L’Università di Corsica prupunerà, da nuvembre di u 2026, un novu ciculu di furmazione destinatu à accumpagnà l’eletti è i decidori lucali in l’eserciziu di e so funzione è di i so mandati. U scopu hè di rinfurzà l’azzione publica di prussimità nant’à l’isula.
Esse un elettu lucale ùn hè forse mai statu una missione cusì esigente. Trà a multiplicazione di e norme, l’attese sempre più forte di i citadini, e sfide ligate à u cambiamentu climaticu è l’evuluzione istituziunale, devenu oghje ammaestrà i rispunsevuli publichi cumpetenze sempre più numerose è varie. Hè per risponde à sta sfida maiò chì l’Università di Corsica mette in ballu una nova furmazione qualificante dedicata à l’eletti lucali.
Fendu parte di l’azzione previste da a Cunvenzione Tripartita d’Appiecazione 2023-2027 chì cullega l’Università cù u Statu è a Cullettività di Corsica, s’addirizza sta furmazione à l’inseme di i circa 4 000 eletti di l’isula : merri, cunsiglieri municipali, eletti intercumunali è membri di l’Assemblea di Corsica. A so ambizione hè di dà à i decidori publichi isulani l’arnesi necessarii per esercità u so mandatu cù di più serenità, efficacità è securità ghjuridica.
« Oghje, devenu fà fronte l’eletti lucali à un veru intrecciu amministrativu è regulamentariu chì rende a so funzione assai cumplessa, osserva Wanda Mastor, prufessora agregata di dirittu publicu, à l’origine di a cuncipitura di sta furmazione. L’evuluzione di a struttura amministrativa territuriale hà purtatu à un intricciu di e cumpetenze, chì abbisognanu una vera spertizia. »
À a maestria di i testi s’aghjunghjenu oramai rispunsabilità sempre più impurtante in quantu à a prevenzione di i risichi, a transizione eculogica, a gestione di e crise è a cumunicazione cù i citadini. In Corsica, piglianu ste sfide una dimensione particulare. U statutu specificu di l’isula è l’evuluzione di a so urganisazione istituziunale imponenu à i rispunsevuli publichi di cunnosce à tempu e regule naziunale è e particularità di u territoriu.
Da a so apertura, di nuvembre di u 2026, aduniscerà sta furmazione qualificante una squadra d’insignanti plurale cumposta d’insignanti-cercatori, ghjuristi, urbanisti, alti funziunarii è altri spezialisti. U prugramma raprisenterà 60 ore di furmazione nantu à 12 settimane, à l’Università di Corsica, in visiucunferenza o sopralocu. Sta diversità di sperienze hà da permette di incrucià u sapè accademicu cù e realità di u terrenu.
Trè gran’ temi strutturanu u prugramma. U primu hè cunsacratu à a maestria di e norme, cù insignamenti dedicati à l’urbanisimu, à a pruprietà publica, à a fiscalità lucale, à l’azzione suciale è à l’evoluzione istituziunale di a Corsica. U secondu tratta più particularmente di a prevenzione è di a gestione di i risichi : incendii, inundazione, cunflitti d’interessi, rispunsabilità penale di l’eletti o gestione di e crise. Infine, un terzu puntellu hè dedicatu à l’urganizazione di e cullettività lucale, à a gestione di e risorse umane, à a cumunicazione cù i media è à a maestria di l’arnesi numerichi.
« Sta furmazione hà vucazione à risponde à una prufessiunalisazione di a funzione d’elettu, stima Wanda Mastor. A diversità di l’intervenenti è di i moduli hà per scopu di prupone una visione assai larga è una furmazione adattata à e realità ch’elli scrontranu l’eletti, da rinfurzà l’azzione publica di vicinanza nant’à l’isula. »
Aostu di u 2026