una versione corsa di stu metudu numericu da permette l’amparera di a lingua corsa à distanza. U so nome ? “Gymcorsu”. Toccu a rientrata di sittembre, serà prupostu st’arnese innuvante à tutti i studienti chì approntanu a certificazione di lingua corsa, da u livellu A2 ver’di u livellu B1, cum’elli sò stati definiti inde u quadru europeu di riferenza per e lingue. Natu dopu à una dimarchja cumuna trà parechji attori di l’Università di Corsica, l’Istitutu Naziunale Superiore di u Prufessuratu è di l’Educazione (INSPE) di Corsica, a Facultà di e Lettere, Lingue, Arte, Scenze Umane è Suciale è u laburatoriu LISA (UMR 6240 CNRS / Università di Corsica), prisenta stu metudu una seria d’esercizii in linea, scritti è audiò, per via di un accessu di quindeci minuti ogni ghjornu. “Ci permette st’arnese numericu di prupone un’offerta cumplementaria à a furmazione a più classica, in corsu, adattata à u prufilu è à i bisogni di ogni studiente”, spieca Dumenica Verdoni, prufessore à l’Università di Corsica à l’iniziu di u prugettu “Gymcorsu”. Si scrive dinù stu metudu novu inde una logica chì cunsiste à trapassà una visione accademica tradiziunale per mette à prufittu suporti novi è innuvanti da fà evuluà a furmazione.”
Creata in u 2004, hà fattu propiu a piattaforma Gymglish da iniziadore in u duminiu di l'”EdTechs”, st’intraprese chì si ghjovanu di e tecnulugie nove per favurizà l’amparera di materie liate à l’universu sculare. Da l’inglese à u talianu, passendu per u spagnolu, sò stati cinque millioni d’utilizadori in Francia à avè amparatu à parlà una lingua cù Gymglish. Prupone stu metudu piccule lezziò inde u quadru di un modu d’amparera cumunu ma dinù una persunalisazione di a pedagugia à longu andà, adattata propiu à e mancanze di ogni amparante. Per “Gymcorsu”, prisenta u parcorsu di furmazione à distanza una cinquantina di lezziò per l’annu 2021/2022, spartute trà e duie varietà e più impurtante di a lingua corsa, u pumuntincu (parlatu in u Pumonte) è u cismuntincu (parlatu in u Cismonte).
S’ellu cerca di rispettà a pulinumia, hè statu dinù adupratu stu metudu da pudè mette in valore a cultura, al di là di a lingua, da ch’elli pudessinu piglià cuscenza l’amparanti di l’inseme di e varietà di a lingua corsa. Conta assai nant’à st’arnese l’Università di Corsica da sviluppà e cumpetenze di i so studienti in quantu à a cursufunia. Per l’annu universitariu 2021/2022, duverebbenu seguità circa 2000 studienti una furmazione à distanza per via di Gymcorsu”. À longu andà, volenu i capimachja di stu prugettu mette st’arnese novu à dispusizione di un publicu di maiò assai più largu è chì si vulerebbe furmà à a lingua corsa o megliurà e so capacità di spressione o di capiscitura. “Si scrive propiu Gymcorsu inde a strategia di l’Università di Corsica per generalizà l’usu di a lingua corsa è custruisce e cundizione d’una sucetà bislingua, accerta Dumenica Verdoni. Hè per quessa ch’ellu serà dinù prupostu stu metudu à l’intraprese è à l’amministrazione chì si volenu impegnà inde una dimarchja di furmazione di i so persunali.”
Settembre 2021
Ritratti : Università di Corsica